Bildiyimiz kimi, iyunun 21-dən iyulun 5-dək ölkə ərazisində sərt karantin rejimi həyata keçirilir. Karantin rejiminin qaydalarına hər bir vətəndaş əməl etməli olduğu halda, yenə də ciddi qayda pozuntusuna rast gəlinir. İnsanlar sanki bilərəkdən karantin qaydalarını pozurlar.
Bilirik ki, artıq şəhərimizin giriş və çıxışlarında, eləcə də müəyyən yerlərdə postlar quraşdırılıb və karantin rejiminin qaydalarına uyğun olaraq vətəndaşların yoxlanılması həyata keçirilir. Artıq iki gündür sərt karantin rejimi davam edir və bu iki gündə sərt karantin rejimini pozan 1 572 nəfər cərimələnib.
Belə ki, Daxili İşlər Nazirliyi Baş Dövlət Yol Polisi İdarəsi (BDYPİ) sərt karantin rejimini pozaraq Bakıya girişə və çıxışa cəhd edən sürücülərin və cərimələnən şəxslərin sayını açıqlayıb.
BDYPİ-nin şöbə rəisi, polkovnik Kamran Əliyev mətbuata bildirib ki, iyunun 21-i saat 00:00-dan etibarən ölkə ərazisində sərt karantin rejiminin tələblərinə riayət etməyərək, İnzibati Xətalar Məcəlləsinin (İXM) 211.1-ci maddəsinin tələbini pozduğuna görə 1 440 nəfər, İXM-nin 211.2-ci maddəsinin tələbini pozduğuna görə 132 nəfər olmaqla, ümumilikdə, 1 572 nəfər inizibati məsuliyyətə cəlb edilib.
O qeyd edib ki, Ələt-Astara, Bakı-Şamaxı və Bakı-Quba yollarında qurulan karantin postlarında hərəkətinə icazə verilməyən 900 nəqliyyat vasitəsinin sürücüsü aşkarlanaraq geri qaytarılıb.
Qeyd edək ki, Bakı, Sumqayıt, Gəncə, Lənkəran, Yevlax, Masallı, Cəlilabad şəhərlərinin və Abşeron rayonu ərazisində xüsusi karantin rejiminin sərtləşdirilməsi ilə bağlı əlavə tədbirlər barədə qərar qəbul edilib.
Qərara əsasən, sərt karantin rejimi 21 iyun saat 00:00-dan 5 iyul saat 06:00-dək davam edəcək.
“Sərt karantin rejiminin qaydalarını pozan insanların şəxsiyyəti, ad-soyadı, ev ünvanı telekanalda işıqlandırılmalıdır”
“Polisə Dəstək” İctimai Birliyinin sədri, tanınmış hüquqşünas Şəmsəddin Əliyev məsələni şərh edərkən “Bakı-Xəbər”ə bildirdi ki, sərt karantin rejimini pozan insanların bu yoldan çəkindirilməsi üçün alternativ variantlardan istifadə edilməlidir. Ş.Əliyev hesab edir ki, inizibati məsuliyyətə cəlb edilən 1 572 nəfərin və onlardan sonra bu hala yol verən digər vətəndaşların adları, yaşadıqları ünvan və iş yerləri KİV-də işıqlandırılmalı, onların çalışdıqları müəssisələrə sorğular göndərilməlidir. Cərimələnmələrin effekt vermədiyini deyən Ş.Əliyevin sözlərinə görə, bələdiyyələr, icra hakimiyyəti orqanları, şirkət rəhbərləri, idarə və müəssisələrin direktorları bu halla mübarizəyə cəlb edilməlidirlər. “Vətəndaşların bu davranışlarını görüb təəccüblənirəm ki, onlar nə üçün məsuliyyətsizliyə yol verirlər. Baxıram ki, müsəlman cəmiyyəti qanunu pozmağa bir qədər meyllidir. Nə qədər ki, qanunun və hüququn aliliyini dərk edə, onun mahiyyətini özümüz üçün əsas olaraq qəbul edə bilmiriksə, bu belə də davam edəcək. İndiki halda, pandemiya ilə bağlı mövcud olan bu ağır rejimdə vətəndaşlar qayda-qanunlara əməl etmirlərsə, qanunun qarşısında farağat dayanmırlarsa və bunu bilərəkdən edirlərsə, burada cəzanın sərtləşdirilməsi də kömək etməyəcək. Yenə nəyin bahasına olursa-olsun, o insanlar bayıra çıxacaqlar, qanunu pozacaqlar. KİV-də, xüsusən də televiziyada bu istiqamətdə işlər görülməlidir. Yəni sərt karantin rejiminin qaydalarını pozan insanların şəxsiyyəti, ad-soyadı, ev ünvanı telekanalda işıqlandırılmalıdır. Biz indi də bu metoddan istifadə edə bilərik. Bu metod bəlkə də qanunları pozmağı adətə çevirmiş vətəndaşları islah edə biləcək. İndiki halda bu vacib metoddan istifadə etməliyik. Cinayət Məcəlləsinə əlavənin edilməsinin, İnzibati Xətalar Məcəlləsinə xüsusi maddələrin daxil edilməsinin artıq tərəfdarı deyiləm. Çünki, bir növ, karantin rejimini pozduğuna görə insanların 100 manat məbləğində cərimələnməsi, onların bu cərimələri ödəyə bilməməsi bir az da insanları hiddətləndirir, onları qəlibdən kənara çıxarır. Amma biz düşünəndə ki, onlar da dövlətin vətəndaşlarıdır, onlara qarşı dövlətin adından hər hansı sərt tədbirə yol vermək olmaz. Ona görə də burada başqa vasitələrdən istifadə etməliyik. Hər bir idarə, müəssisə rəhbəri öz işçilərini maarifləndirməli, yeri gələndə islah etməlidir. Hər birimizin vəzifəsi insanları inandırmaq, onları maarifləndirmək, qaydaları pozmamaları üçün işlər görməkdir. Məsələn, hər bir idarə-müəssisə rəhbəri rəhbərlik etdiyi kollektivin üzvlərinin davranışlarına görə məsuliyyət daşımalıdır. Eyni zamanda, ailə başçıları da bu işdə yaxından iştirak etməlidirlər. Təəssüf ki, bizdə kollektiv, ailə və fərdi məsuliyyət yoxdur. Bunlar fəqrli şeydir. Araşdırmaq lazımdır ki, sərt karantin rejimini pozduğuna görə cərimə edilən vətəndaşlar hansı müəssisənin işçiləridir? Həmin qurumlara da sorğu göndərmək lazımdır ki, sizin idarədə işləyən işçilər pandemiya dövründə sərt karantin rejimini pozub, bununla bağlı tədbir görün. Bu məsələyə yanaşma kompleks şəkildə olmaldır. Hər birimiz bunu bir konstitusion borc kimi çiynimizə götürməliyik. Bu yoxdursa, insanlar yenə də qanunları pozacaqlar”.
Vətəndaşların qanunsuz olaraq torpaq yollarla rayonlara getməsinin birbaşa qanunlarımıza hörmətsizlik olduğunu deyən Ş.Əliyev hesab edir ki, bu, xuliqanlıqdan betər bir haldır. “Sərt karantin rejimini pozan insanların çoxu hansısa müəssisələrdə, ticarət mərkəzlərində və s. işləyən adamlardır. Ona görə də hesab edirəm ki, kollektiv rəhbərləri özləri də bu məsələyə ciddi yanaşmalı, öz işçilərini dövlətin qanunların hörmət etməyə çağırmalıdırlar. Bu gün sərt karantin rejimində bütün işləri polis həyata keçirir, amma bu işdə bələdiyyələr, icra hakimiyyəti orqanları, idarə və müəssisə rəhbərləri də birmənalı şəkildə polisə yardım etməlidirlər. Düşünürəm ki, burada ailənin, kollektivlərin çox böyük rolu var. Həmçinin də burada bələdiyyələr, icra hakimiyyəti orqanları, sahibkarlar, idarə və müəssisə rəhbərləri bu sahədə fəaliyyət göstərməlidirlər. Hər bir qurum rəhbəri tabeliyində olan işçiləri qaydaları pozmaqdan çəkindirməlidir” - deyə Ş.Əliyev vurğuladı.
İradə SARIYEVA
