Fransa parlamentinin keçmiş üzvü, Fransa - “Artsax” dostluq qrupunun yaradıcısı Fransua Roşbulan qondarma qurumla bağlı ölkə məhkəmələrinin çıxardığı qərardan təəssüflənib.
O bununla bağlı fikirlərini belə ifadə edib: “Fransanın inzibati məhkəmələri tərəfindən Fransa ilə “Artsax” arasında imzalanmış 5 dostluq xartiyasının ləğv edilməsi məqbul hal deyil. Bu mənim üçün qəbuledilməzdir”.
F.Roşbulan qeyd edib ki, guya qondarma qurum sakinləri təcrid olunmuş vəziyyətdə, blokadada yaşayırlar və qonşu Azərbaycan onları hər gün təhdid edir. Daha sonra o bunları deyib: “Bakı üçün göstərilən xartiyaların ləğv olunması o deməkdir ki, Fransa Azərbaycan tərəfinin səsləndirdiyi təhdidləri təşviq edir”.
O, həmçinin, Fransa Xarici İşlər Nazirliyinin davranışından təəssüfləndiyini bildirib və qeyd edib ki, Fransanın Cənubi Qafqazda nüfuzu getdikcə zəifləyir.
Göründüyü kimi, Fransa ilə Azərbaycanın münasibətləri yaxınlaşdıqca, erməni lobbisi də fəallaşmağa çalışır. Hər vəchlə iki ölkə arasında müşahidə olunan yaxınlaşmanı pozmağa çalışırlar. Mümkün olan qədər istəyirlər ki, buna zərər vursunlar. Bu baxımdan erməni lobbisinin fəallaşması fonunda göstərilən proses hara aparır?
Ramil Hüseynov: “Bu onu göstərir ki, erməni lobbisi sakit dayanmaq niyyətində deyil”
Məsələyə münasibət bildirən VİP-in sədr müavini Ramil Hüseynovun sözlərinə görə, bundan sonra bu kimi təxribatlara hər zaman hazır olmalıyıq: “Baxın, Fransa inzibati məhkəmələrinin məlum qərarından sonra həmin bələdiyyə sədrləri ermənilərlə mənən həmrəy olduqlarını bəyan etdilər. Ondan sonra erməni təəssübünü çəkən digər şəxslər bənzər açıqlamalar verdilər və məhkəmələrin bununla bağlı verdiyi qərarı pislədilər. İndi F.Roşbulan düşüb ortalığa. Bütün bunlar nəyi göstərir? Bunlar onu göstərir ki, erməni lobbisi sakit dayanmaq niyyətində deyil. Onlar son aylar Fransa və Azərbaycan arasında bir sıra sahələrdə müşahidə olunan yaxınlaşmadan, iqtisadi və hərbi sahədə əməkdaşlığın genişlənməsindən bərk narahatdırlar. Bu səbəbdən bütün resurslarını işə salaraq bu yaxınlaşmanı pozmağa çalışırlar. Fransanın böyük dövlətçilik ənənələrinin olduğunu nəzərə alsaq, rəsmi Paris, hər halda, öz dövlət maraqlarından çıxış edəcək. Yəni ermənilərin xeyrinə Azərbaycana qarşı hər hansı geri addım atacağını gözləmirəm. Erməni lobbisi iki ölkə arasında münasibətləri, yaxınlaşmanı poza bilməyəcək. Ancaq buna baxmayaraq, biz arxayın olmamalıyıq. Hər an erməni lobbisinin təxribatlarına hazır olmalıyıq və müvafiq adekvat addımlar atılmalıdır. Bununla belə, Azərbaycan Fransada diaspor fəaliyyətini gücləndirməlidir. Nəzərə almaq lazımdır ki, Fransada çoxsaylı erməni yaşayır və çox güclü diasporları var. Bu səbəbdən son dərəcə ayıq olmaq və Fransadakı dairələrlə daim işləmək lazımdır”.
Vidadi ORDAHALLI
