Məlum olduğu kimi, Avropa Şurasının insan hüquqları üzrə komissarı xanım Dunya Miyatoviç Azərbaycana səfəri çərçivəsində fərqli spektrin təmsilçiləri ilə görüşüb.
Qaçqınların və Məcburi Köçkünlərin İşləri üzrə Dövlət Komitəsinin sədri Rövşən Rzayev ölkəmizdə səfərdə olan Dunya Miyatoviçin rəhbərlik etdiyi nümayəndə heyətini qəbul edib. Dövlət Komitəsinin sədri qonağa Ermənistan-Azərbaycan Dağlıq Qarabağ münaqişəsi nəticəsində qaçqın və məcburi köçkün vəziyyətinə düşmüş 1 milyon 200 mindən çox soydaşımızın üzləşdiyi məhrumiyyətlər, məruz qaldıqları maddi və mənəvi itkilər, bu problemin həllinə beynəlxalq təşkilatların münasibəti, dövlətimizin öz imkanları daxilində gördüyü işlər və qarşıda duran vəzifələr haqqında məlumat verib. Qeyd olunub ki, təcavüzkar Ermənistan hələ də Azərbaycan ərazilərini işğal altında saxlamaqla bu ərazilərin əzəli sabibi olan yüz minlərlə insanın hüquqlarını pozmaqda davam edir. Eyni zamanda, bildirilib ki, Azərbaycanda qaçqınlar və məcburi köçkünlərlə iş üzrə düşünülmüş və effektiv dövlət siyasəti həyata keçirilir. Prezident İlham Əliyev məcburi köçkünlərin mənzil-məişət şəraitinin yaxşılaşdırılmasını, maddi rifahının yüksəldilməsini sosial siyasətin prioritetlərindən biri kimi müəyyənləşdirib. Birinci vitse-prezident xanım Mehriban Əliyeva məcburi köçkünlərin problemlərinin həlli üçün məqsədyönlü iş aparır.
Xanım Dunya Miyatoviç görüşə və ətraflı məlumata görə təşəkkür edib, Dövlət Komitəsi ilə əməkdaşlığı yüksək qiymətləndirdiyini, budəfəki səfərində əsas məqsədinin insan və vətəndaş hüquq və azadlıqlarının təmini sahəsində hərtərəfli yardım göstərmək, bu prosesə dəstək vermək olduğunu bildirib.
Bakının Yasamal rayonunda yerləşən Azərbaycan Texniki Universitetinin yataqxanası və Sabunçu rayonunda salınan "Şuşa şəhərciyi"ndə məcburi köçkünlərlə görüş keçirdiyini xatırladan Dunya Miyatoviç ölkəmizə yenə səfər edəcəyini söyləyib.
Azərbaycanda səfərdə olan Avropa Şurasının insan hüquqları üzrə komissarı Dunya Miyatoviçin rəhbərlik etdiyi nümayəndə heyəti ilə baş prokuror Zakir Qaralov da görüşüb. Baş Prokurorluğun Mətbuat xidmətindən verilən məlumata görə, baş prokuror Avropa Şurası ilə əməkdaşlığa böyük önəm verdiyini xüsusi vurğulayaraq, müstəqillik əldə etdikdən sonra xalqımızın ümummilli lideri Heydər Əliyevin rəhbərliyi altında ölkəmizdə insan hüquq və azadlıqlarının müdafiəsi sahəsində görülmüş məqsədyönlü işlər barədə ətraflı məlumat verib.
Prezident İlham Əliyevin rəhbərliyi ilə ölkədə məhkəmə-hüquq islahatlarının uğurla davam etdirildiyini bildirən baş prokuror, müasir dövrün tələblərinə cavab verən ədalət mühakiməsi sisteminin formalaşdırılması, "Penitensiar sahədə fəaliyyətin təkmilləşdirilməsi, cəza siyasətinin humanistləşdirilməsi və cəmiyyətdən təcridetmə ilə əlaqədar olmayan alternativ cəza və prosessual məcburiyyət tədbirlərinin tətbiqinin genişləndirilməsi barədə” Azərbaycan Respublikası Prezidentinin Sərəncamının icrası ilə əlaqədar Cinayət Məcəlləsinə edilmiş dəyişikliklər, eləcə də "Məhkəmə-hüquq sistemində islahatların dərinləşdirilməsi haqqında” Azərbaycan Respublikası Prezidentinin 3 aprel 2019-cu il tarixli Fərmanından irəli gələn vəzifələrin yerinə yetirilməsi istiqamətində görülmüş işlər barədə qonaqları məlumatlandırıb.
Avropa Şurasının insan hüquqları üzrə komisarı Dunya Miyatoviç Azərbaycana səfəri çərçivəsində bir qrup hüquq müdafiəçisi, vəkil və vəkillikdən kənarlaşdırılan hüquqşünaslarla da görüşüb. Görüşdə ölkədə insan hüquqlarının durumu, vəkillik fəaliyyəti, media azadlığı məsələləri diqqət mərkəzində olub. Müzakirələr zamanı vəkillərin Vəkillər Kollegiyasından kənarlaşdırılması, bəzi vəkillərin bank hesablarının bağlanması, onlara tənbeh, töhmət verilməsi ətrafında müzakirə aparılıb. Müzakirələr zamanı D.Miyatoviç bu məsələləri hökumət qurumları qarşısında qaldıracağını vəd edib.
D.Miyatoviçin olkəmizə səfəri, keçirdiyi görüşlər və səsləndirdiyi fikirlər barədə ekspertlər nə düşünürlər?
Rəfail Becanov: “Azərbaycanın daxilində olan problemlərin həlli ilə bağlı üçüncü tərəfin iştirakı, onların məsələyə müdaxiləsini zəruri saymırıq”
Razi Nurullayevin rəhbərlik etdiyi AXCP-nin funksioneri Rəfail Becanov “Bakı-Xəbər”ə açıqlamasında bildirdi ki, Avropa strukturlarına bağlı olan qurumlarla qarşılıqlı səfərlərin təşkili, münasibətlərin intensiv xarakter almasını müsbət dəyərləndirirlər: “Bizim mövqeyimiz həm də bundan ibarətdir ki, Azərbaycanın daxilində olan problemlərin həlli ilə bağlı üçüncü tərəfin iştirakı, onların məsələyə müdaxiləsini zəruri saymırıq. Problemlərlə üzləşən təsisatlar hökumət qurumları ilə birbaşa təmaslara getsələr, məsələnin həlli daha operativ olar. Hesab edirəm ki, həm hökumət, həm də vətəndaş cəmiyyətinin özü bu məsələdə maraqlı olmalıdır. Çünki üçüncü tərəflərin iştirakı ilə bəzi məsələlər müzakirə ediləndə, həmin üçüncü tərəf öz maraqlarının da təmin olunmasına çalışır. Ümumilikdə götürdükdə Azərbaycanı Avropanın bir parçası kimi qəbul edirik. Bu da ölkəmizin Avropa strukturlarına inteqrasiya olunmasını zəruri edir. Qarşılıqlı səfərlər etimad mühitinin yaranmasına müsbət təsir edir. Sadəcə, daxili işlərimizə qarşmamaq şərti əsas götürülməlidir”.
Rauf Zeyni: “Yaxşı olar ki, Miyatoviç insan haqları probleminə bir qədər qlobal aspektdən yanaşsın”
Milli Qeyri-Hökumət Təşkilatları Forumunun prezidenti Rauf Zeyni “Bakı-Xəbər”ə açıqlamasında bildirdi ki, D.Miyatoviçin ölkəmizə səfəri və burdakı təmasları barədə məlumatlıdır: “Xanım Miyatoviç iyulun 8-dən Bakıda səfərdədir. Təmsil etdiyi qurumun mandatına uyğun olaraq müəyyən təmaslarda olub. Bir sıra siyasi və başqa məzmunlu görüşlər keçirib. Öz tarixi torpaqlarından didərgin düşən məcburi köçkünlərlə təmasda olub, onların problemləri, istəkləri ilə maraqlanıb.Həmin görüşlərdə qarşılıqlı fikir mübadiləsi aparılıb. Belə görüşlər bizim üçün yenilik deyil. Azərbaycan müstəqillik əldə edəndən sonra ATƏT, Avropa Şurası, BMT kimi qurumların nümayəndələri tez-tez bura səfərlər edib, səlahiyyətlərinə aid olan müxtəlif görüşlər keçiriblər. Amma təəssüflər olsun ki, bu görüşlərin real nəticəsi yoxdur. BMT-nin qətnamələri yerinə yetirilmir, Avropa Şurasının hadisələrə real təsir mexanizmi yoxdur. Ermənistana qarşı beynəlxalq hüquq normaları çərçivəsində sanksiyalar tətbiq edilmir. İşğalçı ordu Azərbaycandan çıxarılmır. Biz artıq 30 ildir həmin qurumlardan real addım, konkret nəticə gözləyirik. Düşünürəm ki, Miyatoviçin təmsil etdiyi qurum formalizmdən bir qədər uzaqlaşmalıdır. Mümkün qədər səylərini artırmalıdır ki, Azərbaycan torpaqları işğaldan azad edilsin. Miyatoviç hətta müxalif fikirli adamlarla da görüşüb. Vəziyyətlə bağlı aydın təsəvvür formalaşıb. Yaxşı olar ki, Miyatoviç insan haqları probleminə bir qədər qlobal aspektdən yanaşsın. Hansısa vəkilin kollegiyadan uzaqlaşmasına ən vacib insan haqları problemi kimi yanaşmasın. Bir milyondan artıq insanın pozulan hüquqlarının qorunması uğrunda fəaliyyətini göstərsin”.
Məhəmmədəli QƏRİBLİ
