Dünən axşam saatlarında sosial şəbəkələrdə ajiotaja səbəb olan bəzi məlumatlar paylaşılmağa başlanıldı. Həmin məlumatlarda qeyd edilirdi ki, güya Bakıdakı yanacaqdoldurma məntəqələrində şəxsi avtomobillərə benzin və dizel satışı dayandırılacaq. Bu da əhalinin öz avtomobilləri ilə kütləvi şəkildə yanacaqdoldurma məntəqələrinə axışmasına səbəb oldu.
Ölkədə yanacağın satışı ilə məşğul olan SOCAR Petroleum QSC-nin mətbuat katibi Üzeyir Həbibbəyli bildirib ki, onlara məxsus yanacaqdoldurma məntəqələrində bütün yanacaq növlərinin satışı fasiləsiz davam etdirilir. O qeyd edib ki, hər bir istehlakçı əvvəlki qaydada istədiyi miqdarda yanacaq əldə edə bilər: “Ümumilikdə, Azərbaycan Respublikası Nazirlər Kabineti yanında Operativ Qərargahın verdiyi qərarlara əməl edirik və hazırda heç bir məhdudiyyət yoxdur”. Maraqlıdır, belə həssas məqamda bu cür dezinformasiyaları dövriyyəyə buraxmaq kimlərin marağında ola bilər və bununla bağlı hər hansı bir hüquqi məsuliyyət müəyyən edilirmi?
Azərbaycan Vəkillər Kollegiyasının üzvü, hüquqşunas Mehman Muradlı “Bakı-Xəbər”ə açıqlamasında bildirdi ki, belə dezinformasiyaların yayılması hüquqi məsuliyyət yaradır: “Bilirsiniz ki, pandemiyanın elan olunmasından sonra yeni parlamentdə Cinayət və İnzibati Xətalar məcəllələrinə dəyişikliklər olundu. Onların sırasında insanların sağlamlığı ilə bağlı informasiyalarla müəyyən manipulyasiyaların olunmasına görə məsuliyyətlər nəzərdə tutulduğuna dair yeni müddəlar da var. Hətta bəzi maddələr kriminallaşdırılıb. Yəni onlar üçün həbs qətiimkan tədbiri də nəzərdə tutulur. Operativ Qərargah fəaliyyətə başlayandan sonra biz pandemiya ilə bağlı yayılan etibarlı məlumatları onların yaydığını qəbul etməliyik. Bu günlər ərzində bir neçə şəxsin polis tərəfindən məhz dezinformasiya yaydıqlarına görə məsuliyyətə cəlb edildiyinin şahidi olmuşuq. Təəssüflər olsun ki, biz onların arasında xanımlara da rast gəlirik. Ola bilər ki, bəziləri belə məlumatları onun məsuliyyətini dərk etmədən paylaşır. Ancaq bunu bilə-bilə edənlər da var. Biz sosial şəbəkələrdə bu tendensiyanı müşahidə edirik. Xüsusilə də xaricdən idarə olunan səhifələr bu istiqamətdə fəallıq göstərirsə. Deməli, bu yöndə maraqlı qüvvələrin fəaliyyət göstərdiyini iddia edə bilərik. Buna görə də, vətəndaşlarımız yalnız rəsmi məlumatlara inanmalı, əsassız yerə təşvişə düşməməlidirlər”.
Məhəmmədəli QƏRİBLİ
