31/05/2020 19:46
728 x 90

Falçılar fəallaşıb – virusdan ən səmərəli qorunma falçı tövsiyələrinə, ya dövlət tədbirlərinə əməl etməkdədir...

Qiymət Məhərrəmli: “Bu gün Azərbaycan vətəndaşları koronavirus təhlükəsindən tam xilas olmaq üçün falçılara yox, dövlətin veriyi tövsiyələrə, qarşıya qoyduğu tələblərə əməl etməlidir”

img

Dünyada hər hansı bir xoşagəlməz hadisələr baş verdikdə, yaxud təbii fəlakətlər olduqda, xəstəliklər, infeksiyalar yayıldıqda ortaya falçılar, “öncəgörən”lər çıxaraq tövsiyələr verməyə başlayırlar. Bu tarixin bütün dövrlərində belə olub və “öncəgörən”lər insanların “əsas məsləhət”çisinə çevrilməkdə israrlı olublar.

Bu gün də analoji vəziyyətin şahidi oluruq. Bütün dünyanın koronavirusla mübarizə apardığı bir dönəmdə, böyük dövlətlərin, beynəlxalq təşkilatların bu xəstəlik qarşısında “dizlərinin əsdiyi” bir vaxtda bəzi falçılar, “öncəgörən”lər insanlara sosial şəbəkələr vasitəsilə tövsiyələr verirlər ki, filan işi etsəniz bu virus sizə və ailənizə yaxın düşə bilməz(?). Hətta bəziləri bir qədər irəliyə gedərək xəstəliyin nə zaman çəkilib gedəcəyi tarixi (?) də proqnozlaşdırırlar. Məlumdur ki, Azərbaycan dövləti elə ilk günlərdən koronavirusun ölkəmizdə yayılmasının qarşısının alınması istiqamətində səmərəli işlər aparır, sosial izolyasiya, karantin tədbirləri həyata keçirir, koronavirusa yoluxan şəxslərin müayinə və müalicəsini reallaşdırır. Bu gün Azərbaycan dövləti bütün resurslarını səfərbər edərək bu virusa qarşı mübarizə aparır və bu bəladan böyük itki vermədən çıxmağımız üçün təxirəsalınmaz tədbirlər həyata keçirir, vətəndaşlarımızın müdafiəsinə, mühafizəsinə yönəlik çoxsaylı addımlar atır. Azərbaycan vətəndaşı Azərbaycan dövlətinə inanır və güvənir. Bu vəziyyətdə bəzi falçı və ekstrasenslərin meydana çıxıb xalqı aldatması, sosial şəbəkələr vasitəsilə xalqa “çıxış yolu” təklif etməsi gülünc görünür.

  • “Ölkəmizin koronavirusla mübarizədə səfərbər olduğu bir vəziyyətdə psixoloqların meydanda görünməməsi falçıların, “öncəgörən”lərin meydana çıxıb insanlara “tövsiyə” verməsinə gətirib çıxarıb”

Filologiya üzrə fəlsəfə doktoru Qiymət Məhərrəmli baki-xeber.com-a bildirdi ki, Azərbaycan vətəndaşları sosial şəbəkələrdə peyda olub xalqı aldadan, xalqın fikrini yayındıran bir qrup falçıya deyil, Azərbaycan dövlətinə güvənməli və dövlətin  bütün tövsiyələrinə qeyd-şərtsiz əməl etməlidir.

“Bu gün Azərbaycan dövləti koronavirusun ölkəmizdə daha geniş miqyasda yayılmaması üçün çox ciddi tədbirlər görür. Ümid edirəm ki, dövlətimizin və xalqımızın birgə səyləri nəticəsində bu virusu da atladacağıq. Dövlət bütün tədbirləri görür, xəstə insanların müalicəsini həyata keçirir, sağlam insanların yoluxmaması üçün ən müxtəlif formalarda təhlükəsizlik işləri görür. Azərbaycan dövləti Azərbaycan vətəndaşının bütün məsələlərdə qayğısına qalır. Vətəndaş və dövlət arasında çox möhkəm təməllər üzərində qurulan qarşılıqlı etimad formalaşıb. Amma təəssüf ki, bəziləri bu etimadı zədələməyə cəhd edir. Hesab edirəm ki, onların bu cəhdləri heç zaman baş tutmayacaq, çünki dediyim kimi xalq dövlətinə inanır, güvənir. Bu gün Ümumdünya Səhiyyə Təşkilatı, başqa beynəlxalq qurumlar, eləcə də mütəxəssislər koronavirusun nə zaman başa çatacağını tam olaraq proqnozlaşdıra bilmirlərsə, falçılar bunu necə proqnozlaşdıra bilər? Bu absurddur. “COVID-19” pandemiyası bütün dünyada tüğyan edir, canlar alır, dünya səhiyyəsi xəstəliyin qarşısını almaqda çətinlik çəkir, falçılar isə iddia edir ki, bu virusun qarşısını hansısa cadularla almaq olar. Bu cəfəngiyyatdır. Bu gün Azərbaycan vətəndaşları koronavirus təhlükəsindən tam xilas olmaq üçün falçılara yox, dövlətin veriyi tövsiyələrə, qarşıya qoyduğu tələblərə əməl etməlidir” – Q.Məhərrəmli deyib.

Q.Məhərrəmlinin fikrincə, bu gün dövlət öz vətəndaşlarına kifayət qədər qayğı göstərir və onların təhlükəsizliyi üçün vacib olan bütün tədbirləri həyata keçirir. Bu halda isə dedi-qodulara, uydurmalara, falçı yozumlarına heç bir əsas olmadığını deyən Q.Məhərrəmlinin sözlərinə görə, falçıların bu vəziyyətdən sui-istifadə cəhdlərinə şərait yaradan məqamlardan biri psixoloqların meydanda görünməməsidir. O, hesab edir ki, bu günlərdə psixoloqlar da dövlətimizlə və xalqımızla həmrəylik nümayiş etdirərək pulsuz onlayn xidmətlər göstərməli və əhalinin psixoloji maarifləndirilməsini həyata keçirməlidir. “Azərbaycanda kifayət qədər psixoloq və psixoloji mərkəz var, onlar əhaliyə həmişə ödənişli xidmət göstəriblər. Ölkəmizin koronavirusla mübarizədə səfərbər olduğu bir vəziyyətdə psixoloqların meydanda görünməməsi falçıların, “öncəgörən”lərin meydana çıxıb insanlara “tövsiyə” verməsinə gətirib çıxarıb” - deyə Q.Məhərrəmli qeyd etdi.

İradə SARIYEVA

Son xəbərlər