Məlum olduğu kimi, bundan sonra Bakının mərkəzində 12-14 mərtəbədən artıq nə yaşayış, nə də inzibati binaların tikintisinə icazə verilməyəcək. Bu Dövlət Şəhərsalma və Arxitektura Komitəsinin (DTAK) müəyyən etdiyi və artıq rəsmən təsdiqlənmiş yeni qaydalarında qeyd olunur.
Qeyd edək ki, yeni qaydalar təkcə bundan sonra inşa ediləcək binalara deyil, 2019-cu ildən bəri tikintisinə icazə verilmiş və hazırda inşası davam edən bina və obyektlərə də şamil olunur.
Ancaq tikinti şirkətləri yeni qaydanı narazılıqla qarşılayır. Sahibkarlar bildirir ki, Bakıda torpaq sahələri baha olduğundan 12-14 mərtəbədən aşağı yaşayış binası tikmək onlara sərf etmir. Onlar iddia edirlər ki, həm torpağın alınmasına, həm də tikintiyə sərf olunan xərcləri 14 mərtəbədəki mənzillərin satışı güclə ödəyir. Tikinti şirkətlərinin özünün qazancı isə yalnız 15-ci mərtəbədən yuxarı mənzillərin hesabına formalaşır. Belə olan halda tikinti şirkətləri yeni binaların tikintisinə maraq göstərməyəcək. Sahibkarlar həmçinin, bu qərarın ciddiliyinə də inanmır. Onlar hesab edir ki, bu “qeyri-rəsmi göstəriş”dir.
Məsələ ilə bağlı fikir bildirən daşınmaz əmlak məsələləri üzrə ekspert Ramil Osmanlı qeyd etdi ki, Şəhərsalma Məcəlləsində çoxmərtəbəli binaların tikintisini tənzimləyən kifayət qədər norma və standartlar müəyyənləşib. Lakin həmin qayda və normaların tətbiqi məsələsində ciddi problemlər var. Onun sözlərinə görə, 2019-cu ildə şəhərsalma qaydalarına edilən dəyişikliklərdən sonra problemlərin bir qismi aradan qaldırılsa da, hələ hər şey nizama düşməyib: “Bir neçə il əvvəl tikinti qaydalarına nəzarət bütünlüklə Dövlət Şəhərsalma və Arxitektura Komitəsinə həvalə edilib. Yəni, Bakı şəhərində çoxmərtəbəli bina və obyektlərin tikintisinə icazə prosedurunda Dövlət Arxitektura və Şəhərsalma Komitəsinə yeni səlahiyyətlər verilib. Yeni qaydalara əsasən, Bakıda çoxmərtəbəli bina və obyektlərin tikintisinə sərəncam verilərkən hər şeydən əvvəl Dövlət Arxitektura və Şəhərsalma Komitəsinin həmin ərazi ilə bağlı rəyi nəzərə almalıdır. Halbuki, 2019-cu ilə qədər tikintisinə icazə tələb olunan obyektlərin inşasına razılıq məsələlərində Komitənin rəyi istənilmirdi. İndi isə Bakı şəhərində çoxmərtəbəli binaların tikintisinə icazə verilərkən ərazinin baş planı varsa, onun, yoxdursa, müfəssəl planın tələblərinə dair müvafiq rəy olmalıdır”.
Ekspert deyir ki, bu dəyişikliyin əsas məqsədlərindən biri Bakının mərkəzi hissəsinin normadan artıq yüklənməsinin qarşısını almaq, şəhərin ümumi görünüşünü qorumaq, sıxlığı mümkün qədər aradan qaldırmaq və infrastrukturları işlək hala gətirməkdir. Onun fikrincə, mərkəzi zonalarda 12-14 mərtəbədən yuxarı binaların tikintisinə qoyulan qadağalar məhz bu prinsiplərə xidmət edir və rəsmi xarakter daşıyır.
Günel CƏLİLOVA
