Prezident İlham Əliyev Ali Məhkəməyə bir neçə hakim təyin edilməsi barədə Milli Məclisə təqdimat göndərib. Milli Məclisin Hüquq siyasəti və dövlət quruculuğu komitəsinin iclasında “Azərbaycan Respublikası Ali Məhkəməsi hakimlərinin təyin edilməsi haqqında” məsələyə baxılması gözlənilir.
Komitə iclasında, həmçinin, Bakı Apelyasiya Məhkəməsinin hakimləri İsmayıl Xəlilov, Vüqar Həsənov, Zaur Əliyev, Abidin Hüseynovun, Sumqayıt Apellyasiya Məhkəməsinin hakimi Aqil Abbasov, hakimlər Çingiz Əsgərov, Bəhram Məmmədli, Bəhman Qəribovun, Gəncə Apellyasiya Məhkəməsinin hakimi İspəndiyar Şəfiyevin Ali Məhkəmənin hakimi təyin edilməsi haqqında məsələ müzakirəyə çıxarılacaq. Xüsusilə də yuxarı instansiya məhkəmələrinin hakimlərinin dəyişdirilməsi istiqamətində atılan addımlar ölkədə aparılan islahatların məhkəmə-hüquq sahəsini də əhatə etdiyinin göstəricisi sayıla bilərmi?
Görünən budur ki, ölkə başçısının yeni dönəm prezidentliyinə başlayarkən verdiyi islahatlar vədi uğurla həyata keçirilir. Bu struktur və kadr islahatları, demək olar ki, bütün sahələri əhatə edir. Belə islahatların məhkəmə-hüquq sahəsində aparılmasının zərurəti barədə ölkə başçısı tərəfindən də dəfələrlə fikirlər bildirilib. Prezident İlham Əliyev mədəniyyət və incəsənət xadimlərinin bir qrupu ilə görüşdə məhkəmə-hüquq sahəsində islahatlara çox ciddi ehtiyac olduğunu demişdi. Məhkəmə-hüquq sistemi üzrə təhlilçilər hesab edir ki, islahatlar hakimlərin müstəqilliyi, peşəkar təlimlər, maaş artımı, ittiham sistemi, prokurorluq-hakim münasibətləri sahələrində olmalıdır. Görünən budur ki, məhkəmə-hüquq islahatları da kompleks anlayışdır. Bu səbəbdən də islahatların effektiv aparılmasının yolları həm qanunvericilik bazasının yenidən formalaşması, həm də yeni hakim korpusunun formalaşmasından keçir. Yüksək məhkəmə instansiyalarına reallaşan hakim təqdimatları artıq islahat prosesinin sürətlə getdiyini şərtləndirir. Məlumdur ki, Azərbaycanda çoxpilləli məhkəmə ierarxiyası mövcuddur. Bu baxımdan da, yüksək məhkəmə insatnsiyalarında daha təcrübəli, qərəzdən uzaq olan hakimlərin təmsilçiliyi zəruridir ki, onlar aşağılarda buraxılan hakim səhvlərini düzəldə bilsinlər. Bunun da nəticəsində hüququn aliliyi təmin edilmiş olur. Bir neçə gün əvvəl Milli Məclisin Hüquq siyasəti və dövlət quruculuğu komitəsinin iclasında Prezidentin qanunvericilik təşəbbüsü ilə Milli Məclisə təqdim olunmuş Cinayət və İnzibati Xətalar məcəllələrinə təklif olunan dəyişikliklərlə bağlı ictimai müzakirələr keçirilib. Qeyd edilib ki, bu dəyişikliklər “Məhkəmə-hüquq sistemində islahatların dərinləşdirilməsi haqqında” Azərbaycan Prezidentinin 3 aprel 2019-cu il tarixli Fərmanının icrası ilə əlaqədardır, ölkəmizdə cəza siyasətinin humanistləşdirilməsi və cinayətlərin dekriminallaşdırılması üzrə tədbirləri davam etdirmək məqsədilə hazırlanıb. Dəyişikliklər birinci və ikinci oxunuşda Milli Məclisin iclasında ətraflı müzakirə olunub, deputatlar dəyişikliklərin mahiyyəti barədə fikirlərini bildiriblər. Artıq Cinayət və İnzibati Xətalar məcəllələrinə dəyişiklik edilməsi haqqında qanun layihələri ilə bağlı ictimai müzakirələrin başa çatdığı bildirilir. Görülən bu kompleks tədbirlər, qəbul edilən qərarlar ölkəmizdəki islahatların məhkəmə-hüquq sistemində də inamla aparıldığına dəlalət edir. Yeni hakimlərlə bağlı aparılan müzakirələrdən görünür ki, onları gənclərdən ibarət hakim korpusunun təmsilçiləri sayırlar və təqdim olunanlar müsbət reputasiyalı hüquqşunaslar kimi xarakterizə olunur.
Məhəmmədəli QƏRİBLİ
