Dövlət İmtahan Mərkəzi dekabrın 19-da qəbul imtahanı modelinə uyğun sınaq imtahanı keçirəcək. I, II, III, IV ixtisas qrupları üzrə sınaq imtahanında iştirak etmək istəyənlər 40 manat, III qrup abituriyentlərindən coğrafiya fənnindən imtahan vermək istəyən olsa, əlavə olaraq 15 manat da ödəməlidir. Yəni III qrup abituriyentləri sınaq imtahanında iştirak etmək üçün 55 manat ödəniş etməlidir.
Sınaq imtahanlarının qiyməti valideynlərin narazılığına səbəb olub. III qrup abituriyentləri isə qərarın obyektiv olmadığını iddia edirlər.
Valideynlər və ekspertlər sınaq imtahanlarının qiymətinin hər kəs üçün əlçatan olmasını istəyir. Sınaq imtahanı qiymətinin 40-55 manat arasında dəyişməsi valideynlər üçün sərfəli deyil.
Xanlar Xanlarzadə: “Dövlət İmtahan Mərkəzi publik hüquqi şəxsdir və büdcədən maliyyələşmir”
Dövlət İmtahan Mərkəzinin mətbuat katibi Xanlar Xanlarzadə bildirdi ki, sınaq imtahanlarının qiymətində hər hansı bir dəyişiklik yoxdur: “Bu növ sınaq imtahanları 2020-ci ilin əvvəllərində də keçirilib və eyni qiymət idi. Daha sonra pandemiya şəraitinə görə kağız daşıyıcılar vasitəsilə sınaq imtahanları keçirilmədi. Dövlət İmtahan Mərkəzi publik hüquqi şəxsdir və büdcədən maliyyələşmir. Ümumiyyətlə, hər hansı bir imtahanda iştirak etmək üçün tələb olunan ödəniş məbləğinin müəyyən edilməsi üçün DİM tərəfindən keçirilən müxtəlif təyinatlı imtahanlar, onların təşkili, keçirilməsi, görülən digər hazırlıq işləri, təqdim olunan xidmətlər və s. ətraflı şəkildə araşdırılır və qiymət müəyyən edilərkən nəzərə alınır.
III ixtisas qrupu üzrə imtahana yazılanlardan da hər hansı əlavə ödəniş tələb olunmur. Bu qrupda 2 altqrup var. Beynəlxalq münasibətlər və regionşünaslıq ixtisasları TC, digər ixtisaslar isə DT altqrupunda cəmlənib. İmtahan qiyməti də, təbii ki, eynidir. Sadəcə olaraq kimsə hər iki, yəni həm TC, həm də DT altqrupuna aid ixtisasları seçmək istəsə əlavə olaraq coğrafiya fənni üzrə imtahan verməlidir. Bu seçim isə tam sərbəstdir. Yalnız bu zaman əlavə olaraq coğrafiya fənni üçün 15 AZN iştirak haqqı tələb olunur”.
Kamran Əsədov: “Ölkədə artıq rəsmi alternativ imtahan təşkil edəcək quruma ehtiyac var, təkbaşına rəqabət olmur”
Təhsil eksperti Kamran Əsədov bildirdi ki, pandemiya dövründə DİM ənənəvi qaydada -kağız üzərində sınaq imtahanı keçirmədiyini deyir: “Sınaq imtahanı imtahan iştirakçılarına təkcə biliklərini yoxlamaq deyil, eyni zamanda imtahan bacarıqlarını formalaşdırmaq imkanı verir. Şagird və abituriyentlər müəyyən edilmiş vaxt ərzində fənlərə cavabları vermək üçün vaxt bölgüsü bacarığını nümayiş etdirirlər, sual kitabçasından cavabları cavab kartına köçürmək kimi vərdişlərinə yiyələnirlər. Bunlar çox yaxşı halıdır. Ancaq qiymətin baha olması düzgün deyil. I, II, III, IV qrup üzrə sınaq imtahanında iştirak etmək istəyən 40 manat, 3-cü qrup abituriyenti əlavə coğrafiya fənnindən imtahan vermək istəsə 15 manat da ödəməlidir. Yəni III qrup abituriyentləri 55 manat sınaq imtahanında iştirak etmək üçün ödəniş etməlidir. Bəli, DİM publik hüquqi şəxsdir, göstərdikləri xidmətə görə haqq müəyyən edilir, çünki resurslar sərf olunur. Amma sınaq imtahanına 55 manatlıq resurs sərf edilmir axı. Məlumdur ki, qəbul imtahanlarında əlavə qüvvə cəlb edilir, təhlükəsizlik tədbirləri görülür ki, bunu anlamaq olar”.
Ekspert onu da bildirdi ki, ölkədə artıq rəsmi alternativ imtahan təşkil edəcək quruma ehtiyac var, çünki təkbaşına rəqabət olmur.
Günel CƏLİLOVA
