Koronavirusla mübarizədə Azərbaycanın həlledici ideoloji silahı - həmrəyliyimizi virusla mübarizədən sonra da qoruya bilərikmi...
“Həmrəyliyimizin sabaha daşınmasında, gənc nəsillərə bir estafet kimi ötürülməsində ziyalılar, alimlər, fikir adamları maarifçilik işləri görməli və bu ali keyfiyyətimizin təbliğini həyata keçirməlidir”
“El ilə gələn dərd-bəla da toy-bayramdır” deyib ulularımız. Əslində, elin, xalqın, dövlətin əl-ələ verərək ağrı-acıya qalib gəlməyi bacarması nəticəsində bu bayram yaşanır. Əminik ki, tez bir zamanda Azərbaycan xalqının və dövlətinin sarılmaz birliyi, həmrəyliyi sayəsində koronavirus öz qanlı çaynaqlarını ölkəmizdən birdəfəlik olaraq çəkəcək. Çünki bu virusdan xilas olmaq üçün əl bir, əməli bir çalışırıq. Məlum olduğu kimi, koronavirusla mübarizədə vətəndaşlarımız çox aktiv iştirak edir və bu işdə maddi, mənəvi dəstəklərini əsirgəmirlər. Onu da bilirik ki, Koronavirusla Mübarizəyə Dəstək Fonduna ölkəmizdə fəaliyyət göstərən şirkətlər, ayrı-ayrı qurumlar, təşkilatlar, ictimai-siyasi xadimlər, sadə vətəndaşlar öz imkanları daxilində vəsait köçürüblər. Əlbəttə, bu çox müsbət bir örnəkdir və vətəndaş-dövlət həmrəyliyinin göstəricilərindən biridir.
“Yeni klinika” tibb müəssisəsinin açılış mərasimində çıxış edən Prezident İlham Əliyev koronavirusla mübarizədən qalib çıxmağımızın əsas şərtlərindən biri kimi Azərbaycan xalqının ortaya qoyduğu həmrəylik örnəyini önə çəkdi. Prezident qeyd etdi ki,
həmrəyliyimiz olmasaydı biz koronavirusla mübarizədə belə uğurlu nəticələr əldə edə bilməzdik. “...Xüsusilə bildirməliyəm ki, Azərbaycanın iş adamları və Azərbaycan cəmiyyəti bu vəziyyətdə özünü çox ləyaqətlə aparır. Bilirsiniz ki, mənim təşəbbüsümlə Koronavirusla Mübarizəyə Dəstək Fondu yaradıldı və Prezidentin ehtiyat fondundan ilkin olaraq 20 milyon manat bu fonda ianə verilmişdir. Fondun fəaliyyətə başlamasından 10 gün keçməyib, dünən axşam mənə verilən məlumata görə, artıq bu fondda 90 milyon manat yığılmışdır. Bunun mütləq əksəriyyəti şirkətlər tərəfindən verilən ianələrdir. Buna görə mən Azərbaycanın biznes nümayəndələrinə təşəkkürümü bildirirəm. Onlar əsl vətənpərvərlik və həmrəylik nümayiş etdirmişlər. Eyni zamanda, adi insanlar da imkan daxilində öz dəstəyini göstərirlər. Mənə müntəzəm olaraq məlumat verilir. Elə adam var ki, bir manat köçürür. Ona "çox sağ ol!" deyirik. O da öz vətəndaşlıq borcunu yerinə yetirir. Deməli, onun imkanı buna çatır. Bu bir daha göstərir ki, biz, - mən bunu demişəm, bir daha demək istəyirəm, - böyük xalqıq, ən ağır dövrdə birləşə bildik. "Biz birlikdə güclüyük!" şüarı, hesab edirəm ki, bu xəstəlik başa çatandan sonra da qüvvədə olacaq. Biz bu birliyi, həmrəyliyi nümayiş etdiririk”.
Reallıq budur ki, həmrəyliyimiz bütün məsələlərin həllində əsas rol oynayır. Koronavirusla mübarizədə həmrəylik həqiqətən hansı səmərəni verir və virusdan sonra da həmrəyliyimizi qoruyub saxlamaq üçün nə etməliyik?
Azərbaycan Milli Elmlər Akademiyasının (AMEA) Folklor İnstitutunun əməkdaşı, filologiya üzrə fəlsəfə doktoru, tanınmış alim, ictimai fəal İlhamə Qəsəbova baki-xeber.com-a bildirdi ki, burada söhbət daha çox mənəvi birlikdən, mənəvi həmrəylikdən gedir. Ekspert qeyd etdi ki, bir çox hallarda maddiyyat problemlərin qarşısını almaqda çətinlik çəkə bilir, o problemin həllinə yalnız mənəvi birlik göstərərək nail olursan:”Azərbaycan cəmiyyəti, dövləti böyük bir bəla ilə çarpışır, mübarizə aparır. Bizi bu bəladan yalnız mənəvi birliyimiz, həmrəyliyimiz xilas edə bilər. Cənab Prezident çox doğru qeyd edir ki, biz böyük xalqıq və ağır gündə birləşməyi bacarırıq. Bu hər xalqa müyəssər olmayan keyfiyyətdir. Bu gün çox böyük dövlətlər var ki, koronavirusa yoluxmanın qarşısını heç bir vəchlə ala bilmir. Bu onunla bağlıdır ki, bu dövlətlərdə ictimaiyyət və dövlət arasında həmrəylik zəifdir, qonşunun qonşudan, qohumun qohumdan xəbəri yoxdur. Amma bizdə belə deyil. Biz xalq olaraq həm bir-birimizə, həm də dövlətimizə bağlıyıq. Ən çətin günlərdə həmrəy olaraq mübarizələrdən qalib çıxmışıq. Koronavirusla mübarizədə Azərbaycan xalqı böyük bir həmrəylik nümayiş etdirir və bu həmrəyliyin də tarixi kökləri var. Qeyd edim ki, həmrəylik xalqımıza xas olan genetik xüsusiyyətlərdən, keyfiyyətlərdən biridir və onu xəstəlik bitdikdən sonra da davam etdirmək borcumuzdur. Koronavirsula mübarizədə insanlarımız, şirkətlərimiz, dövlət qurumlarımız bir araya gələrək həm maddi, həm də mənəvi həmrəylik göstərirlər. Bu çox müsbət haldır. Əlbəttə, bu gün Azərbaycanda sağlam mənəvi birliyin, həmrəyliyin olmasında, insanlarımızın dar gündə birləşməyi bacarmasında cənab Prezidentin göstərdiyi şəxsi örnəklərin çox böyük rolu var. Təsəvvür edin ki, yaxın, uzaq ölkələrin prezidentləri, baş nazirləri xalqdan qaçaraq kabinetlərinə qapandıqları bir vaxtda Azərbaycan Prezidenti İlham Əliyev xalqın içindədir, xalqın yanındadır. Prezidentin təşəbbüsü ilə Koronavirusla Mübarizəyə Dəstək Fondu yaradıldı və ölkə başçısı bir illik əməkhaqqını fonda bağışladı. Bundan böyük nümunə, bundan böyük həmrəylik örnəyi ola bilərmi... Azərbaycanda həmrəyliyin təməlləri çox möhkəmdir və bu istiqamət, xüsusiyyət bu gündən sabaha da daşınmalıdır. Hesab edirəm ki, həmrəyliyimizin sabaha daşınmasında, gənc nəsillərə bir estafet kimi ötürülməsində ziyalılar, alimlər, fikir adamları maarifçilik işləri görməli və bu ali keyfiyyətimizin təbliğini həyata keçirməlidir. Həmrəylik bir mənəvi mirasdır, biz onu gələcəyə ötürmək üçün onun əhəmiyyətini, dəyərini kifayət qədər nümunələrlə təbliğ etməliyik. Tariximizdə bununla bağlı kifayət qədər nümunələr var. Əminəm ki, xalq olaraq, dövlət olaraq koronavirus bəlasından tezliklə xilas olacağıq və ulularımızdan miras qalan həmrəyliyi davam etdirib insanlarımıza qarşı daha qayğıkeş olacağıq”.
İ.Qəsəbova hesab edir ki, bu gün koronavirusla mübarizədə bizim mənəvi birliyimizə gedən yol həm də insanlarımızın dövlət tərəfindən qoyulan tələblərə, verilən tövsiyələrə əməl etməsindən keçir. O, yaşlı insanların tələblərə əməl etməli olduğunu, bəzi kəsimlərin isə bu virusu lağlağıya çevirməli olmadığını bildirdi. İ.Qəsəbova hesab edir ki, hamı dövlətin haqlı tələblərinə əməl edərsə, xalq olaraq həmrəyliyimiz daha da güclənəcək.
İradə SARIYEVA
