Azərbaycanın hərbi məktəblərində təhsil alan əcnəbilərin sayı artır
Vaxtilə azərbaycanlı gənclər ali hərbi təhsil almaq üçün ölkəmizdən kənarlara üz tuturdularsa, bu gün hərbi təhsil üçün Azərbaycanı seçənlərin sayı get-gedə artır. Son illər Azərbaycanda hərbi təhsil sistemində baş verən böyük inkişaf xariciləri bura cəlb edir.
1939-cu ildə əsası qoyulan Azərbaycan Ali Hərbi Məktəbində yaradılan infrastruktur təhsil prosesinin müasir standartlara uyğun şəraitdə təşkilinə imkan yaradıb. Müdafiə Nazirliyindən mətbuata verilən məlumata görə, hazırda ali təhsil ocağının 4 fakültəsinin 21 kafedrasında 23 hərbi ixtisas üzrə zabitlər hazırlanır.
Təhsil ocağının daxilində hazırda 10-dan çox müxtəlif ixtisaslı məktəbin fəaliyyəti cəmləşdirilib. Təhsil müəssisəsində yaradılan müasir tədris şəraiti ali məktəbdə yerli kursantlarla yanaşı, xarici dövlətlərdən olan kursantların da yüksək səviyyədə hərbi təhsil almasına əlverişli imkan yaradıb.
Son illər hərbi məktəb bir çox xarici dövlətin hərbi təhsil müəssisələri ilə əməkdaşlıq əlaqələrinin qurulması istiqamətində ciddi addımlar atıb. Məhz bu əlaqələrin nəticəsidir ki, Heydər Əliyev adına Azərbaycan Ali Hərbi Məktəbində xarici dövlətlərdən, xüsusilə Qırğızıstan, Tacikistan və Əfqanıstandan olan kursantlar təhsil alırlar. Həmin ölkələrin kursantları yerli kursantlarla bərabər nəzəri və praktiki dərslərdə hərbi biliklər qazanırlar. O cümlədən, onlar simulyator zallarında atışların həyata keçirilməsi, artilleriya, aviasiya vasitələrinin və zirehli texnikanın, eyni zamanda, döyüş əməliyyatlarının idarə olunması kimi vərdişlərə yiyələnirlər.
Qeyd edilənə görə, Ali Hərbi Məktəbdə kursantların elektron və kompyuter siniflərində hərb elminin son nailiyyətləri ilə tanış olması, idman zallarında fiziki hazırlıqlarının artırılması və asudə vaxtlarının səmərəli təşkili üçün də lazımi şərait yaradılıb.
Artıq Qazaxıstan və Özbəkistan da öz kursantlarının Azərbaycan Ali Hərbi Məktəbində gələcəyin yüksək ixtisaslı zabitləri kimi yetişməsi üçün müraciət ediblər.
- “Həmin xarici ölkələr öz hərbi kadrlarını Azərbaycanın ali məktəbində yetişdirmək istəyirlər”
Onu da bildirək ki, hərbi təhsil sahəsindəki əməkdaşlıq çərçivəsində bu gün, eyni zamanda, azərbaycanlı kursantlar da dünyanın bir çox dövlətinin nüfuzlu ali hərbi məktəblərində təhsil alırlar. Bu əməkdaşlıq prosesi isə yalnız bir məqsədə - peşəkar zabit kadrlarının hazırlanmasına xidmət edir. Azərbaycan Respublikası Silahlı Qüvvələrinin Hərbi Akademiyasının təlim-tədris hissəsinin sabiq rəisi və akademiyanın sabiq rəis müavini, ASQ-nin ehtiyatda olan polkovniki, tanınmış hərbi ekspert Şair Ramaldanov bizimlə söhbətində bildirdi ki, artıq Azərbaycan hərbi təhsil sahəsində və zabit hazırlığlı istiqamətində böyük uğurlar əldə edib. “Bilirsiniz ki, Azərbaycan çox ölkə ilə hərbi sahədə əməkdaşlıq edir və həmin əməkdaşlıq çərçivəsində də bizə hərbi ali təhsillə bağlı müraciət edən ölkələr var. Həmin xarici ölkələr öz hərbi kadrlarını Azərbaycanın ali məktəbində yetişdirmək istəyirlər. O ki, qaldı son zamanlar bu sahədə edilən müraciətlərə, artıq Pakistan və Əfqanıstan da Azərbaycana müraciət edib. Artıq Əfqanıstandan olan namizədlər gəliblər, Pakistandan olanlar isə gəlmək üzrədir. Bu iki dövlət də peşəkar zabit hazırlığını məhz Azərbaycanın Ali Hərbi Məktəbinə etibar ediblər, onlar bu ali məktəbə üstünlük veriblər. Azərbaycanın Ali Hərbi Məktəbində yüksək peşəkarlıq səviyyəsinə malik zabit kadrları yetişdirmək üçün böyük şərait, potensial var. Amma hərbi sahədə əməkdaşlıq əlaqələri olmasa, bunlar da baş verməz. Bu proses əməkdaşlıq çərçivəsində baş verir. Xarici ölkələrlə Azərbaycan arasında hərbi əməkdaşlıq sahəsində olan müqavilədə kadr hazırlığı ilə bağlı ayrıca bənd var. Buna əsasən də kadr hazırlığı həyata keçirilir”.
Ş.Ramaldanov qeyd etdi ki, bu gün Azərbaycan hərbçiləri beynəlxalq hərbi yarışlarda üstünlük əldə edir və finala yüksəlirlər. Bunun Azərbaycanın hərbi təhsilinin güclü olmasının nəticəsi olduğunu deyən Ş.Ramaldanov hesab edir ki, Azərbaycan artıq peşəkar hərbçi kadrlar yetişdirməyə qadir ölkə kimi tanınmağa başlayıb. “Bu sahədə kadr hazırlığı üçün Azərbaycanın geniş imkanları var və xarici ölkələrdən də müraciətlər getdikcə çoxalır, bizim Ali Hərbi Məktəbdə oxumaq istəyənlərin sayı çoxdur. Ona görə də bu gün Ali Hərbi Məktəbdə olan maddi-texniki baza, müasir tələblərə cavab verən şərait, döyüş təcrübəsi olan peşəkar müəllimlərin burada dərs keçməsi çox əhəmiyyətlidir. Azərbaycanda verilən hərbi təhsil digər ölkələr tərəfindən də izlənir, öyrənilir. Bilirsiniz ki, ölkəmizdə xarici dövlətlərin hərbi attaşelikləri var. Əlbəttə, onlar Azərbaycandakı hərbi təhsilin səviyyəsi ilə bağlı məlumatları toplayır və ölkəmizdə yüksək peşəkarlıq tələblərinə cavab verən hərbi kadr hazırlığı potensialının olduğu barədə öz ölkələrinə məlumat verirlər. Azərbaycan Silahlı Qüvvələri ən nüfuzlu beynəlxalq qurumların təqdim etdiyi statistikda dünyanın 50 ən güclü orduları sırasındadır. Ölkəmiz 50 ən güclü ordu sırasında yalnız hərbi texnikası, texniki təminatı, silah-sursatı ilə deyil, həm də o texnikanı idarə edən peşəkar heyətilə seçilir. Bu gün həmin o peşəkar hərbi heyəti Azərbaycan Ali Hərbi Məktəbinin özü hazırlayıb. Demək olar ki, burada bütün sahələr üzrə mütəxəssislər hazırlanır. Əlbəttə, bu gün Azərbaycanın inkişafı hərbi təhsil verən məktəblərin də inkişafı deməkdir, bu hamısı kompleks şəkildə imkan verir ki, yüksək ixtisaslı, peşəkar heyət hazırlansın. Bu baxımdan, xarici ölkələrin hərbi sahədə kadr hazırlığı ilə bağlı Azərbaycana müraciət etməsi təbii haldır, çünki yüksək peşəkarlıq səviyyəsinə malik kadrların hazırlanmasında ölkəmizin təcrübəsi var” - deyə Ş.Ramaldanov vurğuladı.
İradə SARIYEVA
