Milli Məclisin iclasında İşsizlikdən Sığorta Fondunun büdcəsinin müzakirəsi zamanı deputat Əli Məsimli deyib ki, onlara ən çox müraciət işsizliklə bağlıdır: “Azərbaycan kimi ölkələrdə işsizliyin səviyyəsi 7 %-dən artıq olursa, bir sıra iqtisadi və sosial fəsadlar yaranır”.
Deputat bildirib ki, artıq Azərbaycanda işsizliyin faizi 7 %-dən çoxdur: “İSF-nin büdcəsi hesabına işsizliklə mübarizə aparmaq mümkün deyil. Bu fonda əlavə vəsaitlər cəlb edilməlidir. Bir neçə il ərzində cəmi 8500 adama işsizliyə görə müavinət verilib. Bu müavinətlər bütün işsizlərin 0,7 %-ni təşkil edir. Həddən artıq dözülməz rəqəmlərdir. İSF-nin işlərini görən müvafiq icra hakimiyyəti orqanına ayrılan vəsait işsizlik üçün ayrilan vəsaitdən 5 dəfə artıqdır. Xaricə beyin axını var. Bunun qarşısını almalıyıq. Azərbaycan vətəndaşı ona normal şərait yaradanda özünü və ailəsini dolandırmağa qadirdir. O insanlara şərait yaradılmalıdır". Spiker Sahibə Qafarova isə deputata cavab olaraq deyib ki, onlar məsələni səsə tələsik qoymaq istəmirlər: "Siz komitələrdə büdcə müzakirələrində çıxış etmədinizmi? Məsələlər müzakirə olunanda şərait yaratmaq lazımdır. Qaldı ki, həssas təbəqədən olan insanların işlə təmin edilməsi məsələsinə, hökumət tərəfindən bu istiqamətdə böyük işlər görülür. Sadəcə zaman lazımdır".
Deputatın səsləndirdiyi fikirdə maraq doğuran əsas məqam Azərbaycandan beyin axınının olması ilə bağlıdır. Azərbaycandan xaricə doğrudanmı beyin axını var?
Milli Məclisin deputatı Elman Nəsirov “Bakı-Xəbər”ə açıqlamasında bildirdi ki, 2022-ci ilin büdcəsi müstəqillik tariximizdə olan ən böyük büdcədir: “Heç bir zaman bizim büdcəmizin gəlirləri 27 milyard manata, xərclərimiz 30 milyarda çatmayıb. Sosialyönümlü xərclər bütün büdcənin 46,4 faizini təşkil etməyib. Təhlükəsizlik məsələləri üçün ayrılan vəsaitin həcmi 4, 5 milyard manat təşkil edir. İnsanlarımızın sosial rifahı ilə təhlükəsizlik birinci yerdə dayanır. Kimlərinsə sosial şəbəkələrdə və ya ayrı platformalarda ölkəmizdə olmayan proseslərlə bağlı fikirlər səsləndirməsi tam əsassızdır. Güya Azərbaycandan beyin axını var, tanınmış ziyalılar ölkəni tərk edir kimi fikirlər səslənir. Bunların hamısı nonsensdir. Belə hallar Azərbaycanda olub, ancaq indi yox. Ötən əsrin 90-cı illərinin əvvələrində. Həmin dönəmdə Azərbaycan çox ağır vəziyyətdə olub. Ölkəmiz vətəndaş müharibəsi girdabında olarkən ziyalılar ölkəni tərk edirdi. Təhsil xərcləri büdcəmizin 13 faizini təşkil edir. Heç vaxt bu qədər vəsait təhsilə ayrılmayıb. Hərbi xərclər 15, təhsil isə büdcənin 13 faizini təşkil edir. Görün, bizim ölkə təhsilə hansı önəmi verir? 3,9 milyard manat təhsilə vəsait ayrılıb. Azərbaycanın inkişafını qəbul etmək istəməyən dairələr sosial şəbəkələrdə bu cür fikirləri tirajlayırlar. Azərbaycandan beyin axını yoxdur. Əksinə, vaxtilə xaricə gedən ziyalılarımız hazırda geri dönüb, öz təhsil ocaqlarımızda dərs deyirlər. Çünki onların rifahı üçün çox münasib şərait var. Bu cür ittihamları kökündən yanlış sayıram”.
Məhəmmədəli QƏRİBLİ
