Milli Məclisin Ailə, qadın və uşaq məsələləri və Səhiyyə komitələrində keçirilən “Narkomaniya ilə mübarizə ailə sağlamlığının təminatıdır” mövzusunda dinləmədə Daxili İşlər Nazirliyinin Baş Narkotiklərlə Mübarizə İdarəsinin rəisi İslam Hümbətov deyib ki, narkotik istifadəçilərinin sayı statistikada göstəriləndən çoxdur. “Cari ilin 10 ayı ərzində Daxili İşlər Nazirliyi tərəfindən bütün növ sərxoşluq hallarının müəyyənləşdirilməsi üçün Səhiyyə Nazirliyinin Respublika Narkoloji Mərkəzinə 55600 nəfər istiqamətləndirilib. Onlardan narkotiklərdən istifadənin təyin edilməsi məqsədilə tibbi müayinədən keçirilmiş 2981 nəfərindən 2193-nün istifadəçi olması müəyyən edilib”.
İ.Hümbətov qeyd edib ki, narkomaniyaya qarşı mübarizədə dövlət orqanları ilə bərabər cəmiyyət də aktiv iştirak etməlidir: “Müxtəlif dini tədbirlərdə də antinarkotik mövzusunda çıxışlara geniş yer verilsə, yaxşı olar. Eyni zamanda, narkotik istifadəçisi olmuş və sonradan normal həyata qayıtmış şəxslərlə media sahəsində müsahibələr təşkil olunması da bu mübarizənin bir növü olardı. Ölkənin inzibati rayonlarında yaşayan gənclərin işlə təmin olunması, həmin rayonlarda idman və digər sahələrin inkişaf etdirilməsi nəticəsində həmin gənclərin boş vaxtının qalmasının qarşısı alına bilər. Təhsil müəssisələrində narkotiklə bağlı tibbi müəssisələrin təşkil edilməsini təklif edirik. Narkotiklə əlaqədar cinayətə görə həbs edilmiş şəxslərin digər məhbuslarla bir yerdə saxlanılması da məqsədəuyğun deyil. Çünki onlar digər məhbusların ailə üzvləri ilə əlaqələr quraraq ölkədə narkotikin yayılmasına cəhd edirlər. Narkotiklə mübarizə üçün təkliflərimiz əsasında tərəfimizdən hazırlanan qanun layihələri Nazirlər Kabinetinə təqdim edilib”.
O, həmçinin vurğulayıb ki, narkomaniya cinayətkarlığın artmasına səbəb olur və bütövlükdə milli təhlükəsizliyə təhdiddir.
“Qeydiyyata düşmək istəmədiklərinin səbəbini soruşduqda deyirlər ki, iş yerində problem yaranmasın deyə qeydiyyata düşmək istəmirlər”
Narkomaniyanın yayılması ilə mübarizə üzrə ekspert Emil Maqalov “Bakı-Xəbər”ə bildirdi ki, narkotik istifadəçilərinin birinci problemi narkotikdən test vermələri və narkoman kimi qeydiyyata düşmələridir: “Niyə? Çünki bu təkcə narkomların yox, həm də narkotik istifadəçilərinin, valideynlərinin, yaxınlarının problemidir. Dəfələrlə mənə müraciətlər olub. Mənim işlədiyim layihələrdə biz yalnız qeydiyyatda olmuş insanlara profilaktik köməklik göstərə, onları metodom proqramına yaza bilirik. Ona görə də, bizə müraciətlər olanda deyirəm ki, bu adam qeydiyyatdadırsa biz ona kömək edə bilirik. Lakin bir qisim insanlar qeydiyyata düşürlər. Qeydiyyata düşmək istəmədiklərinin səbəbini soruşduqda deyirlər ki, iş yerində problem yaranmasın deyə qeydiyyata düşmək istəmirlər. Mən dəfələrlə sosial şəbəkələr, internet resursları üzərindən çağırışlar edirəm ki, narkotik istifadəçiləri qeydiyyata düşsünlər. Onu da bildirmişəm ki, heç bir qurum elan etmir ki, filan insan narkoman kimi qeydiyyatdadır, bu barədə yalnız güc strukturları və yaxud dövlətin müəyyən strukturları sorğu göndərərək cavab ala bilər, o da hansısa hallarda. Probelem ondadır ki, narkotik istifadəçiləri və onların valideynləri övladlarını müalicə etdirəndə də hətta bunu anonim etdirməyə çalışırlar. Yəni bunu heç kəs bilməsin. Valideyn düşünmür ki, o övladının narkotik istifadəçisi olduğunu sonuncu bilən odur. O bilmir ki, bunu artıq hamı bilir. Bunun sadəcə, mentalitemizdənmi, ailə dəyərlərimizdənmi, yaxud nədən irəli gəldiyi başqa bir məsələdir”.
E.Maqalovun sözlərinə görə, narkotik istifadəçisi kimi əsasən qeydiyyatda olanların əksəriyyəti ya özləri müraciət ediblər, ya da güc strukturları tərəfindən qeydiyyata saldırılmış, yaxud hanısa bir cinayətə görə qeydiyyata daxil edilmiş şəxslərdir. O qeyd etdi ki, məsələn, Azərbaycanda 1000 nəfər narkoman varsa 10 nəfər də polis var. O bildirdi ki, polislərin fəaliyyəti nəticəsində son aylarda narkotik satanların və narkotik istifadəçilərinin sayı təxminən 30-40 faiz azalıb. “Demək istəyirəm ki, bir çox narkotik istifadəçiləri bu səbəblərdən narkotikə görə test verməkdən və narkoman kimi qeydiyyata düşməkdən çəkinir. Səbəbini də dedim. Bu baxımdan, Daxili İşlər Nazirliyinin Baş Narkotiklərlə Mübarizə İdarəsinin rəisi doğru deyir. Yəni özü könüllü şəkildə qeydiyyata düşənlərdən və güc strukturları tərəfindən qeydiyyata salınanlardan əlavə qeydiyyata düşməkdən yayınanlar da var”-deyə E.Maqalov qeyd etdi.
İradə SARIYEVA
