“Ölkəmizdə görülən bütün işlər, qəbul edilmiş qərarlar bir məqsədi güdür ki, biz bu ağır sınaqdan az itkilərlə çıxaq və vətəndaşlarımızı maksimum dərəcədə qoruyaq”. Bunu Prezident İlham Əliyev “Yeni klinika” tibb müəssisəsində yaradılan şəraitlə tanışlıqdan sonra xəstəxananın kollektivi ilə görüşündə çıxışı zamanı deyib.
Dövlət başçısı vurğulayıb ki, Azərbaycan beynəlxalq aləmin məsuliyyətli və çox dəyərli üzvü kimi Ümumdünya Səhiyyə Təşkilatına koronavirusla mübarizə aparmaq üçün 5 milyon dollar ianə verib: “Bu da bizim ümumi işimizə, dünyanın üzləşdiyi problemin həllinə verdiyimiz dəyərli töhfədir. Əlbəttə, ölkəmizdə görülən bütün işlər, qəbul edilmiş qərarlar bir məqsədi güdür ki, biz bu ağır sınaqdan az itkilərlə çıxaq və vətəndaşlarımızı maksimum dərəcədə qoruyaq. Ona görə martın 14-də və ondan sonrakı tarixlərdə qəbul edilmiş qərarlar, karantin rejiminin tətbiq olunması, yeni məhdudlaşdırıcı tədbirlərin görülməsi və onların qüvvəyə minməsi hesab edirəm ki, vəziyyətə uyğun atılmış addımlardır. Çünki biz birinci ölkələrdən idik ki, ali məktəbləri, məktəbləri, uşaq bağçalarını bağladıq, quru sərhədlərimizi bağladıq, aviareyslərin sayını kəskin azaltdıq. Hazırda cəmi iki istiqamət üzrə, özü də həftədə bir dəfə aviareyslər təşkil edilir. Bu aviareyslər ancaq Azərbaycan vətəndaşlarını ölkəmizə gətirmək rejimində işləyir”.
Koronavirusdan dünyada heç bir ölkə sığortalanmayıb. Bir sıra ölkələr bu və ya digər dərəcədə bu problemdən əziyyət çəkir. Yalnız vaxtında qabaqlayıcı bəzi tədbirləri görən dövlətlər problemdən az itki ilə çıxmaq şansına malikdirlər. Azərbaycanda da antivirus tədbirlərinin həyata keçirilməsində əsas məqsəd bu bəladan mümkün qədər az itki ilə çıxmaqdır.
Məsələyə münasibət bildirən siyasi şərhçi Ramil Hüseynovun fikrincə, bir sıra məhdudlaşdırıcı tədbirlərin görülməsi Azərbaycanın bu prosesdən az itki ilə çıxması şanslarını artırır: “Məsələ ondadır ki, belə tədbirlər virusun daha çox yayılmasının qarşısını alır və nəticədə risqlər azalır. Təbii ki, tətbiq edilən məhdudiyyətlər bəzi sıxıntılar yaradır. Ancaq nəzərə almaq lazımdır ki, hələ bunun başqa alternativi yoxdur. Ona görə də, hamı yaranan vəziyyəti düzgün anlamalıdır. Məlum olduğu kimi, koronavirus təhlükəsinin yaratdığı qlobal böhran qarşısında bir sıra inkişaf etmiş dövlətlər də aciz qalıb. Bu bir reallıqdır və bunu danmaq olmaz. Epidemiya hər bir dövlətin idarəetmə sistemini sınağa çəkməklə yanaşı, cəmiyyətdəki həmrəylik və birliyin, sosial məsuliyyət, dəyərlərə bağlılığın əhəmiyyətini ortaya çıxarır. Aydın məsələdir ki, bu şəraitdə dövlətin üzərinə düşən əsas vəzifə vətəndaşların sağlamlığı və sosial rifahının dayanıqlığını təmin etməkdir. Bunun üçün isə effektiv idarəetmə metodları tapılmalıdır. Gözlənilməz böhranlar qarşısında idarəetmə mexanizminin effektivliyi aydın şəkildə ortaya çıxır. Azərbaycanda vəziyyətin nəzarətdə saxlanması idarəetmə mexanizminin təkmilləşdirilməsindən və mümkün qədər bu bəladan az itki ilə çıxa bilməkdən xəbər verir”.
Vidadi ORDAHALLI
