Yeni Azərbaycan Partiyası (YAP) Siyasi Şurasının son iclasında Azərbaycanın müstəqillik tarixində ilkə imza atılıb. Parlamentdə 72 mandatla mütləq çoxluğu təşkil edən hakim partiya növbədənkənar seçkilərə getməyə qərar verib. Partiya bununla bağlı ölkə Prezidenti İlham Əliyevə müraciət edərək parlamentin buraxılmasını xahiş edib.
Ötən il keçirilən növbədənkənar prezident seçkilərindən sonra ictimaiyyətdə hakimiyyətin parlamenti də yeniləyəcəyi barədə müzakirələr gedirdi. Növbədənkənar seçkilərin keçiriləcəyinə ilk işarə hələ başa çatmaqda olan ilin büdcəsi qəbul olunarkən verilmişdi. Bu il qrafikdə yalnız bələdiyyə seçkilərinin olmasına rəğmən, seçkilərlə bağlı xərclərin təxminən iki dəfə artıq - 90 milyon manat nəzərdə tutulması müzakirələrə yol açmışdı. Çünki, ənənəvi olaraq, bir seçkinin xərcləri 45-50 milyon manat həddini aşmır. Seçki Məcəlləsinə görə, seçkilər elan oldunduğu gündən 2 ay müddətinə keçirilir. Bununla təxmin etmək olar ki, növbədənkənar parlament seçkiləri təxminən fevral ayında keçiriləcək. Bu prosesə radikal müxalifət, birmənalı olaraq, mənfi münasibət bəsləyir. Onlar hesab edirlər ki, hakimiyyətin bu gedişi xarici faktordan qorxu əlaməti ilə bağlıdır. Yəni belə mülahizələr irəli sürülür ki, xarici qüvvələrin dəstəyilə burada hansısa siyasi proseslərin baş verməsini ertələmək üçün belə addımın atılması zərurəti ortaya çıxıb. Hakim partiya isə bunu ölkədə gedən islahatlara təkan verə biləcək bir addım kimi səciyyələndirir. Radikal dairələrin ölkədə növbədənkənar parlament seçkilərinin keçirilməsi ilə bağlı irəli sürdükləri versiyanı nə dərəcədə əsaslı saymaq olar?
Rasim Quliyev: “Obyektiv təhlil aparmaq gücləri olmadığı üçün, belə saxta nəticələrə gəlirlər”
“Resurs” Analitik İnformasiya Mərkəzinin rəhbəri Rasim Quliyev “Bakı-Xəbər”ə bildirdi ki, o, Azərbaycan dövlətçiliyinin möhkəmlənməsi və xalqın rifahının daha da yaxşılaşmasına xidmət edən addımlara belə qiymət verir: “Çox təəssüflər olsun ki, həmin radikalların sırasında Azərbaycanın milli maraqlarını düşünən qüvvə yoxdur. Onları yalnız qrup adlandırmaq olar. Çünki onların qüvvəyə çevrilməsinə hələ çox var. Biz müşahidə edirik ki, həmin qruplar adətən ölkəmizlə bağlı olan taleyüklü mövzuların müzakirəsi zamanı daha da aktivləşirlər. Onlar Azərbaycanın xeyrinə olan bütün prosesləri qaralamaqla məşğul olurlar. Biz bunu yalnız siyasi arenada görmürük. Onların analoji davranışları həm də ölkəmizin evsahibliyi etdiyi mötəbər idman yarışları, mədəniyyət tədbirləri zamanı da baş verib. Son prosesi də həmin yöndən təhlil edirlər. Obyektiv təhlil aparmaq gücləri olmadığı üçün, belə saxta nəticələrə gəlirlər. Ölkədə parlamentin vaxtından əvvəl buraxılması hadisəsinin xarici amillə heç bir əlaqəsi yoxdur. Bilirsiniz ki, istənilən ölkədə islahatların aparılması labüddür. Məsələn, qonşumuz İrana baxın. O böyüklükdə ölkə niyə çalxalanır? Çünki vaxtı çatanda islahatları aparmayıblar. Azərbaycan hakimiyyəti hər zaman islahatlar həyata keçirir. Bu il isə islahatların əhatə dairəsi və sürəti bir qədər geniş və dinamik oldu. Aparılan struktur və kadr islahatları bütün sahələrdə yeniləşməni tələb edir. Parlament bu prosesdən geridə qala bilməzdi. Atılan son addımları hansısa xarici amillə yox, gedən islahatlara verilən dəstək kimi qiymətləndirirəm. Əminəm ki, yeni formalaşacaq parlament daha məhsuldar işləyəcək. Qanunverici orqanın tərkibinin yenilənməsini də aparılan islahatlara tam adekvat addım saya bilərik”.
Məhəmmədəli QƏRİBLİ
