Yarımçıq tikililərin yalnız monitorinqinin aparılması yetərlidirmi?

Elnur Fərzəliyev: “Tikinti sektoruna nəzarət olunmalıdır ki, tikinti işi aparılanda düzgün aparılsın”

img

“Yarımçıq qalmış tikililərlə bağlı problemlər var və kifayət qədər keçid layihələri mövcuddur”. Bunu Milli Məclisin noyabrın 24-də keçirilən iclasında iqtisadiyyat nazirinin müavini Sevinc Həsənova deyib.

Nazir müavini bildirib ki, dövlət büdcəsindən investisiya layihələrinə ayrılan vəsaitlər hər il azalmaqla təsdiq edilir: "Bununla əlaqədar İqtisadiyyat Nazirliyində geniş tərkibdə işçi qrup yaradılıb. Dövlət investisiya proqramlarının tərtibi yenidən işlənəcək. Bu qrup tərəfindən bütün yarımçıq qalmış tikililərin monitorinqi aparılacaq və müvafiq təkliflər hazırlanacaq. Bu tikililərin sadəcə dövlət büdcəsi hesabına maliyyələşdirilməsi nəzərdə tutulmur. Özəlləşdirmə və s. kimi təkliflər də nəzərdə tutulur".

Danılmaz faktdır ki, uzun illərdir paytaxtda tikintisi yarımçıq qalan çox sayda bina var. Bu isə nəinki şəhərin xarici görünüşünə mənfi təsir göstərir, eləcə də həmin tikililərin başa çatmasını gözləyərək, hətta ödəniş edərək uzun illərdir evsiz qalan sakinlərin səbrini daşırır. Ancaq təəssüf ki, paytaxtda hər addımbaşı belə tikililərə rast gəlmək mümkündür.

Maraqlıdır, yarımçıq qalmış tikililərlə bağlı keçiriləcək monitorinq bu sahədə yaşanan problemlərin həll olunmasına səbəb olacaqmı?

  • “Həmin tikililərin yarımçıq qalması o deməkdir ki, bugünə qədər bu problem aidiyyəti qurumların marağında olmayıb”

Əmlak məsələləri üzrə ekspert Elnur Fərzəliyev qeyd etdi ki, paytaxtda yarımçıq qalan tikililərin inşasını özəl şirkətlər aparır: “Həmin tikililərin yarımçıq qalması ilə vətəndaşlar uzun illərdir pul ödəsə də, evinə sahib ola bilmir, kirayədə yaşamalı olurlar. Belə binaların sayı kifayət qədərdir və belə problemli məsələlər öz həllini tapa bilməyəcək. Çünki heç bir şirkət üçün maraqlı deyil ki, kiminsə yarımçıq qoyduğu binanı gedib tamamlasın. Mənzillər satılıb, satan ya həbsdədir, ya vəfat edib, ya da ölkədən qaçıb. Bu cür problemlər mövcuddur. Təbii ki, bunların qiymətləndirilməsi, monitorinqlərin aparılması, həmin vətəndaşların evlə təmin edilməsi həm də vətəndaşlar üçün dövlət dəstəyidir. Ümumiyyətlə, tikinti sektoruna nəzarət olunmalıdır ki, tikinti işi aparılanda düzgün aparılsın”.

Ekspert onu da əlavə etdi ki , bir çox yeni tikili binaya çıxarışlar verilmirdi ki, tikinti təyinatı üzrə aparılmayıb: “Şirkət tikintini təyinatı üzrə aparmayıbsa, buna zamanında nəzarət lazım idi ki, layihədən kənara çıxmasın. İllərdir o binalar yarımçıq qalıb, vətəndaş pulunu ödəyib, ancaq onun hüququ sığortalanmayıb, qorunmayıb. İllərdir ki, vətəndaşın döymədiyi qapı qalmayıb. Həmin tikililərin yarımçıq qalması o deməkdir ki, bugünə qədər həmin problem aidiyyəti qurumların marağında olmayıb. Əgər bu gün belə, buna start verilibsə, çox yaxşıdır. Yüzlərlə vətəndaşın ev problemini aradan qaldırmış olacaq”.

Günel CƏLİLOVA

Son xəbərlər