Azərbaycanın baş infeksionisti Cəlal İsayev bildirib ki, hazırda Azərbaycanda xəstəxanalarda 500-dək insan koronavirusa görə müalicə edilir.
Onun sözlərinə görə, karantin rejimi bitdikdən sonra da insanlar müəyyən tələblərə əməl etməli, tövsiyələri nəzərə almalıdır:“Gün ərzində təxminən 30-40 nəfər sağalaraq evə buraxılır. Amma hələ də ölkədə hər gün yoluxma halı qeydə alınır. Biz yalnız yeni yoluxma qeydə alınmadıqda, xəstəxanalarda müalicə edilən insanların sayı azaldıqda virusun ölkəmizdə yox ola bilməsi haqqında danışa bilərik. Amma ölkədə hətta 1-2 nəfərdə belə koronavirusa yoluxma halı varsa, sadaladığım şəxslər risq qrupuna daxil olan insanlar sayılacaqlar". C.İsayev bunu nəzərə alaraq, insanlara xəbərdarlıq edib ki, mayın 4-də karantin rejimindən çıxılsa belə, insanlar müəyyən tələblərə əməl etməli, tövsiyələri nəzərə almalıdır:“Bu tövsiyələrin bir qismi, məsələn, əllərin yuyulması, şəxsi gigiyena qaydalarına əməl edilmə, kütləvi yerlərdən uzaq olmaq bizim gündəlik həyatımızla bağlıdır. İnsanların çox olduğu yerlərdə yalnız koronavirusa deyil, hər cür infeksiyaya yoluxmaq mümkündür. Ona görə də həmişə qaydalara riayət etməliyik ki, təkcə koronavirusa deyil, digər infeksiyalara da yoluxmayaq”. Bu səbəbdən də bir sıra ekspertlər tövsiyə edirlər ki, karantinin bitəcəyi ilə bağlı veriləcək qərar vətəndaşları arxayın etməməlidir. Tibbi təcrübəyə əsaslanaraq söylənilir ki, istənilən ehtiyatsızılıq bizi virusun yayılmasının “ikinci dalğası” ilə üz-üzə qoya bilər.
Həkim, tibb üzrə fəlsəfə doktoru Leyla İbrahimli “Bakı-Xəbər”ə açıqlamasında bildirdi ki, Nazirlər Kabinetinin qərarına əsasən, aprelin 27-dən etibarən xüsusi karantin rejiminin məhdudiyyətlərinin bir qismi yumşaldılıb:“Nəticədə bir çox sahələrdə çalışan insanlar öz fəaliyyətlərini bərpa ediblər. Belə olan halda virusun yayılma ehtimalı da artır. Artıq həyat əvvəlki axarına qayıdır. Amma bu bizi tam arxayınlaşdırmamalıdır. Koronavirusun hər an başımızın üstünü ala biləcəyini göz önünə gətirməliyik. Karantin rejimindəki məhdudiyyətlərin bəzisi aradan qaldırıldığı üçün əhali arasında virusa yoluxmada artım ola və prosesin ikinci dalğası başlaya bilər. Mayın 4-də isə karatinin uzadılmasının zamanı bitir. Bununla bağlı hansı qərarın veriləcəyini deyə bilmərik. Ancaq istənilən yumşalma yenə olsa belə, biz ehtiyatımızı əldən verməməliyik. Karantin rejiminin yumşaldılması o demək deyil ki, problem tam aradan qalxıb. Gigyenik, sosial məsafə və s. istiqamətində olan qaydalara mümkün olduğu qədər çox əməl etməliyik. Çünki yalnız bunlara əməl etməməklə pandemiya təhlükəsini artırmış olarıq. Yumşaldılma qərarı verən bəzi ölkələrin təcrübəsi göstərdi ki, yoluxma birdən-birə artım göstərib. Vəziyyət az qala yumşaldılmadan əvvəlki dönəmdə olduğundan daha təhlükəli olub. Ona görə də bu acı təcrübələrdən nəticə çıxararaq diqqətli olmaq, virusun yayılmasına səbəb ola biləcək addımlardan çəkinmək lazımdır. Beləliklə biz yoluxmanı önləyər, karantin rejiminin bütövlükdə aradan qalxmasına, ölkəmizin, cəmiyyətimizin həyatının əvvəlki axara qayıtmasına səbəb ola bilərik. Əgər özümüzü qorumasaq və maarifləndirici tədbirlərə ara versək, yenidən təhlükə ilə üz-üzə qala bilərik”.
Məhəmmədəli QƏRİBLİ
