Artıq illərdir ki, tıxac məsələsi Bakının əsas problemlərindən birinə çevrilib. Bu sıxlıq yalnız şəhərin mərkəzində və pik saatlarda deyil, hətta şəhərin istənilən yerində, istənilən saatında yaranır. Dəfələrlə bu barədə mətbuatda, sosial şəbəkələrdə yazılıb, müzakirələr aparılsa da, dəyişən bir şey yoxdur. Hətta şəhərin hansısa bir yolunda qəza baş verərsə, bu, demək olar ki, bütün yollardakı hərəkətə təsir edir, sıxlıq yaradır.
Qeyd edək ki, bir neçə gün əvvəl Bakı-Sumqayıt yolunda yük avtomobilinin (TIR) aşması nəticəsində paytaxtın bir çox yerində saatlarla tıxac yarandı.
Onu da bildirək ki, paytaxt ərazisində yük avtomobillərinin idarə olunması ilə bağlı Baş Dövlət Yol Polisi İdarəsi hüquqi və fiziki şəxslərə müraciət edib. Müraciətdə bildirilir ki, son vaxtlar Bakı şəhərinin mərkəzi və digər küçələrində yük avtomobillərinin gün ərzində yollarda hərəkətdə olması, bəzi ərazilərdə bu səbəbdən müəyyən sıxlıqların, hətta tıxacların yaranması müşahidə edilir: “Tikinti və ya digər ticarət obyektlərinə xidmət göstərilməsi üçün paytaxta daxil olmuş həmin yük avtomobillərinin sonradan ərazidən çıxarılması özü də bir qədər vaxt tələb etməklə yanaşı, digər hərəkət iştirakçılarının yollarda rahat və fasiləsiz hərəkətinə ciddi maneçilik törədir. Bakı şəhərində nəqliyyatın hərəkətinin təkmilləşdirilməsi haqqında Nazirlər Kabinetinin Yol Hərəkəti Təhlükəsizliyi Komissiyasının müvafiq qərarı ilə xüsusi təyinatlı, o cümlədən qəza-bərpa və xilasedici, həmçinin kənd təsərrüfatı məhsullarını daşıyan nəqliyyat vasitələrinin hərəkəti istisna olmaqla, icazə verilən maksimum kütləsi 5 tondan artıq olan yük avtomobillərinin may ayının 1-dən oktyabr ayının 1-dək səhər saat 07:30-dan axşam saat 21:00-dək, oktyabr ayının 1-dən may ayının 1-dək səhər saat 07:30-dan axşam saat 20:00-dək Bakı şəhərinə girişinə məhdudiyyət tətbiq olunur”.
Mayis Əliyev: “Yük maşınları, məhdudiyyətlərə məhəl qoymadan, günün istənilən saatında mərkəzi küçələrə çıxaraq hərəkət edirlər”
Onu da vurğulayaq ki, paytaxt yollarında yük maşınlarının aşması yollarda uzun-uzadı tıxacın yaranmasına səbəb olur. Bu sahədə yaşanan problemlərin necə həll olunması ilə bağlı fikir bildirən sosial sahə üzrə ekspert Mayis Əliyev qeyd etdi ki, iri qabaritli yük maşınlarının sol zolaqda aşağı sürətlə hərəkət etməsi tıxaca səbəb olan amillərdən biridir: “Yük maşınları məhdudiyyətlərə məhəl qoymadan günün istənilən saatında mərkəzi küçələrə çıxaraq hərəkət edir. Halbuki, şəhərin giriş istiqamətlərində yük maşınlarının günün müəyyən saatlarında şəhərə girişinə qadağa qoyulub”.
Həmsöhbətimiz onu da əlavə etdi ki, insanlar 2-3 saat tıxacda qalaraq vaxt itkisi yaşayırlar. Bu baxımdan tıxac problemi gündəmin ən vacib məsələlərindən biridir.
Ərşad Hüseynov: “Yeganə çıxış yolu - şəhərsalmadakı problem aradan qalxmalı və əsas hədəf ictimai nəqiliyyatın inkişafı olmalıdır”
Yol hərəkətinin təhlükəsizliyi üzrə ekspert Ərşad Hüseynov bildirdi ki, hökumətin bununla bağlı konkret fəaliyyət proqramı açıqlanmalıdır: “Bu yaxınlarda Bakı-Sumqayıt yolunda yük avtomobilinin yükünün dağılması nəticəsində bütün zonanı, yəni Bakı şəhərinin şimal hissəsini - Binəqədi şossesini, 20 Yanvar dairəsini, Tbilisi prospektini, Moskva prospektini, bir sözlə, hər yeri iflic edib. Deməli, o qədər ifrata yaxın yüklənmə var ki, bir qəza olan kimi hər yerdə aləm bir-birinə qarışır.
İk növbədə dəqiq nəqliyyat infrastruktur siyasəti, yaxud strategiyası qurulmalı və bu məsələ ilə bir neçə qurum məşğul olmalıdır. Hətta yollar tikilsə, yaxud genişləndirilsə, fərqli yol qovşaqları, yəni körpü, tunel tikilsə də alınmayacaq. 2005-ci ildən bugünə qədər bu istiqamətdə işlər görülüb. Məsələn, Bakı-Sumqayıt yolu 2005-ci ildən ən azı 3 dəfə genişləndirilib, çoxlu körpülər, tunellər tikilib, amma yenidən bir qədər boşluq yaranıb. Bir-iki ildən sonra yenidən yollarda ifrata yaxın yüklənmə baş verib. Yeganə çıxış yolu olaraq, şəhərsalmadakı problem aradan qalxmalı və əsas hədəf ictimai nəqiliyytın inkişafı olmalı, velosipedin real nəqliyyata çevrilməsi və mikro mobilliyə diqqət artırılmalıdır”.
Günel CƏLİLOVA
