Xəbər verildiyi kimi, Prezident İlham Əliyev və birinci xanım Mehriban Əliyeva martın 28-də Bakıda “Yeni klinika” tibb müəssisəsinin açılışında iştirak edib. Açılışda dövlət başçısı ölkədə elan olunan karantin şərtlərinin pozulması ilə bağlı ciddi və haqlı bir xəbərdarlıq edib:
"Biz maksimum çalışırıq ki, bu vəziyyətdə insanların narahatlığını anlayaq və kömək göstərək. Hər kəs üçün çətindir. Aydın məsələdir ki, evdə oturmaq çətindir. Xüsusilə nəzərə alsaq ki, son illər ərzində Bakı şəhərində, bütün digər yerlərdə, rayonlarda gözəl parklar, istirahət zonaları salınıbdır, hava da yaxşıdır. Ancaq hər bir adam məsuliyyətli olmalıdır. Olmaz belə. Yaşı 65-dən yuxarı insanlar evdə oturmalıdırlar. Vəssalam, birmənalı şəkildə! Həmçinin 10-dan çox insan bir yerə toplaşmamalıdır. Bunu da pozurlar. Ona görə də bu tədbirlər daha da sərtləşdiriləcək". Göründüyü kimi, bəzi hallarda yaşlıların zəruri rejim qaydalarına əməl etməməsi Prezidenti daha sərt tədbirlərin anonsunu vermək məcburiyyətində qoyur. Ölkə başçısı, qaydalar pozulacağı təqdirdə, onların sərtləşəcəyini bildirdi. Bu sərtləşmə özündə nəyi ehtiva edə bilər?
Milli Qeyri Hökumət Təşkilatları Forumunun prezidenti Rauf Zeyni “Bakı-Xəbər”ə açıqlamasında bildirdi ki, bütün ölkələr epidemiyanın qarşısının alınması üçün ciddi tədbirlərə əl atır:“Bizim ölkəmiz də pandemiya ilə bağlı bütün zəruri tədbirləri davam etdirir. Bu məqsədlə Nazirlər Kabineti yanında Operativ Qərargah da yaradılıb. Biz də QHT-lər olaraq bu təşəbbüsə qoşulmuşuq. Əsasən ictimai montitorinqləri həyata keçiririk. Əhalinin müxtəlif təbəqələri ilə görüşürük. Bu yöndə əlimizdən gələn maarifləndirməni həyata keçiririk. Hesab edirəm ki, Operativ Qərargahın elan etdiyi karantin rejiminə mütləq mənada əməl etməliyik. Qoyulan qaydalara yüksək səviyyədə əməl etmək hər bir vətəndaşın borcudur. Ölkə başçısını da narahat edən məqam bundan ibarətdir ki, əhalinin sağlamlığı üçün atılan addımlara bəzi vətəndaşlarımız əməl etmək istəmir. Bizim özümüz də bunun şahidi oluruq. Əhalinin, xüsusilə də yaşı 65-i keçmiş vətəndaşların küçədə gəzdiklərini görürük. Bu biganəlik ölkə rəhbərliyini daha sərt addımlar atmağa vadar edə bilər. Hələlik bununla bağlı biz xəbərdarlığı eşidirik. Əhalinin içərisində olan şəxs kimi mən də Prezidentin fikirləri və tələbi ilə tamamilə razıyam. Çünki bir çox insanlar özlərini düşünməməklə yanaşı, başqalarını da xəstəliyə yoluxdura bilərlər. Bu onların boynuna düşən bir hüquqi məsuliyyətdi. Mütləq mənada “evdə qal, cəmiyyəti qoru” kampaniyasının tələblərinə əməl olunmalıdır. Bu simvolik məna daşımır, ciddi tələbdir. Ölkə başçısı hamımızdan çox məlumata malik olan şəxsdi. O, dünyada bu epidemiyanın yaratdığı fəsadları bilir və bütün bu tələbləri ölkəmizi qorumaq üçün edir. Biz bu bəladan yalnız birlik nümayiş etdirməklə çıxa bilərik. Mən də hesab edirəm ki, qaydalara əməl olunmayacağı təqdirdə daha sərt inzibati və digər tədbirlərin görülməsi zərurəti yaranacaq ki, buna da getmək lazımdır. Belə olmasa, bizi ciddi sınaqlar gözləyə bilər”.
Məhəmmədəli QƏRİBLİ
