“Milli Şura”nın noyabrın 2-nə təyin etdiyi mitinq müzakirə mövzusudur. 19 oktyabrda olduğu kimi, 2 noyabrda da radikallar müəyyən edilmiş yerdə deyil, icazəsiz olaraq şəhərin mərkəzində aksiya keçirmək istəyirlər.
Bu arada Daxili İşlər Nazirliyi və Baş Prokurorluq müxalifətin təyin etdiyi mitinqlə bağlı birgə məlumat yayıb. Məlumatda qeyd edilir ki, radikallar yenidən icazəsiz aksiya keçirmək istəyirlər. “Son günlər Əli Kərimli və Azərbaycan Xalq Cəbhəsi Partiyasının rəhbərliyində təmsil olunan digər şəxslər tərəfindən müxtəlif kanallar vasitəsilə noyabrın 2-də Bakı metropoliteninin “28 May” stansiyasının önündə qanunsuz aksiya keçirilməsinə yenidən çağırışlar edilir. Qeyd olunmalıdır ki, “Milli Şura” adlandırılan qurumun noyabrın 2-də mitinq keçirmək barədə müraciətinə Bakı Şəhər İcra Hakimiyyəti tərəfindən baxılaraq “Sərbəst toplaşmaq azadlığı haqqında” Azərbaycan Respublikası Qanununun 9-cu maddəsinin 3-cü hissəsinin 2-ci bəndinə əsasən, metropolitenin mühafizə zonalarında toplantıların keçirilməsinin qadağan edilməsi nəzərə alınmaqla, mitinq üçün “Neftçi” idman klubunun Lökbatan qəsəbəsindəki təlim-idman bazası təklif edilmiş, lakin təşkilatçılar həmin tarixdə yenə də metropolitenin qarşısında razılaşdırılmamış qanunsuz aksiya keçirəcəkləri barədə məlumatlar paylaşmışlar”.
Daha sonra deyilir: “Onlara bir daha xəbərdarlıq edilir ki, Bakı Şəhər İcra Hakimiyyətinin təklif etdiyi yerdən kənarda toplantı təşkil ediləcəyi, ictimai qaydanı, o cümlədən, hakimiyyət nümayəndələrinin qanuni tələblərinə tabe olmamaqda ifadə olunan, əhalinin dinc həyatını, rahatlığını, nəqliyyatın, müəssisə, idarə və təşkilatların normal fəaliyyətini pozan qanunsuz hərəkətlərə yol veriləcəyi təqdirdə bütün məsuliyyət üzərlərinə düşəcək”.
Görünən odur ki, radikal müxalifət icazə verilməyən yerdə qanunsuz aksiya keçirməkdə qərarlıdır. Müvafiq qurumlar da buna yol verilməyəcəyini bəyan edirlər. Belə olan halda, qanunsuz aksiya cəhdinə, orada baş verən hər hansı hadisəyə görə kim məsuliyyət daşıyacaq?
“Hesab edirəm ki, onların bu təxribatına yol verilməyəcək”
Məsələyə münasibət bildirən “İki Sahil” qəzetinin baş redaktoru Vüqar Rəhimzadənin sözlərinə görə, buna görə bütün məsuliyyət qanunsuz aksiya keçirənlərin üzərinə düşəcək: “Təbii ki, qanunsuz aksiya keçirmək istəyənlər baş verən hər hansı hadisəyə görə məsuliyyət daşıyacaqlar. Bununla bağlı yaranan istənilən situasiyaya görə onlar cavab verməli olacaqlar. Dövlət qurumları mitinqin keçirilməsi üçün uyğun ərazi ayırırsa, radikal müxalifət bundan imtina edib mərkəzdə qanunsuz aksiya keçirmək istəyirsə, o zaman istənilən hadisəyə görə məsuliyyət onların üzərinə düşür. Bütün bunlar onu göstərir ki, müxalifətin sosial bazası yoxdur. Onların məqsədi aksiya keçirmək yox, nümayişkəranə şəkildə təxribat törətməkdir. Bunun üçün çalışırlar. İstəyirlər ki, ölkədəki ictimai-siyasi sabitlik pozulsun. Ona görə də şəhərin ən gur yerində insanların rahatlığını pozmaq istəyirlər. Hesab edirəm ki, onların bu təxribatına yol verilməyəcək”.
Vidadi ORDAHALLI
