“Koronavirus xəstələri ən həssas təbəqədir, o xəstələrin müalicəsi, onlara lazımi tibbi xidmətin göstərilməsi ən ümdə məsələdir”
Koronavirus mövzusu dünyanın əsas gündəmi olaraq qalır. Bu epidemiya artıq dünyanın 187 ölkəsində aşkar olunub, təxminən 600 mindən çox əhali virusa yoluxub, 30 mindən çox adam vəfat edib. Adıçəkilən virus ölkəmizdə də yayılıb. Ancaq virusun sürətli yayılmasının qarşısını almaq üçün lazımi işlər görülür. Koronavirusdan əziyyət çəkən şəxslərə dövlət tərəfindən lazımi dəstək göstərilir. Virus daşıyıcıları Bakı və bölgələrdə olan bir neçə xəstəxanada yerləşdirilib. Onların qısa müddətdə sağalması üçün lazımi işlər görülür. Prezident İlham Əliyev martın 28-də Bakıda “Yeni klinika” tibb müəssisəsinin açılışında deyib ki, xəstəliyə tutulan insanlar ən həssas təbəqədir və onların müalicəsi, onlara lazımi tibbi xidmətin göstərilməsi ən vacib məsələdir: “Koronavirus xəstələrinin buraya yerləşdirilməsi ən düzgün qərardır:"Bu insanlar ən həssas təbəqədir və onların müalicəsi, onlara lazımi tibbi xidmətin göstərilməsi ən vacib məsələdir. Çünki siz həkimlər yaxşı bilirsiniz ki, hazırda hətta ən inkişaf etmiş ölkələr bu xəstəliklə mübarizədə böyük problemlər yaşayır və inkişaf etmiş ölkələrdə gündə minə yaxın insan vəfat edir. Əgər tibb sahəsi çox inkişaf etmiş ölkələrdə bu xəstəliklə bağlı belə böyük problemlər varsa, təsəvvür etmək çətin deyil ki, bizim üçün nə qədər böyük problem yarana bilər”. Ekspertlər də virus daşıyıcılarının həssas təbəqə olduğunu hesab edir. Qeyd edək ki, bu günə kimi heç bir ölkədə koronavirusdan əziyyət çəkənlərin həssas təbəqəyə aid olması ilə bağlı fikir bildirilməyib. Tibbi ekspert Rasif Bağırov qeyd etdi ki, ən həssas təbəqə olduğundan, o xəstələrin müalicəsi, onlara lazımi tibbi xidmətin göstərilməsi ən ümdə məsələdir:“Nəzərə almaq lazımdır ki, Azərbaycan həkimləri əsl peşəkarlıq, iradə nümayiş etdirir, bu çətin problemin öhdəsindən gəlmək üçün var qüvvələri ilə çalışır, öz bilik və təcrübələrini əsirgəmirlər”. Həmsöhbətimizin sözlərinə görə, koronavirusdan əziyyət çəkən şəxslərin qısa müddətdə sağalması üçün tibb işçiləri əlindən gələni əsirgəmir:“Bu gün və sabah xalqımızın sağlamlığı, təhlükəsizliyi həm də həkimlərimizin əməyindən birbaşa asılıdır desək, yanılmarıq. Azərbaycan dövləti həkimlərin əməyini yüksək qiymətləndirir, onların məhsuldar və səmərəli fəaliyyətini təmin etmək üçün bütün mümkün işləri görür”.
Günel CƏLİLOVA
