“Bu, dövlətin öz vətəndaşlarının qayğısına qalmasının əyani nümunəsidir”
“Hazırda Azərbaycana gəlmiş hər bir insan karantinə yerləşdirilir. Hesab edirəm ki, bizim karantin üçün də gördüyümüz işlər nümunəvi xarakter daşıyır. Çünki karantinə alınan insanlar dörd və beş ulduzlu hotellərdə saxlanılır. O cümlədən, mindən çox insan Atletlər kəndində saxlanılır”. Bunu Prezident İlham Əliyev Bakıda “Yeni klinika” tibb müəssisəsinin açılışında deyib. Prezident bu işdə fərqlənən bəzi otellərin adını da çəkib: “Onların arasında ölkəmizin ən böyük oteli olan “Bulvar Hotel” bu xəstəliklə mübarizə aparmaq üçün öz imkanlarını tamamilə təqdim etdi. “Qafqaz”, “Pullman” hotelləri, bölgələrdə, o cümlədən, Lənkəran şəhərində, Lerik şəhərində, bizim digər şəhərlərimizdə, Nabranda yerləşən hotellər - yəni, bizim dörd, beş ulduzlu bütün əsas hotellərimiz, istirahət zonaları karantində saxlanılan insanların sərəncamına verildi. Bundan başqa, bizim bəzi dövlət qurumlarının istirahət zonaları vardır, onlar da bu işə cəlb edildilər. Yəni bir daha demək istəyirəm ki, karantində qalan insanların rahatlığı təmin edilib, dövlət bütün xərcləri öz üzərinə götürüb. Belə də olmalıdır. Bizim dövlətimiz hər zaman vətəndaşın yanındadır və bu ağır günlərdə bir daha biz bunu nümayiş etdirdik”. Görünən odur ki, Azərbaycanda yaradılan karantin şəraiti digər ölkələrdən xeyli üstün səviyyədədir. Bunun nəticəsidir ki, ölkədə karantinə alınan insanlar 4-5 ulduzlu otellərdə saxlanır. Sözügedən məsələ ilə bağlı fikirlərini bizimlə bölüşən “İki Sahil” qəzetinin baş redaktoru Vüqar Rəhimzadənin sözlərinə görə, ölkəmizdə karantin üçün yaradılan yüksək şərait dünyanın heç bir ölkəsində yoxdur: “Bu, Azərbaycan dövlətinin sözügedən məsələni necə üstün səviyyədə diqqət mərkəzində saxlamasının göstəricisidir. Eyni zamanda bu, dövlətin öz vətəndaşlarının qayğısına qalmasının əyani nümunəsidir. Hansı ki, bəzi aparıcı dövlətlər bu bəlanın öhdəsindən gələ bilmir. Azərbaycanda isə sözügedən məsələ ilə bağlı işlər yüksək səviyyədə təşkil olunub. Ona görə də bu yöndə Azərbaycanda görülən işlər dünya üçün çox böyük nümunədir. Beş ulduzlu hotellərin insanların ixtiyarına verilməsi onlara göstərilən yüksək diqqəti özündə ehtiva edir. Ona görə də karantinə alınan insanlar qoyulan tələblərə əməl etməlidir. Qarşıya qoyulan tələblərə çox diqqətlə riayət olunmalıdır. Bəzi insanların sərbəst hərəkət etməsi müəyyən risqlər yaradır. O üzdən, hər bir ölkə vətəndaşı üzərinə düşən işləri yerinə yetirməlidir. Öz hərəkətlərini və məsuliyyətini dərk etməlidir .”
Vidadi ORDAHALLI
