Azərbaycan 2019-cu ilin 10 mayında Sakit Okean Alyansının (Pacific Alliance) Meksikanın Mexiko şəhərində keçirilən Nazirlər Şurasının növbəti görüşündə müşahidəçi statusu alıb.
Bu arada Sakit Okean Alyansının (SOA) Perunun paytaxtı Limada keçirilən 14-cü zirvə görüşündə Ermənistana da müşahidəçi statusu verilib. Belə ki, iyulun 6-da Limada keçirilən görüşdə müşahidəçi ölkə statusu alıb.
Qeyd edək ki, 2011-ci ildə Meksika, Kolumbiya, Peru və Çili tərəfindən təsis edilmiş SOA-da Avropa İttifaqının və Şimali Amerikanın aparıcı ölkələri daxil olmaqla, 59 ölkə müşahidəçi üzv statusuna malikdir. Qrup ölkələrinin toplam ümumdaxili məhsulu dünya iqtisadiyyatı siyahısında altıncı yerə malikdir.
O da məlumdur ki, Azərbaycanın göstərdiyi səylərə baxmayaraq, Dağlıq Qarabağ münaqişəsi indiyə qədər həllini tapmayıb. Münaqişənin həllinin uzanmasının başlıca səbəblərindən biri işğalçı Ermənistana lazımi təzyiqlər göstərilməməsidir. Bu səbəbdən Ermənistan hər vəchlə mövcud status-kvonun davam etdirilməsinə çalışır.
Bütün bunların fonunda maraqlıdır, Ermənistanın Sakit Okean Alyansında müşahidəçi statusu alması münaqişənin həllinə hər hansı müsbət təsir edə bilərmi?
Əli Orucov: “Düşünmürəm ki, Ermənistanın SOA-da müşahidəçi statusu alması münaqişənin həllinə hansısa müsbət təsir göstərsin”
Məsələyə münasibət bildirən AMİP funksioneri Əli Orucov bunu istisna etdi. Onun fikrincə, bu o qədər də real deyil: “Düşünmürəm ki, Ermənistanın Sakit Okean Alyansında müşahidəçi statusu alması münaqişənin həllinə hansısa müsbət təsir göstərsin. Azərbaycan lap Avrasiya İqtisadi İttifaqında təmsil olunsa belə, Ermənistan kompromislərə getməyəcək. Çünki onların məqsədi işğalı davam etdirməkdir. Ermənistanın məqsədi de-fakto işğal etdiyi Azərbaycan ərazilərini de-yure öz xeyrinə rəsmiləşdirməkdir. Beynəlxalq birliyin də təcavüzkarı cəzalandırmaq niyyəti yoxdur. Ona görə də biz sadəlövh olmamalıyıq. O mənada ki, Ermənistanın SOA-da təmsil olunması nəyisə dəyişəcək. Reallıq ondan ibarətdir ki, Ermənistanın əvvəlki hakimiyyəti kimi, hazırkı Paşinyan iqtidarı da kompromislərə meylli deyil. Münaqişənin həlli ilə bağlı çağırışlara saymazyana münasibət bəsləyir. Münaqişənin həlli o zaman mümkündür ki, beynəlxalq birlik Ermənistanı təcavüzə son qoymağa məcbur etsin. Neçə ildir biz bunu görmürük. Belə olan halda, ümid qalır ancaq Azərbaycan Ordusuna. Yəni Ermənistanla nəticəsiz danışıqlara son qoyulmalı və torpaqların azad edilməsi ilə bağlı hərbi əməliyyatlara start verilməlidir. Ən azından, Ermənistana hərbi təzyiqlər artırılmalıdır”.
Vidadi ORDAHALLI
