Məlum olduğu kimi, son iki həftənin şənbə və bazar günləri, paytaxt Bakı da daxil olmaqla, ölkənin bir neçə şəhərində sərt karantin qaydaları tətbiq olunub. Konkret olaraq, həmin şəhərlərdə əhalinin evdən çıxmağı qadağan olunub.
Ancaq ölkənin paytaxta yaxın olan bəzi səfalı rayonlarında karantin tətbiq edilməyib. Bu da bəzi vətəndaşların sui-istifadə hallarına yol açıb. Sosial şəbəkələrdə yayılan videolardan görünür ki, 5-ci gündən balayaraq rayonlara gedən yollarda uzun tıxaclar yaranır. Eyni halı biz karantinin ləğv edildiyi gün paytaxta girişdə də görürük. Mütəxəssislər deyir ki, karantin zonası elan olunan Bakıdan əhalinin digər rayonlara kütləvi axını vəziyyəti daha da pisləşdirə, yoluxma hallarını artıra bilər. Bəs vəziyyətdən çıxış yolu nədədir? Bunun qarşısını almaq üçün həftəsonu bütün ölkəboyu karantin elan edilə və ya paytaxt qeydiyyatında olan vətəndaların rayonlara buraxılmasını qadağan etmək olarmı?
Koronavirus pandemiyası ilə bağlı ciddi aradırmalar aparan “Resurs” Analitik İnformasiya Mərkəzinin rəhbəri Rasim Quliyev “Bakı-Xəbər”ə açıqlamasında bildirdi ki, bu məsələ onun özünü də dərindən düşündürür:“Bunun qarısını almağın iki metodu var. Ya sırf inzibati, ya da insanların özü məsələyə şüurlu şəkildə yanaşıb, qanun-qaydaya əməl etməlidir. Düzünü deyim ki, mən xalqımıza onlarla sırf inzibati metodların tətbiqi kimi rəftarın olunmasının tərəfdarı deyiləm. Bütün ölkə boyu sərt karantinin tətbiqi isə əlavə problemlərə də səbəb ola bilər. Hazırda rayonların çoxunda mövsumi kənd təssərüfatı işlərinin ən qızğın zamanıdır. İnsanlar qidalanmalıdır, yemək yeməlidir. Kəndçi öz mal-qarasını saxlamaq üçün qış azuqəsini yığmalıdır. Torpaq əkilməlidir ki, kənd təsərrüfatı inkişaf etsin. Bu baxımdan da ehtiyac olmayan rayonlara belə qadağanın tətbiqinin tərəfdarı deyiləm. Düşünürəm ki, insanlar arasında lazımi maarifləndirmə işləri aparsaq irəliləyiş əldə edə bilərik. Vətəndaşların şüurlu yanaşması ilə problemin öhdəsindən gələ bilərik. Biz qoruyucu maskanı insanlara zorla geyindirirksə, deməli, insanlar canının qədrini bilmək istəmir. Epidemioloji vəiyyətin idarə olunmasında lokallaşma üsulundan istifadə oluna bilər. Qaynar ocaqların neytrallaşdırılması istiqamətində müəyyən işlər görülə bilər. Ancaq yenə deyirəm, bunu elə şəkildə etməliyik ki, kənd təsərrüfatına ziyan dəyməsin. Vətəndaşlarımız real vəziyyəti düzgün qiymətləndirməlidir. İki günlük istirahətə görə özlərinin və başqa insanların həyatını təhlükəyə atmamalıdır. Biz yazma-oxuma bilməyən ölkə deyilik. Bütün vətəndaşlarımızdan şüurlu davranış tələb olunmalıdır. Dünyanın bütün ölkələrində iknici dalğa gəlir. Biz bunu ölənlərin və yoluxanların sayındakı artımda görürük. Problem burdadır ki, bizim vətəndaşlarımızda qanunlara yanaşmada bir qədər səhlənkarlıq var. Vətənimizi, özümüzü bələdan qorumaq üçün dövlətin müəyyən etdiyi qaydalara maksimum əməl etməliyik”.
Məhəmmədəli QƏRİBLİ
