“Azərbaycan Respublikasının ərazisində hava-damcı yolu ilə keçən yoluxucu xəstəliklər zamanı karantin nəzarətinə götürülmə Qaydaları”nda dəyişiklik edilib. Bununla bağlı Baş nazir Əli Əsədov qərar imzalayıb. Qərara əsasən, karantin rejimini pozan şəxslər İnzibati Xətalar və Cinayət məcəllələrində nəzərdə tutulmuş qaydada məsuliyyət daşıyacaq. Qeyd edək ki, bunadək karantin rejimini pozan şəxslər İnzibati Xətalar Məcəlləsində nəzərdə tutulmuş qaydada məsuliyyətə cəlb olunurdular.
Bu yöndə olan cəzaların sərtləşməsi hansı zərurətdən irəli gəlib və hansı effektə malik ola bilər?
Azərbaycan Vəkillər Kollegiyasının üzvü, hüquqşunas Mehman Muradlı “Bakı-Xəbər”ə açıqlamasında bildirdi ki, bu addımın atılması zərurətdən irəli gəlib:“Təəssüflər olsun ki, koronavirus adlı bəla hələ də davam etməkdə, iqtisadiyyatları çökdürtməkdə, insan həyatlarını məhv etməkdədir. Hələ də bu bəla ilə bağlı dünyada, bir çox ölkələrdə müxtəlif yönümdə facilələr yaşanmaqdadır. Çox təəssüflər olsun ki, biz də dünyanın bir parçası olaraq, bu bəladan, bu virusdan yan keçə, ötüşə bilmədik. Amma üstünlüyümüz ondadır ki, biz bu bəlanın ciddiliyini, nələrə qadir ola biləcəyini vaxtında, zamanında anladıq və qəbul etdik. Xüsusilə də Prezident İlham Əliyev bu məsələdə ilk gündən, ilk andan öz qətiyyətini, iradəsini, cəsarətini ortaya qoydu. Gündəmimizin əsas mövzusu olan koronavirus epidemiyası ilə bağlı təhlükə qanunlara yeni dəyişikliklər zərurəti yaratdı. Bu infeksiya yeni qaydaların tətbiqinə səbəb oldu. Azərbaycan hökuməti də təhlükənin miqyasını azaltmaq üçün dərhal Nazirlər Kabineti yanında Operativ Qərargah yaratdı və vəziyyətin təhlilindən sonra bəzi qaydaların tətbiqi barədə qərar qəbul edildi.
“Sanitariya-epidemioloji salamatlıq” haqqında Qanuna görə, ali dövlət hakimiyyəti və idarəetmə orqanlarının əhali arasında yoluxucu və qeyri-yoluxucu kütləvi xəstəliklərin, zəhərlənmələrin yayılmasının qarşısını almağa və ləğv edilməsinə yönəldilmiş xüsusi təhsil, hərəkət, daşıma və əmək rejimi şərtlərinin qoyulması və ləğv edilməsi səlahiyyəti var.
Həmin qanuna görə, yoluxucu, parazitar, kütləvi qeyri-yoluxucu xəstəliklərin əmələ gəlməsi, yaxud yayılması təhlükəsi yarananda hökumət ölkə ərazisində xüsusi əmək, təhsil, hərəkət, daşıma şəraiti və rejimləri tətbiq edir, həmçinin, belə xəstəliklərin əmələ gəlməsinin, yayılmasının qarşısını almağa və onları ləğv etməyə yönəldilən zərərsizləşdirmə, dezinfeksiya, , deratizasiya və dezaktivasiya işləri görür. Bu baxımdan da, bəzi cəzaların sərtləməsi tam qanunidir və real zərurətdən irəli gəlir. Virusun qarısının alınması istiqamətində dövlət əlindən gələn nə varsa edir. Amma bu kifayət deyil. Bunun üçün vətəndaşların da məsuliyyətli olması lazımdır. Təəssüflər olsun ki, bir çox vətəndaşlara maarifləndirmə və inzibati cəzalar təsir etmir. Bu baxımdan da, bilərəkdən qaydanı pozub başqalarının sağlamlığı üçün təhlükə yaradanlarla bağlı daha ciddi tədbirlərin görülməsi doğru addımdır. Hesab edirəm ki, cinayət məsuliyyətinə cəlb edilmə qorxusu bir çox məsuliyyətsiz insanları ölçülü-biçili davranmağa vadar edəcək”.
Məhəmmədəli QƏRİBLİ
