Prezident İlham Əliyev Bakıda “Yeni klinika” tibb müəssisəsinin açılışında iştirakı zamanı koronavirusla bağlı tətbiq edilən qadağalar şəraitində Azərbaycan polisinin dözümlü iş fəaliyyətindən danışıb. Prezident bildirib ki, bizim hələlik tam razı ola bilmədiyimiz yeganə məsələ məsuliyyətdir:“Çünki bəzi insanlar özlərini məsuliyyətsiz aparırlar. Bəzi insanlar qəbul edilmiş qaydaları pozmağa çalışırlar. Beləliklə həm özlərini, həm yaxınlarını, həm də ki, tanımadıqları insanları risq altına qoyurlar. Bunu etmək olmaz. Bu qadağalar ona görə qəbul edilib ki, yoluxma halları məhdudlaşdırılsın. Yaşı 65-dən yuxarı olan insanlar küçəyə çıxa bilməzlər. Bunu onlar başa düşməlidirlər. Bizim polis işçiləri onları çox mülayim formada başa salmağa çalışır. Siz indi yaxşı bilirsiniz ki, bəzi ölkələrdə polis nümayəndələri necə davranırlar. Televizorda görürük, heç iki-üç sual da vermir, dərhal hərəkətə keçir. Bizim polisimiz insanları qoruyur. İndi onların üzərinə böyük yük, böyük məsuliyyət düşür. Onlar da öz sağlamlıqlarını risq altına atırlar. Gecə-gündüz küçələrdə onu başa sal, bunu başa sal. Biz nə etməliyik?! Qaydaların pozulmasına imkan verə bilmərik”.
Prezident daha sonra qeyd edib ki, Avropada nələrin baş verdiyinə diqqət etmək lazımdır:“İndi görün Avropanın inkişaf etmiş ölkələrində nələr baş verir. Orada 2 nəfərdən çox adam bir yerə yığışa bilməz, 2 nəfərdən çox. Əgər polis işçiləri onu görürlərsə, dərhal ölçü götürürlər. Heç yalvar-yapış etmirlər, ölçü götürürlər. Ona görə bizdə hər bir kəsdə məsuliyyət hissi olmalıdır. Məsuliyyət hissi də bu gün sərgilədiyimiz həmrəylik və birlik hisslərinin səviyyəsinə qalxmalıdır”. Göründüyü kimi, ölkə başçısı Azərbaycan polisinin dözümlü davranışı ilə bağlı müqayisələr aparıb. Belə olan halda vətəndaşlarımızın üzərinə polislə ünsiyyətdə hansı vəzifələr düşür?
Polisə Dəstək İctimai Birliyinin sədri Şəmsəddin Əliyev “Bakı-Xəbər”ə açıqlamasında bildirdi ki, Azərbaycan polisi hər zaman olduğu kimi bu gün də üzərinə düşən missiyanı lazımi şəkildə yerinə yetirir:“Polis tam olaraq “Polis Haqqında” Qanunun tələblərinə uyğun davranır. Biz fikir veriririk ki, polisimizin davranışlarında beynəlxalq normalar da lazımi şəkildə yerinə yetirilir. Son hadisələrlə bağlı da ən böyük məsuliyyət həkimlərlə polisin üzərinə düşür. Bu səbəbdən də biz polisin qanuni tələblərinə tam tabe olmalıyıq. Çünki polis hər hansı qadağa ilə bağlı tələbi qanundan irəli gələrək edir. Vətəndaşlarımız mütləq mənada həmin qanuni tələblərə tabe olmalıdır. Ölkə başısı çox doğru olaraq, Avropa polisinin davranışları ilə müqayisə apardı. Ordakı polislər insanlara qarşı çox sərt davranırlar. Bizdə polis doğrudan da çalışır ki, insanlarımızı mülayim yollarla qanuna riayət etməyə dəvət etsin. Bəzən görürük ki, bəzi vətəndaşlarımız buna etiraz edir, hətta polisi təhqir edənlər də tapılır. Yenə də polisimiz öz müvazinətini qoruya bilir. Nəzərə almalıyıq ki, polis də insandır, onun də əsəblərinin həddi var. Xüsusilə də belə ekstremal situasiyalarda biz vətəndaş olaraq poisin tələblərinə tabe olmaqla onlara və qanunlara ən böyük hörmətimizi etmiş olarıq. Biz Gəncə hadisələri zamanı da polisin necə davrandığını gördük. Kütlənin qarşısına əliyalın çıxan polisilərimizi vurub öldürdülər. Bütün bunlara baxmayaraq, Azərbaycan polisi bütün dünyaya nümunə olan addımlar atır. Ancaq bunun da həddi var. Elə etməliyik ki, polis sərt davranışlar nümayiş etdirməsin”.
Məhəmmədəli QƏRİBLİ
