Son illərdə Azərbaycanı sevməyən bəzi daxili və xarici güclər hər vasitə ilə ölkə rəhbərliyi tərəfindən həyata keçirilən və xalqımızın rifah halının daha da yaxşılaşmasına xidmət edən tədbirlərin üzərinə ləkə salmağa cəhd edirlər. Bu baxımdan Prezident İlham Əliyev tərəfindən ötən həftədən başlayaraq həyata keçirilən islahatlar vəziyyətdən istifadə etməyə cəhd edən və qisas ovqatı ilə alışıb yanan bəzi dairələrin əlinə öz çirkin məqsədlərini həyata keçirmək üçün fürsət verib.
Bunu Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun qərəzli şəkildə hədəfə alınması da bir daha sübut etməkdədir. Nə qədər qəribə olsa da, ölkə rəhbərliyinin həyata keçirdiyi islahatlara kölgə salmaq istəyənlərdən biri də Ana Vətən Partiyasının sədri, millət vəkili Fəzail Ağamalı, Əliağa Hüseynov və təqaüdçü Qulu Məhərrəmlidir. Azərbaycanda xalq hərəkatı başlayandan sonra dəfələrlə mövqeyini dəyişən və Heydər Əliyevin hakimiyyətə yenidən qayıdışından sonra özünü iqtidar tərəfdarı kimi qələmə verən və bununla da millət vəkili seçilməyə nail olaraq kifayət qədər imtiyaz əldə edən Fəzail Ağamalının dövlətçiliyimizə xidməti isə ara-sıra parlamentdə boğazdan yuxarı İlham Əliyevin kursunu dəstəklədiyini bildirən çıxışları və bu ruhda bəzi KİV-lərə verdiyi açıqlamalar olub. Lakin əməli fəaliyyətdə onun bu açıqlamaları hər hansı bir şəkildə öz əksini tapmayıb. Bunu Fəzail Ağamalının prezident İlham Əliyev tərəfindən dəstəklənən KİVDF-nin fəaliyyətini şübhə altına salma cəhdləri də bir daha təsdiq etməkdədir. Fəzail Ağamalı mətbuata verdiyi açıqlamasında hər hansı bir fakta əsaslanmadan KİVDF-nin fəaliyyətindən narazılığın olduğunu, bəzi jurnalistlərin 2-3 dəfə mənzil aldığını və bu sahədə şəffaflığın təmin edilməsinin, adı çəkilən sahədə islahatlar keçirilməsinin vacib olduğunu bəyan edib. Amma adını millət vəkili qoyan Ana Vətən Partiyasının sədri Fəzail Ağamalının əlində heç bir fakt olmadan əsassız iddialarla çıxış etməsi və prezidentin KİV-lərə göstərdiyi qayğını, onlar üçün binalar inşa edilməsini şübhə altına alması ölkə rəhbərliyinin müsbət işlərinə kölgə salmağa cəhd edən təxribatçı güclərə verilən dəstəkdən başqa bir şey deyil.
Fəzail Ağamalının KİVDF-yə münasibətdə qərəzli açıqlamaları və onun prezidentin fəaliyyətinə kölgə salmaq istəyən bəzi güclər tərəfindən dərhal dəstəklənməsi də bir daha dediklərimizin sübutu hesab edilə bilər. Bütün bunlar da əslində Fəzail Ağamalının üzdə dövlətçiliyi dəstəklədiyinı, ancaq pərdə arxasından prezidentin fəaliyyətinə kölgə salmaq istəyən qüvvələri dəstəklədiyi ehtimalını bir daha üzə çıxarır. Əgər həqiqətən də Fəzail Ağamalı özünün iddia etdiyi kimi dövlətçiliyi, prezident İlham Əliyevin siyasətini dəstəkləyirdisə, onda o, məsələ ilə bağlı ondan-bundan eşitdiyi sözlərlə deyil, faktlara istinad edərək məsələni rəsmi şəkildə gündəmə gətirərdi. Amma o bunu etməyib və öz çirkin xislətinə uyğun olaraq hər hansı fakta əsaslanmadan KİVDF-ni hədəfə alaraq ölkə rəhbərliyi səviyyəsində görülən işlərə ləkə salmağa çalışıb. Fəzail Ağamalı KİVDF-ni hədəfə almazdan öncə yaxşı olardı ki, parlamentdəki 5 il ərzində ağzına su alıb oturan bəzi millət vəkillərinin fəaliyyətinə qiymət verəydi, onların bu müddət ərzində nə ilə məşğul olduğu ilə maraqlanaydı. Digər tərəfdən də millət vəkili olaraq Fəzail Ağamalı nə vaxt xalqın problemlərini parlament qarşısında qaldıraraq onların həllinə cəhd edib. Bax bunu demək çətindir.
Halbuki Fəzail Ağamalının “seçildiyi” seçki dairəsində kifayət qədər problemlər mövcuddur və onların aradan qaldırılması onun üzərinə düşüb. Və yaxud millət vəkili kağız üzərində deyil, rəsmi şəkildə sonuncu dəfə nə vaxt seçiciləri ilə görüşərək onların problemləri ilə maraqlanıb? Fəzail Ağamalı kifayət qədər millət vəkili imtiyazlarından istifadə edərək özünə yaxşı gün ağlaya bilib və əsl kapitalist kimi yaşayır. Bunun əvəzində isə o xalqa heç nə verməyib.
Nəhayət, 72 yaşlı Fəzail Ağamalı əgər prezidentin həyata keçirdiyi islahatları dəstəkləyirsə, niyə millət vəkili kimi və eyni zamanda partiya sədri kimi yaşına görə dərhal istefa verməyib? Əgər həqiqətən də prezidentin fəaliyətini dəstəkləyirsənsə zəhmət çək, ərizəni yaz, istefa ver, öz yerini partiyanda olan cavan üzvlərə təhvil ver.
Eyni sözləri Fəzail Ağamalını dəstəkləyən millət vəkili Əliağa Hüseynov barəsində də demək olar. Əliağa Hüseynovun hərbi komissar işlədiyi vaxt hansı oyunlardan çıxdığı isə heç kimə sirr deyil və bu barədə illər öncəsi mətbuatda kifayət qədər məlumatlar gedib. Onun hərbi komissar işlədiyi vaxt rüşvət alaraq cağırışçılara ordudan möhlət hüququnun verilməsi üçün az qala qiymət cədvəli tərtib edib komissarlıqda divardan asmışdı: Qısa müddətli möhlət üçün 500-700 usd, uzun müddətli möhlət üçün 1500-2000 usd müəyyən etmişdir. Yaxşı olardı ki, onun komissar kimi fəaliyyət göstərdiyi illərdə Baş prokuror yanında Korrupsiyaya qarşı Mübarizə Baş İdarəsi araşdırma aparsın və həmin illərdə möhlət hüququ verilən çağırışçılardan hansı əsaslarla xidmətə göndərilməyiblər. Əgər dəqiq araşdırılma aparılarsa keçmiş komisarın dəbdəbəli villaları, restoranları və şadlıq saraylarını hansı pulla əldə etdiyi üzə çıxar. Vergilər Nazirliyi həmin müəssisələri yoxlasa, dövlət büdcəsindən nə qədər yayınmalar olduğu görünər.
Nəhayət Əliağa Hüseynovun millət vəkili kimi parlamentdə prezidentin siyasi kursunu dəstəklədiyi barədə çıxış etməsini də xatırlamaq çətindir, əgər prezident kursunu dəstəkləyirsə onda 72 yaşı olduğu üçün özü birinci getməlidir. Amma belə bir adamın ölkə rəhbərliyi tərəfindən dəstəklənən KİVDF-nin fəaliyyətinə ləkə salmağa cəhd edən Fəzail Ağamalını dəstəkləməsi də onun çirkin niyyətindən xəbər verir. Fəzail Ağamalı kimilərinə ən layiqli cavabı da daim ölkə rəhbərliyini dəstəkləyən xalqımız verəcək.
Qulu Məhərrəmliyə gəldikdə isə, biz onu savadlı jurnalist kimi tanıyırdıq, ancaq bu çıxışlarından görünür ki, heç bir fakta istinad etmədən qərəzli mövqe tutub. Qulu müəllimi başa düşmək olar, çünki 10 ildən çoxdur ki, o media aləmində yox kimidir. Jurnalistikanın İnkişafına Yardım Fondunun isə özü kimi heç bir fəaliyyəti görünmür. Yaxşı olardı ki, Qulu Məhərrəmlinin yaratdığı qurum Kütləvi İnformasiya Vasitələrinə və jurnalistlərə göstərdiyi hansısa yardım haqqında hesabat versin.
Emin AXUND “Oxu məni” qəzetinin baş redaktoru, “Mediainfo” təsisçisi...
