Ermənistanın keçmiş prezidenti Serj Sarkisyan 2016-cı ildə baş vermiş Aprel döyüşləri ilə əlaqədar sorğu-sual ediləcək. Erməni KİV-nin verdiyi məlumata görə, bu barədə Ermənistanın “Mənim addımım” parlament fraksiyasının üzvü, Müdafiə və təhlükəsizlik üzrə daimi komissiyanın rəhbəri Andranik Koçaryan bildirib. Onun sözlərinə görə, Sarkisyan komissiyaya dəvət olunacaq. Bundan əvvəl isə ona hansı sualların veriləcəyi müəyyən ediləcək: “Biz əvvəlcə sualların tam siyahısını hazırlamalıyıq. Bundan sonra Sarkisyanı komissiyaya dəvət etmək olar”.
Qeyd edək ki, işğalçı Ermənistan ordusu Aprel döyüşlərində ağır məğlubiyyətlə üzləşib. O zaman Ermənistanın prezidenti Serj Sarkisyan olub.
Üstündən üç il keçməsinə baxmayaraq, Ermənistanın yeni hökuməti hələ də Aprel hadisələri ilə bağlı nələrisə üzə çıxarmağa çalışır. Bu xüsusda həmin vaxt ölkəyə rəhbərlik etmiş şəxsin də dindirilməyə dəvət olunması maraqlı görünür. Paşinyan hakimiyyəti Aprel hadisələrinin araşdırılmasında hansı məqsədləri güdə bilər?
Hatəm Cabbarlı: “Bununla Paşinyan hökuməti siyasi rəqiblərini tam izolyasiyada saxlamağa çalışdığını ortaya qoymuş olur”
Siyasi elmlər doktoru Hatəm Cabbarlı “Bakı-Xəbər”ə açıqlamasında bildirdi ki, ermənilərin bu narahatlığının köklü səbəbləri var: “1994-cü ildə tərəflər arasında atəşkəs elan olunandan sonra, 2016-cı ilin aprel ayına kimi Ermənistanın işğalçılıq siyasətində qırılma nöqtəsi yaşanmamışdı. 2016-cı ilin aprelində baş verənləri biz qırılma nöqtəsi kimi qələmə verə bilərik. Aprel hadisələri yalnız Ermənistan ordusunun zəifliyi və əmrvermə, icraetmə zəncirindəki zəiflikləri üzə çıxarmadı. Bu həm də Ermənistanda hökumətin dəyişməsi və nəticədə Serj Sarkisyanın vəzifəsindən uzaqlaşması ilə nəticələndi.
Mövcud Ermənistan hakimiyyəti daxili siyasətdə öz mövqeyini gücləndirməyə cəhd edir. Köçəryan həbsdə saxlanır. Paşinyan hakimiyyəti üçün növbəti təhlükəli fiqur Serj Sarkisyandır. Onun da başını bir şəkildə qatıb, fəaliyyət sferasını daraltmaq onların başlıca məqsədlərindən biridir. Ermənistan parlamentində “Mənim addımım” blokunun təşəbbüsü ilə gündəmə gətirilən bu məsələ elə Serj Sarkisyana yönəlik düşünülmüş siyasi təzyiq formasıdır. Komissiya sədri deyib ki, hətta ciddi faktlar ortaya çıxarsa, təqsirkarların işləri istintaqa verilə bilər. Bununla Paşinyan hökuməti siyasi rəqiblərini tam izolyasiyada saxlamağa çalışdığını ortaya qoymuş olur. Paşinyan hökuməti bununla həm də daxili ictimai rəydə sosial-iqtisadi problemləri bir az arxa plana keçirmiş olacaq. Bundan sonra komissiya cinayət işinin başlanmasını lazım bilərsə, burda məsuliyyətə cəlb edilə biləcək ilk şəxs Serj Sarkisyan olacaq. Çünki həmin vaxt ölkənin ali baş komandanı o olub. Bu həmlə ilə Paşinyan Ermənistan generalitetinin bir neçə nüfuzlu şəxsini də zərərsizləşdirə bilər. Önümüzdəki zamanda Paşinyan hakimiyyətinin Aprel kartı ilə özünə sərf edəcək tərzdə oynayacağını görəcəyik”.
Məhəmmədəli QƏRİBLİ
