Avropa Şurası Venesiya Komissiyasının prezidenti Cani Bukikio Ermənistan hökuməti ilə Konstitusiya Məhkəməsi arasındakı münaqişədən ciddi narahatlığını ifadə edib.
Venesiya Komissiyasının prezidenti bununla bağlı bəyanat verib. Bəyanatda deyilir: “Son aylar Ermənistandakı prosesləri yaxından izləyirəm və bir tərəfdən hökumətlə parlament, digər tərəfdən Konstitusiya Məhkəməsi ilə açıq qarşıdurmadan narahatam. Hadisələrin belə tez əvəzlənməsi problemlərin həllinə kömək etmir".
VK prezidenti vurğulayıb ki, Konstitusiya Məhkəməsi konstitusiya dəyərlərinin qorunması həvalə olunan müdafiə institutudur. Demokratik ölkələrdə bütün dövlət qurumları və vəzifəli şəxslər öz öhdəliklərinə hörmətlə yanaşmalı, eyni zamanda, digər qurumların hüquqlarını tanımalı və hörmət etməlidirlər. Onlar müvafiq prosedurlara riayət etməlidirlər: “Əgər bu baş verməzsə, kifayət qədər demokratik mədəniyyət və tamlıq olmazsa, dövlət qurumlarının fəaliyyətinə təhlükə yaranacaq, cəmiyyətin demokratik, vətəndaş və iqtisadi tərəqqisi təhlükə altına düşəcək. Bu, həyəcanverici vəziyyəti yüngülləşdirmək və Ermənistan Konstitusiyasının normal fəaliyyətini bərpa etmək üçün bütün tərəfləri təmkinli olmağa, qarşılıqlı hörmət və konstruktiv institusional əməkdaşlığa çağırıram”.
Paşinyan Baş nazir seçiləndən sonra hökumətlə Konstitusiya Məhkəməsi arasında qarşıdurma yaranmağa başladı. Əslində, məsələnin mahiyyəti onunla əlaqədardır ki, Paşinyan Konstitusiya Məhkəməsini öz iradəsinə tabe etdirmək istəyir. İstəmir ki, ölkədə müstəqil məhkəmə sistemi olsun. Avtoritar Paşinyan rejimi ölkədəki sonuncu müstəqil qurumun axırına çıxmaq istəyir. Qarşıdurmanın kökündə dayanan başlıca faktor bununla bağlıdır.
“Gör Ermənistanda vəziyyət nə yerə gəlib çatıb ki, Konstitusiya Məhkəməsi sədrinin adı cinayət işində hallanır”
Məsələyə münasibət bildirən Siyasi İnnovasiya və Texnologiyalar Mərkəzinin sədri Mübariz Əhmədoğlunun sözlərinə görə, Ermənistan Baş naziri Nikol Paşinyan istəyir ki, onun maraqlarına uyğun məhkəmə hakimiyyəti formalaşsın: “Əvvəla Ermənistan Konstitusiya Məhkəməsinin sədri Hrayr Tovmasyan mələk deyil. O özü də əvvəlki Serj Sarkisyan rejiminin təmsilçisi olub. Əvvəlki hakimiyyət dönəmində Konstitusiya Məhkəməsi bir sıra ədalətsiz qərarlar qəbul edib. Bunları həyata keçirən də məhz H. Tovmasyan olub. Bir sözlə, Ermənistanda Konstitusiya Məhkəməsi əvvəlki hakimiyyətə yaxın olduğu üçün, Paşinyan bundan narahatdır. Ancaq, istənilən halda, hökumətlə məhkəmə arasında yaşanan qarşıdurma Paşinyanın artan avtoritarizmindən xəbər verir. Venesiya Komissiyasının məlum narahatlığı təkcə ölkədə artan avtoritarizm meylləri ilə bağlı deyil. Burada digər amillər də var. Məsələ ondadır ki, Ermənistandakı hüquqi və demokratik sistemin bütün əsaslandırmalarını Venesiya Komissiyası verib. Sözügedən komissiya bilirdi ki, Ermənistan Konstitusiyasında nə qədər boşluq var. Onlar yaxşı bilirlər ki, Prezidentin səlahiyyəti harada başlayır, Baş nazirin səlahiyyəti harada bitir. Baxmayaraq ki, bütün bunlar ölkə qanunvericiliyində o qədər də dəqiq göstərilməyib. Bütün bu məsələlərdə Venesiya Komissiyası müəyyən məsuliyyət daşıyır. Narahatlıq həm də bununla bağlıdır. Dünyanın heç yerində, ən azından, Avropada Konstitusiya Məhkəməsinə rəhbərlik edən şəxs həbs olunmayıb. Gör Ermənistanda vəziyyət nə yerə gəlib çatıb ki, H.Tovmasyanın adı cinayət işində hallanır. Bir müddət sonra Tovmasyan həbs olunsa, o zaman bu, Venesiya Komissiyasının da nüfuzuna xələl gətirəcək”.
Vidadi ORDAHALLI
