Asif İbrahimov:“Elə böyük sahibkarlar var ki, səsləri belə çıxmır”
Prezident İlham Əliyev Bakıda “Yeni klinika” tibb müəssisəsinin açılışında iştirakı zamanı ölkəmizdə fəaliyyət göstərən sahibkarların koronavirusla bağlı yaradılan fonda keçirdikləri ianələrdən danışıb və bunu müsbət hal kimi dəyərləndirib:
”Dövlət bütün işləri görür. Qeyd etdiyim tədbirlər, hesab edirəm ki, ən düzgün tədbirlərdir. Eyni zamanda, sahibkarları, işini itirənləri dəstəkləmək üçün mənim Sərəncamımla Nazirlər Kabinetinə bir milyard manat vəsait ayrıldı, dörd işçi qrupu yaradıldı. Bu işçi qruplarının vəzifəsi məşğulluq məsələlərini həll etmək, iqtisadi sabitliyi təmin etmək, makroiqtisadi vəziyyəti sabit saxlamaq və bizim maliyyə imkanlarımızı səfərbər etməkdir. Bu işçi qrupları fəaliyyətə başlayıb və təkliflər hazırlanır. Biz mütləq həm xəstələrə sahib çıxacağıq və çıxırıq, həm də ki, iş adamlarına. Xüsusilə bildirməliyəm ki, Azərbaycanın iş adamları və Azərbaycan cəmiyyəti bu vəziyyətdə özünü çox ləyaqətlə aparır. Bilirsiniz ki, mənim təşəbbüsümlə Koronavirusla Mübarizəyə Dəstək Fondu yaradıldı və Prezidentin ehtiyat fondundan ilkin olaraq 20 milyon manat bu fonda ianə verilmişdir. Fondun fəaliyyətə başlamasından 10 gün keçməyib, dünən axşam mənə verilən məlumata görə, artıq bu fondda 90 milyon manat yığılmışdır. Bunun mütləq əksəriyyəti şirkətlər tərəfindən verilən ianələrdir. Buna görə mən Azərbaycanın biznes nümayəndələrinə təşəkkürümü bildirirəm. Onlar əsl vətənpərvərlik və həmrəylik nümayiş etdirmişlər. Eyni zamanda, adi insanlar da imkan daxilində öz dəstəyini göstərirlər. Mənə müntəzəm olaraq məlumat verilir. Elə adam var ki, bir manat köçürür. Ona “çox sağ ol!” deyirik. O da öz vətəndaşlıq borcunu yerinə yetirir. Deməli, onun imkanı buna çatır. Bu bir daha göstərir ki, biz, - mən bunu demişəm, bir daha demək istəyirəm, - böyük xalqıq, ən ağır dövrdə birləşə bildik. “Biz birlikdə güclüyük!” şüarı, hesab edirəm ki, bu xəstəlik başa çatandan sonra da qüvvədə olacaq. Biz bu birliyi, həmrəyliyi nümayiş etdiririk”. Təbiidir ki, iş adamlarının bu sosial məsuliyyəti çox gözəldir və təqdirəlayiqdir. Ancaq kifayət qədər var-dövləti olan, lakin belə sosial məsuliyyətlərdən yayınan adamlar da az deyil. Onlarla bağlı ictimai qınaq hansı səviyyədə olmalıdır?
Beynəlxalq idarəetmə sistemləri üzrə mütəxəssis Asif İbrahimov “Bakı-Xəbər”ə açıqlamasında bildirdi ki, pandemiya bütün bəşəriyyəti öz ağuşuna alıb və bu səbəbdən də onunla mübarizəyə ciddi önəm verilməlidir:“Dövlətimiz bununla bağlı bütün lazımi tədbirləri görür ki, ölkə vətəndaşlarımızın sağlamlığını qoruya bilsin. Biz vaxtında tədbirlər görməyə başladıq. Bura tədrisin təxirə salınmasından tutmuş, suni nəfəs aparatlarının ölkəyə gətirilməsinə kimi qabaqlayıcı tədbirləri göstərə bilərik. Bütün xəstəxanalar fövqəlaə hal vəziyyətinə hazır olan duruma gətirildi. Bir çox maarifləndirmə işlərinə başlanıldı. Bütün bu işlərin yerinə yetirilməsi həm də ciddi vəsait tələb edir. Hələ ki, pandemiaya davam edir və istisna deyil ki, bundan sonra da vəsaitlər tələb olacaq. Hazırlıqlı olmağımız üçün, həm də insanlarımızın sosial məsuliyyəti artmalıdır. Bununla bağlı xüsusi fond təsis edildi və ora ilk vəsaiti ölkə başçısı köçürdü. Azərbaycan sahibkarları bu istiqamətdə fəallıq nümayiş etdirdilər və Prezident tərəfindən başladılan təşəbbüsə qoşulduqlarını sübut etdilər. Bir neçə gün ərzində həmin fonda köçürülən vəsaitin həcmi 90 milyon oldu. Bu bir daha Azərbaycan sahibkarının öz dövlətinə olan etimadının göstəricisi sayıla bilər. Təəssüflər olsun ki, müəyyən istisnalar da var. Biz mediadan oxuyuruq ki, bəziləri imkanları olduğu halda bu təşəbbüsdən yayınır, elələri də var ki, fonda pul ödəmədikləri halda, güya ödəniş etdiklərinə dair yalan məlumatlar yayırlar. Təbiidir ki, belə adamalarla bağlı ictimai qınaq olmalıdır. Dövlət kimisə məcbur etmir ki, hansısa fonda pul köçürsün. Ancaq sahibkarın özündə bununla bağlı bir tərpəniş olmalıdır. Bu cür həssas məsələdə media nümayəndələri xüsusilə aktiv olmalıdırlar. Belə ictimai qınağı ilkin olaraq onlar formalaşdıra bilər. Sadə vətəndaşların belə məlumatları əldə etmələri çətindir. Mən bütün iş adamlarını bu məsələdə həmrəylik nümayiş etdirməyə çağırıram. Onlar unutmasınlar ki, bütün mənfəətlərini bu ölkədəki stabilliyin hesabına əldə ediblər. Biz aylıq dövriyyəsi 4-5 min olan sahibkarlara bunu şamil etmirik. Elə böyük sahibkarlar var ki, səsləri belə çıxmır. Sözüm onlaradır”.
Məhəmmədəli QƏRİBLİ
