Mehriban xanım Sabunçu İcraya və AAYDA-ya tapşırsa da… Kürdəxanıda azı 10 min sakinin problemi...

img

Bakıətrafı kənd və qəsəbələrin əksəriyyətində məhəllədaxili yolların acınacaqlı vəziyyətdə olduğu məlumdur. Payız-qış aylarında bu kənd və qəsəbələrdə yaşayanlar, o cümlədən yeni salınmış (əsasən xaotik şəkildə) yaşayış məhəllələrinin sakinləri dərin gölməçələrdən, az qala dizə çıxan palçıqdan əziyyət çəkməli olur. O cümlədən, hər gün bu cür yollarla dərsə gedib-gəlməli olan məktəblilər...

Sabunçu rayonu Kürdəxanı qəsəbəsi ACCOPEN ilə üzbəüz, 5-10 min nəfər insanın məskunlaşdığı məhəllənin sakinlərinin yol problemi də uzun illərdir həll olunmur. Sakinlərin dediyinə görə, yollar yayda toz-torpaq, qışda isə palçıq və bataqlıq içində olur. Məsələ ilə bağlı aidiyyəti üzrə müraciət edilsə də, şikayətlərinə məhəl qoyulmayıb.

Sakinlərin sözlərinə görə, 2020-ci ildə Birinci vitse-prezident Mehriban Əliyeva yolun təmir edilməsi barədə göstəriş versə də, tapşırıq icra olunmayıb: “Həmin vaxt Mehriban xanım əmr verdi ki, Kürdəxanının bütün yaşayış məhəllələri asfaltlansın. Amma yerli icra hakimiyyəti və Azərbaycan Avtomobil Yolları Dövlət Agentliyi (AAYDA) verilən tapşırığı icra etmədi”.

  • AAYDA - Anar Nəcəfli: “Bəzi küçələr istisna olmaqla, qəsəbədaxili küçələr yerli icra strukturlarının balansına daxildir”

Məsələ ilə bağlı AAYDA-nın mətbuat katibi Anar Nəcəfli bildirdi ki, Kürdəxanı qəsəbəsində Agentliyin balansında iki küçə var: “Həmin küçələr Ağaverdiyev və Məşədi Adil küçələridir. Məlumat üçün qeyd edim ki, yeni salınmış ərazilər bələdiyyə və yaxud icra hakimiyyətinin balansında olur. Ümumilikdə, bəzi küçələr istisna olmaqla, qəsəbədaxili küçələr yerli icra strukturlarının balansına daxildir. Ola bilər ki, indi onlar deyirlər təmir bizlikdir. Lakin qeyd edim ki, bu halda da biz investisiya proqramına uyğun olaraq təmir işlərini həyata keçiririk və nəzərdə tutulan küçələr üzrə də yollar asfaltlanıb”.

  • Kürdəxanı Bələdiyyəsi: “Həmin küçə bizə aid deyil, Kürdəxanının bütün küçələri asfaltlıdır”

Kürdəxanı Bələdiyyəsindən isə bildirildi ki, sözügedən küçə onların ərazisinə aid deyil: “Həmin küçə bizə aid deyil. Kürdəxanının bütün küçələri asfaltlıdır. Mehriban xanım Kürdəxanıya gəlib tapşırıq verəndə ərazini tam dəqiqləşdirdilər və Kürdəxanıya aid olan bütün küçələr asfaltlandı. Qəsəbə Sabunçu rayonuna aid olsa da, ACCOPEN-lə üzbəüz küçə, yəni yolun o biri tərəfi Abşeron rayonunun ərazisidir. Tam Kürdəxanı qəsəbəsi qurtarıb, Məhəmmədi başlayan yolda, bəli, asfalt yoxdur. Bu, plana uyğun həyata keçirilib”.

Sabunçu Rayon İcra Hakimiyyəti ilə əlaqə saxlamağa çalışsaq da, qurumdan bizə cavab verən tapılmadı.

Günel CƏLİLOVA

Son xəbərlər