11/12/2019 13:00
728 x 90

Cəmil Həsənlinin Milli Şuradan “can qurtarması” və Tofiq Yaqublunun irəli verilməsi planı…

img

Əli Kərimli yeni ssenarini işə salıb. Budəfəki oyun Tofiq Yaqublunun üzərində qurulub. Hələ Müsavatın qurultayı ərəfəsində belə bir projenin işləndiyi məlum idi. Bildirilirdi ki, Əli Kərimli Tofiq Yaqublunun əli ilə Müsavat Partiyasını ələ almağa çalışır.

Təsadüfi deyil ki, məhz qurultay ərəfəsində Tofiq Yaqublu AXCP-nin icazəsiz aksiyalarında görünürdü və özünü daha çox həmin partiyanın funksioneri kimi aparırdı. Ə.Kərimliyə yaxınlığı ilə seçilən bloger və səhifələr onun aktiv təbliğatını aparırdılar. Ə.Kərimli onu Müsavata başqan seçdirə bilmədi. Sonra T.Yaqublu  icazəsiz aksiyada Ə.Kərimlinin qoluna girərək, meydana doğru irəlilədi və ictimai asayişi pozduğuna görə bir ay müddətinə inzibati həbsə məhkum olundu. T.Yaqublunun həbsdə olduğu dönəmdə Ə.Kərimli dəfələrlə çağırış etdi ki, hamı onun şəklini profilinə qoysun, həmin şəxs barədə statuslar yazsınlar. Maraqlıdır ki, Ə.Kərimli bu cür aktiv təbliğatı həbsdə olan AXCP funksionerləri Seymur Həzi, Fuad Qəhrəmanlı ilə bağlı yox, məhz T.Yaqublu üzərində qurdu.

Artıq yeni ssenarinin nədən ibarət olduğu bəllidir. Ə.Kərimli radikal mövqeyi ilə seçilən T.Yaqublunu özünün orbitində olan Milli Şuraya sədr gətirmək istəyir. Bu planın ilk cücərtiləri Cəmil Həsənlinin yazdığı statusda özünü göstərdi: “Biz isə belə hesab edirik ki, hazırda hakimiyyətə qarşı mübarizənin aparıcı simalarından birinə çevrildiyindən, Tofiq bəy Milli Şuranın sədri vəzifəsinə irəli çəkilməyə layiqdir.

Biz hamımız onun sədrliyi altında, onunla çiyin-çiyinə bu antimilli rejimə qarşı birlikdə mübarizə aparmaqdan məmnun olardıq. Tofiq bəy bu etimadı xalqa, millətə, vətənə təmənnasız xidməti, ardıcıl mübarizəsi və fədakarlığı ilə qazanıb”.

  • Arif Hacılı: “...Milli Şuranın sədri olsa, yenə eyni məqsədlə o təşkilatdan daha çox Müsavatı təbliğ edəcək"

T.Yaqublunun hazırda təmsil olunduğu Müsavat Partiyasının başqanı Arif Hacılı bu təklifə münasibət bildirib: "Hər kəsə məlumdur ki, T.Yaqublu Müsavat və Milli Şuranın, AXCP-nin daha sıx əməkdaşlığının, müttəfiqliyinin tərəfdarıdır. Ümid edirəm ki, Tofiq bəy əvvəllər bu məqsədlə Müsavatdan daha çox Milli Şuranı təbliğ edirdisə, Milli Şuranın sədri olsa, yenə eyni məqsədlə o təşkilatdan daha çox Müsavatı təbliğ edəcək".

Qeyd edək ki, hələlik T.Yaqublu bu mövzu ilə bağlı açıqlama verməkdə maraqlı olmadığını göstərir. Bizim də bu yöndə verdiyimiz suala cavab vermək istəmədiyini dedi. Maraqlıdır, C.Həsənlinin postundan tələsik imtina etmək istəyi, A.Hacılının isə T.Yaqublu ilə vidalaşmaqda maraqlı olduğunu ifadə edən açıqlaması, sədrliyə namizəd göstərilənin isə susqun mövqeyi nəyin əlaməti hesab edilə bilər?

  • Rəfail Becanov: “...indi də Tofiq Yaqublunu xərcləməyə hazırlaşır”

AXCP adına iddialı olan digər qanadın funksioneri Rəfail Becanov “Bakı-Xəbər”ə açıqlamasında bildirdi ki, belə bir plan əvvəldən mövcud olub: “Yadınızdadırsa, hələ Müsavatın qurultayına hazırlıq gedən ərəfədə belə bir məlumat dövriyyəyə buraxıldı ki, T.Yaqublu Müsavata başqan seçilməsə, Milli Şuraya rəhbər gətirilə bilər. Bəllidir ki, bütün bu layihələri cızan Ə.Kərimlidir. Həmin vaxt C.Həsənlidən belə mövqe ona görə tələb olunmadı ki, birdən T.Yaqublunun əli ilə Müsavatı ələ keçirmək mümkün olar. Ə.Kərimlinin planı bu idi ki, özünün rəhbərlik etdiyi quruma, Milli Şuraya və Müsavata nəzarəti ələ keçirsin. Bu plan alınmayanda C.Həsənliyə belə bir fikri söylətdirdi. Əminliklə deyə bilərəm ki, bütün bunlar Ə.Kərimlinin diqtəsi ilə baş verir. Məhz T.Yaqublunun üzərində təsadüfən dayanılmayıb. Həmin persona bir qədər radikal mövqeli şəxs kimi tanınır. Ə.Kərimli 19 oktyabr aksiyasından sonra bu fikrində daha qəti olmağa başladı. Çünki o, həmin hadisələrdən sonra böyük sarsıntı və qorxu keçirib. Bu səbəbdən də meydanda aksiyaların önündə gedə biləcək bir şəxsi özünə əvəz axtarır. Qəti qərara gəlib ki, bundan sonra icazəsiz aksiyaların önünə çıxmasın. Bunun üçün də ən yaxşı namizəd olaraq T.Yaqublunu görür. Bir az loru dillə desək, indi də T.Yaqublunu xərcləməyə hazırlaşır. Çünki onun xislətində belə bir niyyət var : “kimdən nə qədər bacarırsansa, o qədər də istifadə et”.  Gələcək üçün beynində hesabladığı aksiyalar üçün önə T.Yaqublunu verəcək. Düşünmürəm ki, onların bu ittifaqı uzun sürə bilər. İnanmıram ki, T.Yaqublu Ə.Kərimlinin bütün istəklərini canla-başla yerinə yetirməyə hazır olsun. İndiki vəziyyətdə isə bu tandem üçün birlik bir qədər cazibədar görünür”.

Məhəmmədəli QƏRİBLİ

Son xəbərlər