Hazırda koronavirus pandemiyası dünyanı lərzəyə gətirib. Bütün dünya ölkələri bu virusun narahatlığını yaşayır. Gündə minlərlə insan bu virusa yoluxur və ya həyatını itirir. Bu gözlənilməz və xoşagəlməz proseslər Azərbaycanda da baş verir. Lakin hələ də Azərbaycanda koronavirusa inanmayanlar var. Bəziləri sosial məsuliyyətsizlik göstərərək qaydalara riayət etmirlər. Hansı ki, bu məsələ dövlət başçısı səviyyəsində diqqətə götürülüb və cəmiyyətə dəfələrlə çağırış edilib.
Prezident İlham Əliyev son çıxışlarında bir daha qeyd edib ki, koronavirus yoxa çıxmayıb: "İndi bütün ölkələrdə yumşaldıcı addımlar atılır, o cümlədən, Azərbaycanda. Buna baxmayaraq, mən onu da demişdim ki, əgər görsək xəstələrin sayı kəskin artır, yenə də məhdudlaşdıracağıq. Bu məhdudlaşdırıcı addımların səbəbi də bəllidir. Bəzi insanlar məsuliyyətsizlik göstərirlər. Ancaq, bütövlükdə, deyə bilərəm ki, Azərbaycan cəmiyyəti çox böyük məsuliyyət, nizam-intizam göstərir. Şənbə-bazar günlərində xüsusi karantin rejimi bunu göstərdi, qayda pozuntuları çox cüzi sayda olmuşdur. Bu onu göstərir ki, vətəndaşlar məsuliyyəti dərk edirlər. Ancaq hər bir vətəndaş bunu dərk etməlidir. Çünki bir məsuliyyətsiz vətəndaş yüz nəfəri yoluxdura bilir, onların və özünün həyatını risq altına ata bilir”.
Qeyd etdiyimiz kimi, hələ də koronavirusun varlığına inanmayanlar var. Onlar bu xəstəliyi inkar etməklə yanaşı, ətrafında olan insanları da virusun var olmamasına inandırmağa çalışırlar. Nəticədə isə yoluxma sayı sürətlə artır.
Koronavirusa inanmayanların cəzalandırılması, xəstəliyi lağ predmetinə çevirənlərin ictimai işlərə cəlb olunması təklif edilib. Belə ki, COVID-19-un mövcudluğuna inanmayanların pandemiya xəstəxanalarında ictimai işə cəlb olunması təşəbbüsü irəli sürülüb.
“Xalqın taleyi üçün hər hansı bir məsələdə maarifləndirmə effekt vermirsə, orada inzibati metodlara keçmək lazımdır”
Sosioloq-şair Əhməd Qəşəmoğlu bildirdi ki, koronavirusa inanmayanlarla çox ciddi mübarizə aparmaq lazımdır: “İnsanlar maska taxmağı özlərinə sığışdırmırlar. Bu günlərdə getdiyim yolda qarşıma çıxan adamlardan cəmi 7-nin maskası vardı ki, onlardan da 3-4-ü onu çənəsinə salmışdı. Hamı da mənə maska taxdığıma görə kənardan qəribə baxırdı. Bu ciddi bəladır. Burada bir neçə faktor əsas rol oynayır. Bizim əhalinin inanmaqla bağlı problemləri var. Birincisi, etinasızdırlar ki, bu da yaxşı əlamət deyil. İkincisi, kafe və şadlıq saraylarının sahibləri, şou-biznes nümayəndələri, mollalar dəridən-qabıqdan çıxırlar ki, camaat arasında koronavirusun olmaması ilə bağlı fikir yaratsınlar. Digər tərəfdən, bu cür vəziyyətin yaranması düşmənlər üçün də arzuolunandır. Onlar istəyirlər ki, xəstəlik çox yayılsın. Gündəlik statistika da göstərir ki, yoluxanların sayı xeyli artıb. Bir vaxtlar gündə 20-25 xəstə aşkar olunurdusa, indi bu rəqəmlər 10 dəfə artıb. Bütün bunlar ona görədir ki, bizim əhalini, kobud da desək, bir az tərbiyələndirmək lazımdır. Bizim xalq gözəl xalqdır. Yəni xalqla əhalini qarışdırmayaq. 50-60 yaşında adam, ya elə cavan nəsil görürsən ki, sağa-sola tüpürə-tüpürə gəzir. Yaxud da asqıranda-öskürəndə ağzını bağlamayan kim, qucaqlaşıb öpüşən kim. Onlardan soruşuram ki, bəs koronavirusdan qorxmursunuz? Mənə təəccüblə baxıb deyirlər ki, ağsaqqal, sən bilməzsən, bunlar oyundur. Haradan bildiklərini soruşanda da başlayırlar ki, biz bilirik. Elə bilirlər ki, mənim bu olanlardan xəbərim yoxdur. Yəni camaat arasında ictimai rəyi “yanlış” fomalaşdıran və buna maraqlı qüvvələr var. Bəzi insanların özü bu barədə gerizəkalılıq edirlər. Xalqın taleyi üçün hər hansı bir məsələdə maarifləndirmə effekt vermirsə, orada inzibati metodlara keçmək lazımdır. Cərimə və ya hansısa cəza tətbiq edilməlidir. Başqa yolu yoxdur. Adama deyirsən ki, bu sənin ziyanınadır, etmə, başlayırlar səni lağa qoymağa. Yəni ciddi mənada tədbir görmək lazımdır. Bura İran deyil ki, küçədə şallaqlayaq, amma yolunu tapmaq lazımdır”.
Günel CƏLİLOVA
