İyunun 9-da Prezident İlham Əliyevin iştirakı ilə üç modul tipli xəstəxananın açılışında ölkə başçısı bir sıra məsələlərlə yanaşı, koronavirusa yoluxan bütün xəstələrin xəstəxanalarda müalicə olunduğunu vurğulayıb: “...Onu da bildirməliyəm, Azərbaycan dünya miqyasında nadir ölkələrdəndir ki, koronavirusa yoluxan bütün xəstələr tibbi müəssisələrdə müalicə alır. Dünya praktikası tam başqadır. Bir çox ölkələrdə xəstəliyi simptomsuz keçirənlər, xəstəliyə düçar olmuş insanlar ev şəraitində müalicə alırlar, onları heç xəstəxanalara da qəbul etmirlər. Əlbəttə ki, bu, onların sağlamlığına təhlükə yaradır. Azərbaycanda koronavirusdan ölənlərin sayının az olmasının səbəblərindən biri də məhz odur ki, yoluxmuş bütün xəstələr tibbi müəssisələrə qəbul edilir və onlara lazımi xidmət göstərilir”.
Qeyd edək ki, Azərbaycandan fərqli olaraq, hətta özünü ən inkişaf etmiş dövlətlər sayan ölkələrdə koronavirusa yoluxan xəstələrin tibb müəssisələrində yerləşdirilməsi ilə bağlı ciddi problemlər var, bir çox xəstə xəstəxanaların dəhlizlərində, parklardakı səyyar çadırlarda yerləşdirilib, hətta bir qisim xəstə isə müalicə olunmadan evə göndərilir.
“...hazırda bizə Azərbaycanda virusa yoluxanları tam şəkildə stasionar müalicəyə cəlb etmək imkanı verdi”
Azərbaycanda koronavirusa yoluxan bütün xəstələrin yalnız xüsusi tibb müəssisələrində müalicə almasının səbəblərini şərh edən K.Fərəcova adına Elmi-Tədqiqat Pediatriya İnstitutunun direktoru, tibb elmləri doktoru, professor Nəsib Quliyev “Bakı-Xəbər”ə bildirdi ki, Azərbaycanda koronavirusa yoluxan xəstələrin xəstəxanalarda stasionar müalicəyə cəlb olunması təsadüfi deyil. “Bunun üçün şərait 2003-2005-ci illərdə yaradılmağa başlanıb. Həmin illərdən başlayaraq keçən ilə qədər ölkəmizdə 750 tibb müəssisəsinin ya yenisi tikilib, ya da tam bərpa edilərək avadanlıqlarla təchiz olunub. Əgər keçən ilə qədər bu işlər görülməsəydi, görün, biz necə ağır vəziyyətə düşərdik. Bugünki vəziyyət, ilk növbədə, cənab Prezidentin fəaliyyətinin ilk illərindən başlayaraq sosial sahədə, xüsusən də səhiyyə və təhsil sahəsində islahatların aparılmasının nəticəsidir. Dünyada elə bir ölkə tapa bilməzsiniz ki, 15 ilə 750 tibb müəssisəsi yaratsın. Onu mən ilin həftələrinə böldükdə hər həftəyə bir tibb müəssisəsi düşür. Bir ildə təxminən 50 həftə var. Yəni bu o zamanlar çox böyük sürətlə görülən işlərin nəticəsidir ki, hazırda bizə Azərbaycanda virusa yoluxanları tam şəkildə stasionar müalicəyə cəlb etmək imkanı verdi. Siz fikir verin, bu KİV-də də göründü, Avropanın Fransa, İtaliya, İngiltərə və digər inkişaf etmiş ölkələrində virusa yoluxan xəstələri dəhlizlərə, hətta yerə, parklara qoyublar. Bu ona görə onlarda belə oldu ki, zamanında səhiyyələrində müvafiq islahatlar aparmamışdılar, belə qorxulu hadisələrə hazır deyildilər. Amma Azərbaycanda bu hazırlıq işləri görüldüyü üçün, hazırda biz belə çətin vəziyyətdən üzüağ çıxmışıq və göstəricilərimiz də dünyanın inkişaf etmiş ölkələrindən qat-qat yaxşıdır. Avropada ölkələr var ki, onların əhalisi təxminən bizim ölkənin əhalisi qədərdir. Amma onlarda ölüm minlərlə ölçülür, bizdə heç 100-ə də çatmayıb. Görün, nə qədər fərq var. Bunlar hamısı Azərbaycan dövlətinin sosialyönümlü siyasətinin uğurlu nəticələridir ki, biz bilavasitə praktikada bunu görürük. Yadımdadır, 2003-cü ilin noyabrında cənab Prezident fəaliyyətə başladığı ilk ayda geniş Dövlət Proqramı qəbul olundu. Bu, Azərbaycan Respublikasında Sosial-iqtisadi inkişafın sürətləndirilməsi tədbirləri haqqında Dövlət Proqramı idi. Bu görülən işlərin məntiqi və qanunauyğun nəticələridir ki, bu gün biz çətin vəziyyətdən dünyanın çox ölkəsindən daha yüksək səviyyədə, daha uğurla çıxa bilirik. Hər kəsin gözünün qarşısındadır. Qisa müddətdə COVID-19-la bağlı modul tipli xəstəxanalar tikilib”.
N.Quliyev təəssüflə qeyd etdi ki, düzdür, karantin rejimi yumşaldıqdan sonra əhalinin müəyyən bir qismi karantin tədbirlərinə, sosial izolyasiya, sosial məsafə məsələsinə əməl etmir. “Bunlara doğru-düzgün riayət edilmədiyinə görə xəstələrin sayı artıb və məcburiyyət qarşısında karantin rejimi bir az sərtləşdirilməyə doğru gedir. Amma insanlar da deyilən qaydalara əməl etsələr, maska taxsalar, sosial məsafə saxlasalar, əllərini yusalar, bütün gigiyenik tələblərə əməl etsələr, təbii ki, yoluxma sürətlə azalacaq. Açığını desək, bu gün daha çox məsuliyyət vətəndaşlarımızın üzərinə düşür ki, hər kəs bu işə özünün gücü çatan mümkün olan dəstəyi versin. Vətəndaşlarımız öz sağlamlığının xatirinə, xalqımızın adına layiq bu işləri görməlidir. Bu gün dünyada koronavirus pandemiyası ilə mübarizə ilə bağlı, obrazlı desək, bir yarış gedir. Yəni hansı xalq daha intizamlıdır, hansı dövlət bu problemin qarşısını almaqda daha güclüdür, harada aparılan tədbirlər daha effektivdir? Yəni biz də vətəndaş, əhali və xalq olaraq gərək dünyaya sübut edək ki, biz bu işlərdə də hamıdan yaxşı təşkilatlanmışıq. Amma təəssüf ki, aramızda bəzi məsuliyyətsiz adamlar var. KİV və mütəxəssislər də bu insanları çalışıb başa salmalıdır ki, bəli, dövlət bu qədər iş görür, beynəlxalq təşkilatlar qarşısında bizim üzümüzü ağ edir, biz də üzümüzü ağ edək. Bizdən asılı olanı da gərək biz edək ki, dövlətimizin işi daha da yaxşı olsun, ölkəmizin adı dünyaya yayılsın” - deyə N.Quliyev vurğuladı.
İradə SARIYEVA
