Bölgələrdə həkim çatışmır, Bakıda sayca böyük sıxlıq var... Nə etməli?..

Aydın Əliyev: “Müasir texnologiyalı xəstəxanalar bölgələrdə var, sadəcə tibbi kadrları stimullaşdırmaq lazımdır”

img

Respublikanın əksər bölgələrində fəaliyyət göstərən tibb ocaqları kadr çatışmazlığından əziyyət çəkir. Baxmayaraq ki, bölgələrdə müasir tələblərə cavab verən kifayət qədər yeni xəstəxana tikilərək müasir tibbi avadanlıqlara təchiz olunub. Buna baxmayaraq, bölgələrdə hələ də həkim çatışmazlığı problemi qeydə alınır.

İcbari Tibbi Sığorta üzrə Dövlət Agentliyinin Strateji təhlil departamentinin rəhbəri Araz Nəsirov da rayonlarda həkim çatışmazlığı məsələsinin olduğunu etiraf edib. O qeyd edib ki, Azərbaycanın regionlarında çoxfunksiyalı mərkəzi xəstəxanaların yaradılması planlaşdırılır: “Bölgələrdə xəstəxanalar çox, həkimlər isə azdır. Demək olar ki, ölkədəki səhiyyə işçilərinin 60 faizi Bakıda cəmləşib”.

  • “Regionlardakı xəstəxanalar müasir tibbi avadanlıqlarla təmin olunduqca, tibb işçilərinin maaşları artdıqca, paytaxtdan bölgələrə ixtisaslı həkim axını müşahidə olunacaq”

Qeyd edək ki, uzun müddətdir Azərbaycanın bölgələrində həkim çatışmazlığı probleminin yaşandığı müzakirə olunur. Bu sahədə yaşanan problemin necə həll edilməsi ilə bağlı fikir bildirən Azərbaycan Tibb Universitetinin Tədris Terapevtik Klinikasının Şüa diaqnostikası şöbəsinin müdiri həkim Aydın Əliyev qeyd etdi ki, regionlardakı xəstəxanalar müasir tibbi avadanlıqlarla təmin olunduqca, tibb işçilərin maaşları artdıqca paytaxtdan bölgələrə ixtisaslı həkim axını müşahidə olunacaq: “Bölgələrdə hazırda icbari tibbi sığorta ilə işləyən xəstəxanalar, publik hüquqi şəxslər fəaliyyət göstərir. Həkimlərin sığorta əlavələrinin verilməsi ilə əlaqədar problemlər var. Fiks maaş isə təqribən 350 manatdır. O əməkhaqqı ilə isə indiki zamanda dolanmaq çox çətin məsələdir. Müasir texnologiyalı xəstəxanalar bölgələrdə var. Sadəcə tibbi kadrları stimullaşdırmaq lazımdır. Onların qalacaq yerlərini təmin etmək, maaşlarını ikiqat artırmaq, 5 il bölgədə işləyəndən sonra Bakıda işlə təmin etmək kimi imkanlar yaradılsa, həkimlər rayonlara niyə də getməsin?”

A.Əliyev onu da əlavə etdi ki, bölgələrə təyinat alan rezidentlər 3 il müddətində məcburi olaraq orada fəaliyyət göstərməlidirlər: “Amma qalmayanları məcbur etmək olmaz. İnsanlar özlərinin maraqlarına uyğun alternativ yol tapır. Yəni insanın stimulu olmasa, göndərilən yerə getməməsi üçün mütləq bəhanə tapacaq. Öncə bu məsələni həll etmək vacibdir”.

Günel CƏLİLOVA

Son xəbərlər