Bütün dünyada koronavirus epidemiyasının yayılması ilə bağlı müxtəlif sektorlar üzrə məhdudlaşdırıcı tədbirlər həyata keçirilir. Azərbaycanda da tətbiq edilən bu cür tədbirlərə misal olaraq ictimai iaşə obyektlərinin fəaliyyətlərinə vaxt məhdudiyyətlərinin tətbiq edilməsini, nəqliyyat sektorunda Bakı, Sumqayıt şəhərləri və Abşeron rayonuna giriş-çıxışın məhdudlaşdırılması, xarici ölkələrə biletlərin ləğv edilməsi, qonşu dövlətlərlə sərhədlərin müvəqqəti bağlanması və digər addımları misal göstərə bilərik.
Bütün bu proseslərin ölkə iqtisadiyyatına təsirsiz ötüşməyəcəyini iqtisadçılar danılmaz bir fakt kimi dəyərləndirir. Bəs görəsən, həyata keçirilən bu məhdudlaşdırıcı tədbirlərlə bağlı hökumət hansısa güzəştlərə getməyə və ya əhaliyyə hansısa formada maliyyə yardımları etməyə hazırlaşırmı?
Artıq sosial şəbəkələrdə bu yöndə müzakirələr artıb. Hətta əksər vətəndaşlar ediləcək maliyyə yardımının konkret məbləğini də bildirirlər. Ancaq Əmək və Əhalinin Sosial Müdafiəsi Nazirliyinin İctimaiyyətlə əlaqələr şöbəsinin rəhbəri Fazil Talıblı bu mövzu ilə bağlı tələsməməyi tövsiyə edir və bildirir ki, hökumət bu istiqamətdə müəyyən addımları atmağı düşünür:“Hörmətli jurnalistlər! Vətəndaşların sosial müdafiəsi ilə bağlı atılacaq addımlarla baglı bildirim ki, cənab Prezidentin Sərəncamı ilə yaradılmış məşğulluq və sosial məsələlər üzrə işçi qrup tərəfindən təkliflər hazırlanıb. Bu məsələlərə kompleks yanaşılacaq. Həm sahibkarların, həm də vətəndaşların məşğulluq məsələləri barədə təkliflər aidiyyəti üzrə təqdim olunub. Yaxın günlərdə bu barədə ətraflı məlumatlar veriləcək. Hazırda mətbuatda yazılan məlumatlar dezinformasiyadır, vətəndaşları çaşdırmaq məqsədi daşıyır”. Sosial məsələlər üzrə ekspert İlqar Hüseynli “Bakı-Xəbər”ə açıqlamasında bildirdi ki, mövqeyi hər zaman yardımın edilməsindən ibarət olub:“Biz daim istəmişik ki, aztəminatlı ailələrin sosial vəziyyətinin yaxşılaşmasına kömək edilsin. Bu sahədə ciddi nəzarət funksiyası həyata keçirilməlidir. Xüsusilə də statistika dəqiqləşdirilməlidir. Bu kateqoriyanın müəyyənləşməsi asan iş deyil, böyük konkretlik və şəffaflıq tələb edir. Koronavirusla bağlı yaranmış vəziyyət isə hökumətin təxrisalınmaz tədbirlər həyata keçirməsini tələb edir. Bilirsiniz ki, indiki vəziyyətdə əsasən günəmuzd çalışan şəxslərin vəziyyəti pisləşib. Sosial qayğıya ehtiyacı olanlar ciddi nəzarətdə saxlanılmalıdır. Burada ciddi bir problem yarana bilər. Sosial şəbəkələrdə də bu yöndə müzakirələr gedir. Hətta qeyd edilir ki, adambaşına bu məbləğ minimum əmək haqqı səviyyəsində, yəni 250 manat civarında verilə bilər. Əgər həmin məbləğ ölkə boyu bütün vətəndaşlara adambaşına veriləcəksə, bu düzgün olmaz. Ölkədə kifayət qədər vətəndaş var ki, onların bu 250 manata ehtiyacı yoxdur, əksinə, həmin kateqoriyanın başqalarına yardım göstərməsi gərəkdir. Bu üsul həm büdcəyə yük olar, həm də sosial ədaləti pozmuş olar. Bu, korrupsiya və yeyintiyə də yol aça bilər. Çünki bizim kifayət qədər vətəndaşımız var ki, burda qeydiyyatda olsalar da, Rusiya və ya Türkiyədə yaşayırlar. Həmin kateqoriyaya pulun necə çatdırılması problem yarada bilər. Ehtiyacı olmayan ailələrə çatacaq vəsaitlə bağlı da manipulyasiyalar edilə bilər. Hesab edirəm ki, bu qayğı yalnız günəmuzd çalışan və ağır sosial durumda olanları əhatə etməlidir. Hokumətin bu addımı atması zəruridir, ancaq son dərəcə dəqiqliklə həyata keçirilməlidir. Biz seçki prosesində gördük ki, Statisika Komitəsinin siyahısı ilə MSK-nın təqdim etdiyi siyahı arasında ciddi fərq yarandı. Məşğulluqla bağlı da bu yaşana bilər. Bunlar həllini taparsa, vətəndaşlara bu yardımın edilməsi zəruridir. Təsəvvür edin ki, evinə bir manat gəlir girməyən adam həm də evdə qalırsa, mütləq yardımla əhatə olunmalıdır”.
Məhəmmədəli QƏRİBLİ
