Məlum olduğu kimi, ABŞ-ın Nümayəndələr Palatası 1915-ci il hadisələrini “erməni soyqırımı” kimi tanıyan 296 saylı qətnamə qəbul edib. ABŞ-ın Nümayəndələr Palatasının qondarma “erməni soyqırımı”nı tanımasına Azərbaycan dövləti rəsmən etirazını bildirib.
Azərbaycan Prezident Administrasiyasının xarici siyasət məsələləri şöbəsinin müdiri Hikmət Hacıyev ABŞ Nümayəndələr Palatasının qondarma “soyqırım” qətnaməsini qərəzli və ədalətsiz adlandırıb: “ABŞ Nümayəndələr Palatasının qondarma “erməni soyqırımı” haqqında qəbul etdiyi 296 saylı qətnaməni pisləyir, qərəzli və ədalətsiz hesab edirik”.
H.Hacıyev qeyd edib ki, bu qətnamənin heç bir siyasi, hüquqi və tarixi əsası yoxdur, ermənipərəst lobbi qruplarının səyləri nəticəsində qəbul edilib: “Həmin dövrdə baş vermiş hadisələr siyasətçilər deyil, tarixçilər tərəfindən araşdırılmalıdır”.
Ermənistan və erməni lobbi dairələri qondarma “erməni soyqırımı”nı siyasi möhtəkirlik obyektinə çevirmişlər. Onlar bu məqsədlə ermənilərin Cənubi Qafqazda və digər regionlarda törətdikləri cinayətləri ört-basdır etməyə çalışırlar. Ona görə də Ermənistan həmin dövrün hadisələrinin birgə tarixi komissiya tərəfindən araşdırılması barədə Türkiyənin təklifini qəbul etmir.
Tarixin saxtalaşdırılması, “tarixin yenidən yazılması” cəhdləri və onun siyasi təzyiq məqsədilə istifadə edilməsi qəbuledilməzdir.
ABŞ Nümayəndələr Palatasının atdığı bu addıma Azərbaycan dövləti kəskin etirazını bildirməklə Türkiyəyə qardaşlıq sədaqətini bir daha göstərmiş oldu. Əlbəttə, Azərbaycandan başqa da dünyada türk respublikaları var. Həmin respublikalar da ABŞ Nümayəndələr Palatasının qəbul etdiyi qərarla bağlı öz mövqelərini bildirməlidirlər. Onu da vurğulayaq ki, tarixən türklər erməniləri yox, ermənilər türkləri genosidə məruz qoyub, onlar Türkiyədə, Azərbaycanda, Orta Asiya respublikalarında kütləvi qətllər törədib, soyqırım həyata keçiriblər.
“...bununla türk birliyinə xəyanət etmiş olarlar”
Azərbaycan Milli Elmlər Akademiyasının (AMEA) Qafqazşünaslıq İnstitutunun ermənişünaslıq şöbəsinin müdiri, professor Qasım Hacıyev “Bakı-Xəbər”ə bildirdi ki, Azərbaycan həmişə Türk dünyası ilə bağlı baş verən bütün proseslərə operativ reaksiya verir. Q.Hacıyevin sözlərinə görə, Azərbaycan dövlətinin ABŞ Nümayəndələr Palatasının qəbul etdiyi mənfur qərara operativ və kəskin reaksiya verməsi həm Türkiyəyə qardaşlıq sədaqətinin nümunəsidir, həm də digər türk respublikaları üçün bir örnəkdir. Azərbaycanın reaksiyasının ardınca digər türk dövlətləri də ABŞ hökumətinə, ABŞ Nümayəndələr Palatasına qəbul etdikləri qərara görə kəskin etirazlarını bildirməlidirlər. “Erməni lobbisinin qatı tərəfdarlarının təkidilə ABŞ Nümayəndələr Palatasının qondarma “erməni soyqırımı”nı tanıması ilə bağlı qəbul etdiyi qətnaməyə Azərbaycan dövlətinin kəskin şəkildə etiraz etməsi və bu barədə xüsusi bəyanat verməsi Türkiyəyə qardaşlıq sədaqətindən başqa, həm də digər türk respublikalarına bir mesajdır. Azərbaycan bununla başqa türksoylu, türkdilli dövlətlərə mesaj verir ki, bu məsələdə qardaşlıq həmrəyliyi göstərsinlər. Onillərdir ermənilər ABŞ Nümayəndələr Palatası tərəfindən qondarma “erməni soyqırımı”nın tanınmasına çalışırdılar və bu istiqamətdə təbliğat həyata keçirirdilər. Çox təəssüf ki, onlar buna nail oldular. İndi isə türk dövlətlərinin ABŞ Nümayəndələr Palatasının çıxardığı bu mənfur qərara qarşı birləşməsi, birgə mübarizə aparması gərəkdir. Hesab edirəm ki, Azərbaycanın ardınca Qazaxıstan, Türkmənistan, Özbəkistan, Qırğızıstan və digər türkdilli respublikalar bu qətnaməni pisləyən bəyanatlar yaymalı, bu qərarın qəbul edilməsi ilə bağlı kəskin etirazlarını bildirməlidirlər. Biz bu gün türk birliyindən, türk həmrəyliyindən danışırıqsa, bunu sözdə yox, əməldə göstərməliyik. Necə ki, Azərbaycan dövləti hər zaman göstərir”.
Q.Hacıyev onu da bildirdi ki, tarixdə baş verməmiş bir “soyqırım”la bağlı hazırlanan qərara ABŞ Nümayəndələr Palatasının tarixi bilməyən təmsilçilərinin imza atması tarixə qara ləkədir. “Nümayəndələr Palatasının üzvləri, ümumiyyətlə, tarixdən xəbərsizdirlər, onlar tarixi bilmirlər, onlar hər şeyi siyasətə, siyasi maraqlara qurban verirlər. Qondarma “erməni soyqırımı”nın Nümayəndələr Palatasında tanınmasına səs verən nümayəndələr XX əsrin əvvəllərində Anadoluda və Cənubi Qafqazda 2 milyondan çox türkü qətlə yetirmiş erməni quldur dəstələrinin vəhşiliklərindən bir dəfə də söz açmırlar. Ermənipərəst konqresmenlər yaxın keçmişdə Qarabağ müharibəsi zamanı dinc azərbaycanlı əhalinin məhv edilməsi barədə, Xocalı soyqırımı, Meşəli, Daşaltı faciələri haqqında danışmaq istəmirlər. Halbuki, bundan danışmalıdırlar.
Biz deyirik ki, XXI əsr türk əsridir. Bu əsrin türk əsri olması üçün türk xalqlarının və dövlətlərinin birliyi olmalıdır. Türkiyənin bu günündə bütün türk dövlətləri Azərbaycandan nümunə götürərək gecikmədən ABŞ Nümayəndələr Palatasının qərarına etiraz etməli və türk dövlətləri həmrəylik nümayiş etdirərək o bədnam qərarın ləğvinə nail olmalıdırlar. Digər türk dövlətləri ABŞ Nümayəndələr Palatasının qondarma “erməni soyqırımı”nın tanınması ilə bağlı qəbul etdiyi qərara etiraz etməzlərsə, səslərini qaldırmazlarsa, Türkiyə ilə həmrəylik nümayiş etdirməzlərsə, bununla türk birliyinə xəyanət etmiş olarlar. Biz türk birliyindən danışırıqsa, ortaq türk tarixindən söz açırıqsa, bu məsələdə də həmrəy olmalıyıq” - deyə bildirən Q.Hacıyevin sözlərinə görə, bu məsələdə Azərbaycan dövləti ilə yanaşı, Azərbaycan cəmiyyəti də, elmi ictimaiyyəti də, bütün qurum və təşkilatlar da Türkiyənin yanındadır.
İradə SARIYEVA
