Dünyada koronavirus pandemiyasının yayılması ilə əlaqədar bir sıra ölkələrdə, o cümlədən, Azərbaycanda da karantin rejimi tətbiq olunub. Nəticədə insanlar evdə qalmağa məhkum olublar. Bu isə əksər insanlarda bir sıra psixi pozuntuların yaranmasına, depressiyaya düşmələrinə səbəb olur.
Elə bu məqsədlə aprelin 6-dan etibarən Təhsil Nazirliyinin yeni 146-3 “qaynar xətt” xidməti fəaliyyətə başlayıb. Belə ki, koronavirus infeksiyası ilə əlaqədar ölkəmizdə karantin rejimi elan olunduğuna görə evdə qalan şagirdlər, eləcə də bütün vətəndaşlar mənəvi-psixoloji dəstəyə ehtiyac duyduqları hallarda sözügedən “qaynar xətt” xidmətindən yararlana biləcəklər. Həftəiçi hər gün saat 10:00-dan 18:00-dək “qaynar xətt” xidməti ilə əlaqə yaradan hər bir vətəndaşa məktəb psixoloqları tərəfindən telefon vasitəsilə psixoloji konsultasiya təşkil ediləcək, onlar lazımi dəstəklə təmin olunacaqlar.
Məlumat üçün bildirək ki, bu günə kimi 146-3 “qaynar xətt"inə 700 mindən artıq müraciət daxil olub.
Təhsil naziri Ceyhun Bayramov Nazirlər Kabineti yanında Operativ Qərargahın brifinqində çıxışı zamanı bildirib ki, psixoloji xidmət üçün müraciət edən şəxslərə lazımi köməklik göstərilib.
Karantin dönəmində insanlara göstərilən psixoloji yardımın əhəmiyyəti haqqında danışan psixoloq Könül İsmayılova qeyd etdi ki, məlum pandemiya səbəbindən bir çox sosial və məişət probleminin yaranması insanlarda psixoloji narahatlıq doğurur. Bunlara fobia, qorxu, həyəcan pozuntuları, ailədaxili konfliktlər, özünəqapanma, qidalanma pozuntuları, depressiya və emosional partlamalar daxildir: “Pandemiya ilə bağlı müxtəlif səbəblərdən sıxıntı keçirən insanların psixoloji yardıma müraciət etməsi və onlara lazımi dəstəyin göstərilməsi təqdirəlayiqdir”.
Həmsöhbətimiz bildirdi ki, karantin bitəndən sonra da insanlar bir-birinə həm fiziki, həm də psixoloji məsafəli olacaqlar: “İnsanlar qrup şəklində toplaşmaqdan çəkinəcəklər və münasibətlər soyuqlaşacaq. Bu, insanların əmək fəaliyyətinə də təsir edəcək. Elə insanlar var ki, istirahətdən sonra bütün gücünü işə verir, elə insanlar da var ki, artıq rahat rejimə öyrəşir”
Psixoloqun sözlərinə görə, adaptasiya prosesi şagird və tələbələr üçün daha stressli və çətin olacaq: “Həm təhsil, həm də iş mühitində adaptasiya prosesində axsaqlıqlar olacaq. İnsanlar bu xəstəliyə qarşı qorxu və həyəcanı aradan qaldırsalar, cəmiyyətə yenidən adaptasiya elə də çətin olmayacaq. Düşünürəm ki, bu müddət ərzində insanlar sahib olduqları işin də, təhsil müəssisəsinin də dəyərini bilməyə başladılar. Adaptasiya dövrü insana görə dəyişir. Əgər insanlar karantin rejiminə 1-2 həftəyə uyğunlaşdılarsa, karantindən sonrakı həyata da eyni müddət ərzində adaptasiya ola bilərlər. Amma dezadaptasiya bəzən 3 ayı keçir və insanda stress yaradır. Bu zaman psixoloji yardım almaq lazımdır. Normal olaraq insan maksimum 3 həftəyə yenidən əvvəlki həyatına uyğunlaşır”.
Günel CƏLİLOVA
