Məlum olduğu kimi, Azərbaycanın Birinci vitse-prezidenti Mehriban Əliyevanın tapşırığı ilə ölkənin eks-prezidenti mərhum Əbülfəz Elçibəyin evi təmir olunub.
Elçibəyin oğlu Ərturqut Əliyev bununla əlaqədar Mehriban Əliyevaya təşəkkür edib: “Azərbaycanın Birinci vitse-prezidenti Mehriban Əliyevaya təşəkkürümüzü bildirirəm. Bizim yaşadığımız evin təmiri ilə bağlı müraciət öz həllini tapdı və yaxın günlərdə təmir olunan evimizə yerləşəcəyik”.
Qeyd edək ki, Ə.Elçibəyin həyat yoldaşı Həlimə Əliyeva vəfatından bir qədər əvvəl Birinci vitse-prezident Mehriban Əliyevaya Binəqədi rayonu, Rəsulzadə qəsəbəsində yerləşən evlərinin təmiri ilə bağlı müraciət ünvanlayıb. M.Əliyevanın tapşırığına əsasən, Heydər Əliyev Fondu tərəfindən evdə yenidənqurma və təmir işləri həyata keçirilib. İkimərtəbə və mansarddan ibarət yaşayış evində, həmçinin, kanalizasiya, işıq və su sistemi tamamilə yenilənib. Yaşayış evinin yerləşdiyi həyətyanı sahə abadlaşdırılıb. Heydər Əliyev Fondu yayılan məlumatı təsdiqləyərək artıq təmir işlərinin başa çatdığını qeyd edib.
Artıq neçənci dəfədir Mehriban xanım bu kimi humanist xarakterli işlər görür. Birinci vitse-prezidentin gördüyü xeyriyyə işləri cəmiyyətdə həmrəyliyi daha da gücləndirir. Eyni zamanda, bu, vətəndaşları toparlayır. Siyasi görüşlərindən asılı olmayaraq, bunu bütün insanlar təqdir edirlər. Bir sözlə, bu yöndə görülən işlər toplumda həmrəyliyə xidmət edir.
“Cəmiyyətdə vətəndaş həmrəyliyinin daha geniş müstəvini əhatə etməsinə gətirib çıxaracaq”
Sözügedən məsələ ilə bağlı fikirlərini “Bakı-Xəbər”lə bölüşən şərqşünas Seyid Camal Əzimbəylinin sözlərinə görə, Mehriban xanımın bu yöndə gördüyü işlər humanizmə, həmrəyliyə xidmət edir: “Ona görə də bu istiqamətdə atılan addımları çox yüksək dəyərləndirirəm. Qarabağ Seyid Ocaqları adından və yüz minlərlə peyğəmbər, Əhlibeyt sevənlər adından deyirəm ki, bu çox təqdirəlayiq haldır. Gündə onlarla şəhid və qazi ailələri ilə bir arada olan şəxs olaraq bunu deyirəm. Cəmiyyətdə Mehriban xanımın gördüyü işlər birmənalı olaraq təqdir olunur. Çünki bu, mərhəmətin, şəfqətin, rəhmətin aynasıdır. Düşünürəm ki, görülən bu iş ölkəmizdə vəhdətin gözəl bir nümunəsidir. Mehriban xanımın humanist xarakterli bu addımları Azərbaycanda birlik və bərabərliyi daha da gücləndirəcək. Hesab edirəm ki, eks-prezident Əbülfəz Elçibəyin evinin təmir olunması toplumda vətəndaş həmrəyliyinin daha geniş müstəvini əhatə etməsinə gətirib çıxaracaq. Ona görə də bütün bunlar dövlətimizin və xalqımızın mənafeyinə xidmət edir”.
Vidadi ORDAHALLI
