Qubanın Pir Vahid kəndində şəhid adını daşıyan məktəbin nə günə düşdüyünü bilirsinizmi?..

img

Quba rayonu Pir Vahid kəndində yerləşən şəhid Ramin Dadaşov adına tam orta məktəb acınacaqlı vəziyyətdədir. Sovet dönəmində fərqli məqsədlərlə istifadə olunan bu bina hazırda tədris ocağı kimi fəaliyyət göstərir.

Kənd sakinlərinin bildirdiyinə görə, məktəbin pəncərələri qırılıb, tavanı və döşəməsi çürüyüb: “Məktəbin pəncərələri yoxdur. Çarəsizlikdən pəncərələrə klyonka vurulur. Yağış yağanda sinif otaqları bərbad vəziyyətə düşür. Bu vəziyyətdə şagirdlər dərsə necə getsin?”.

Müəllimlərin dediyinə görə, məktəb qəzalı vəziyyətdə olduğu üçün şagirdlərə ehtiyatla hərəkət etmələri tapşırılıb. Çünki təhlükəli divarlar hər an aşa bilər. Məktəbdə 280-ə yaxın şagird təhsil alır.

Məktəbdə çalışanlar onu da qeyd edir ki, tədris ocağının qazlaşdırılmaması soyuq qış günlərində dərsə gələnlər üçün problem yaradır: “2010-cu ildə məktəb qəzalı vəziyyətdə olması ilə bağlı qeydiyyata alınsa da, heç bir iş görülməyib”.

Kənd sakinləri onu da bildirir ki, məktəbin istismara yararsız vəziyyətdə olması ilə bağlı aidiyyəti qurumlara müraciət ediblər. Ancaq onlara hər hansı bir cavab verilməyib.

  • Quba Rayon Təhsil Şöbəsi - Rüfət Hacıyev: “Məktəbin təmiri üçün vəsait ayrılacağı təqdirdə həmin tədris ocağı üçün yeni binanın tikintisi nəzərdə tutulur”

Məsələ ilə bağlı Quba Rayon Təhsil Şöbəsinin nümayəndəsi Rüfət Hacıyev bildirdi ki, Pir Vahid kəndində yerləşən şəhid Ramin Dadaşov adına tam orta məktəb tikintiyə ehtiyacı olan məktəblər sırasında yer alır: “Məktəbin təmiri üçün vəsait ayrılacağı təqdirdə həmin tədris ocağı üçün yeni binanın tikintisi nəzərdə tutulur”.

  • Nizami Hüseynov: “Tədrisin keyfiyyətinə birbaşa məktəbin infrastrukturu təsir göstərir, bu gün qəzalı vəziyyətdə olan məktəblərin yetirmələrinin nəticəsi elə də yüksək deyil”

Təhsil eksperti Nizami Hüseynov bildirdi ki, hazırda ölkədə 4447 ümumtəhsil məktəbi var. Bu isə o deməkdir ki, 900-ə yaxın məktəbin yenidən tikilməsinə və ya bərpasına ehtiyac var: “Təəssüflər olsun ki, bu sahədə iş müəyyən qədər zəif aparılır. Hazırda bölgələrdə qəzalı vəziyyətdə olan və hər an uçma təhlükəsi ilə üzləşən məktəblər var. Bu isə insanların həyatı üçün olduqca təhlükəlidir. Danılmaz faktdır ki, ölkə rəhbərliyi təhsilə çox ciddi qayğı və diqqət göstərsə də, müəyyən qədər aidiyyəti dövlət qurumları bu sahəyə səhlənkar yanaşır. Mətbuatda hər hansı bir məsələ işıqlandırıldıqdan sonra həmin problemin həlli istiqamətində iş görülməsi təmin edilir. Ölkəmizdə modul tipli məktəblərin sürətlə inşası həyata keçirilərsə, uşaqlar yaxşı şəraiti olan təhsil müəssisələrində təhsilini davam etdirər”.

Həmsöhbətimiz onu da əlavə etdi ki, tədrisin keyfiyyətinə birbaşa məktəbin infrastrukturu təsir göstərir. Bugün qəzalı vəziyyətdə olan məktəblərin yetirmələrinin nəticəsi elə də yüksək deyil. Bu istiqamətdə dövlət proqramını daha da genişləndirmək lazımdır.

Günel CƏLİLOVA

Son xəbərlər