“Günay Sığorta”: “Avtomobilə dəymiş zərərin qiymətləndirilməsi üçün nəqliyyat vasitəsinin sahibinə yazılı və şifahi qaydada müraciət olunub, lakin…”
Şəki sakini sığorta şirkətindən gileylidir. Rəfael Musayev ona çatası sığorta ödənişini ala bilməməsindən şikayətlənir. Onun sözlərinə görə, sığorta şirkəti heç bir əsası olmayan bəhanələrlə pulu ödəməkdən imtina edir.
Sığorta sahəsinə nəzarət edən Mərkəzi Bank isə şikayətlərinə laqeyd yanaşır: “BMW” markalı, “10-OV-055” dövlət-nömrə nişanlı avtomobillə 2021-ci il iyulun 28-də qəzaya düşdüm. Avtomobilin kasko sığortası vardı. Ona görə də hadisədən sonra sığorta şirkətinə – “Günay Sığorta”ya məlumat verdim. Lakin şirkət təmsilçiləri ödənişdən imtina edir. Şirkət imtinanı belə əsaslandırır ki, onlara müraciət etmədən maşını təmir elətdirmişəm. Açıq şəkildə dedilər ki, bir manat da verməyəcəklər. Təsəvvür edin, maşına 50 min manata yaxın ziyan dəyib, sığorta şirkəti qətiyyən pul vermək istəmir. Dəymiş ziyanın qiymətləndirilməsi üçün “İmprotex”ə müraciət etdim. Bu şirkət belə nəticəyə gəlib ki, qəza nəticəsində “BMW”yə 45 min manata yaxın ziyan dəyib. Lakin yenə də “Günay Sığorta” ödənişdən imtina edir.
Onu da qeyd edim ki, sığorta şirkəti mənimlə bağlı Daxili İşlər Nazirliyinə şikayət etdi. Araşdırılandan sonra mənim günahsız olduğum üzə çıxdı”.
- “Rəfael Musayevin verdiyi şifahi məlumata görə, nəqliyyat vasitəsini özü təmir etdirib, qanunvericiliklə bu hal sığorta ödənişindən imtinaya əsas verir”
Məsələ ilə bağı “Günay Sığorta” ASC-dən bildirildi ki, “BMW 740” markalı sözügedən avtomobilə dəymiş zərərin qiymətləndirilməsi üçün nəqliyyat vasitəsinin sahibinə – Rəfael Musayevə dəfələrlə yazılı və şifahi qaydada müraciət olunub: “Lakin müraciətlərimiz Rəfael Musayev tərəfindən cavablandırılmayıb, nəqliyyat vasitəsi rəsmi servis xidmətinə təhvil verilməyib. Rəfael Musayevin verdiyi şifahi məlumata görə, nəqliyyat vasitəsini özü təmir etdirib. Bu isə Mülki Məcəllənin 935.1.5 (sığortaçının zərərin həcmini müəyyənləşdirmək imkanından tam və ya qismən məhrum olması) maddəsinə əsasən, sığorta ödənişindən imtinaya əsas verir. Həmçinin, avtomobilə çəkilən xərcləri təsdiqləyən hesab-fakturaların şirkətə təqdim olunması Rəfael Musayevə təklif edilib. Müvafiq təsdiqedici sənədlər təqdim edildikdən sonra uyğun qərar qəbul olunacaq”.
Günel CƏLİLOVA
