2014-cü il iyulun 11-də Rusiya vətəndaşı Dilqəm Əsgərov və Azərbaycan vətəndaşı Şahbaz Quliyev Kəlbəcərdə öz ata-baba yurdlarını ziyarət etmək istəyərkən Ermənistan əsgərləri tərəfindən girov götürülüb, Azərbaycan vətəndaşı Həsən Həsənov isə öldürülüb.
2014-ci il oktyabrın 2-də Həsən Həsənovun nəşi qarşı tərəfdən alınıb və oktyabrın 4-də o, Bakının Binəqədi qəbiristanlığında dəfn edilib. İşğal altındakı Dağlıq Qarabağda qurulan qanunsuz "məhkəmə"nin qərarı ilə Dilqəm Əsgərov ömürlük, Şahbaz Quliyev isə 22 il müddətinə azadlıqdan məhrum ediliblər. 2015-ci ildə girovlarımızla bağlı İnsan Haqları üzrə Avropa Məhkəməsinə müraciət edilib. Avropa Şurasının baş katibinə, habelə qurumun insan hüquqları üzrə müvəkkilinə də çağırışlar edilərək bu 2 azərbaycanlı girovun dərhal və qeyd-şərtsiz azad olunması üçün müvafiq addımlar atılması istənilib. Lakin heç bir müraciətə məhəl qoyulmur, girovlar hələ də zorakılığa məruz qalırlar. Rəsmi Bakının təklif etdiyi “Hamının hamıya” prinsipi üzrə əsir və girovların dəyişdirilməsinə qarşı tərəf razılaşmır.
Bütün bunların fonunda, beynəlxalq qurumların onların azad edilməsi ilə bağlı Ermənistana təzyiqlərini yetərli saymaq olarmı?
Əhməd Şahidov: “Bir növ, onları bu məsələyə diqqət göstərməyə məcbur edirik”
Məsələyə münasibət bildirən Azərbaycanlı Əsir və Girovlarla bağlı Məlumat Mərkəzinin koordinatoru Əhməd Şahidov beynəlxalq qurumların bu yöndə fəaliyyətini qənaətbəxş hesab etmədiyini bildirdi: “Əvvəla azərbaycanlı əsir və girovların azad edilməsi ilə bağlı Azərbaycan tərəfi kompleks işlər aparır. Bu işlər iki planda aparılır. O cümlədən, Dilqəm Əsgərovla Şahbaz Quliyevin azad edilməsi ilə bağlı da işlər görülür. İlk növbədə həmin mülki girovların qısa bir zaman ərzində azad olunması vacib məsələdir. Çünki müddətin uzanması onların səhhətinə mənfi təsir edir. Bu baxımdan, Azərbaycan dövləti, Xarici İşlər Nazirliyi, Prezident Administrasiyası, ölkə başçısı cənab İlham Əliyev, vətəndaş cəmiyyəti və mətbuat bu yöndə intensiv iş aparır. Bütün mümkün beynəlxalq tribunalarda Ermənistanı ifşa etmək və dünya ictimaiyyətinin diqqətini Qarabağ münaqişəsinə çəkmək yönündə səylər göstərilir. Bu istiqamətdə son 5 ildə Azərbaycan kifayət qədər gərgin, faydalı bir təcrübə keçmiş oldu. Beynəlxalq təşkilatların bu məsələdə Ermənistana təsirləri yetərli səviyyədə deyil. Beynəlxalq təşkilatlar, ictimaiyyət hər zaman Dağlıq Qarabağ münaqişəsinə, Azərbaycan həqiqətlərinə ikili standartlardan yanaşır. Bir növ, Dağlıq Qarabağ münaqişəsində, Azərbaycanın ərazi bütövlüyü məsələsində çalışıb ki, hər zaman ölkəmizə qarşı “üç meymun” oynunu oynasın. Ancaq Azərbaycanın artan siyasi gücü, regional əhəmiyyəti və davamlı şəkildə beynəlxalq platformalarda bu mövzunu təkrar-təkrar qaldırması bu məsələdə müəyyən effekt verir. Yəni, bir növ, onları bu məsələyə diqqət göstərməyə məcbur edirik. Bunun nəticəsidir ki, artıq Dilqəm Əsgərov və Şahbaz Quliyevlə bağlı Avropa İnsan Haqları Məhkəməsində kommunikasiya prosesi yekunlaşıb. Artıq yaxın həftələr ərzində məhz AİHM-in ilkin qərar açıqlayacağı gözlənir. Daha sonra bu qərarın həyata keçirilməsi, icra olunmsı Avropa Şurası Nazirlər Kabinetinin səlahiyyətindədir. İnanmaq istəyirəm ki, beynəlxalq təşkilatlar öz qərarlarına, bəyanatlarına, beynəlxalq imiclərinə hörmət əlaməti olaraq bu qərarların icrasına nəzarət edəcəklər. Rəsmi İrəvana qarşı hər hansı beynəlxalq təzyiq, sanksiyalar tətbiq edəcəklər ki, nəhayət, girovlarımız azadlığa çıxsın. Ancaq ümumən götürəndə Avropa institutlarında hər zaman Azərbaycana və Dağlıq Qarabağ münaqişəsinin humanitar fəsadlarına qarşı ikili standartlar tətbiq olunur”.
Vidadi ORDAHALLI
