Son vaxtlar Azərbaycan-Fransa münasibətlərində ciddi yeniliklər, xüsusilə də yaxınlaşmalar nəzərə çarpır. Erməni diasporunun çox güclü olduğu həmin ölkədə tez-tez ölkələrimiz arasındakı münasibətlərə xələl gətirmək cəhdləri olub.
Bir müddət əvvəl Fransa məhkəmələri bəzi yerli subyektlərin qondarma qurum olan “DQR”in bəzi şəhərləri ilə “qardaşlaşması” ilə bağlı çıxarılan qərarları ləğv etdi. Bunun özü münasibətlərin rəvan olduğunun göstəricisi sayıla bilər. Çünki bir müddət əvvəl biz belə bir obyektiv qərarların çıxarılmasına nail olmaqda çətinlik çəkirdik.
Artıq Fransanın mötəbər biznes dairələri də Azərbaycanla əlaqələrə önəm verir. Fransa Sahibkarlar Təşkilatı-MEDEF Biznes Şurasının prezidenti Jofrua Ru de Beziönü Azərbaycana rəsmi səfər edib. Səfər çərçivəsində ölkənin ali rəhbərliyi tərəfindən qəbul olunan Jofrua Ru de Beziönü siyasi, iqtisadi, humanitar əlaqələrin əhəmiyyətindən danışaraq, bu münasibətlərin iki ölkə arasında əməkdaşlığın daha da inkişafına xidmət etdiyini bildirib. MEDEF-in Biznes Şurasının prezidenti Fransa müəssisələrinin 170-ə yaxın nümayəndəsinin ölkəmizə səfər etdiyini bildirib, Azərbaycanda keçirdikləri görüşləri yüksək dəyərləndirib, iki ölkə arasında mövcud əməkdaşlığın yüksək səviyyədə olduğunu deyib. Enerji sektorunda əldə edilən nailiyyətlərdən danışan qonaq Fransa şirkətlərinin qeyri-neft sahəsində - informasiya texnologiyaları, innovasiyalar, kənd təsərrüfatı, ətraf mühitin mühafizəsi, turizm kimi istiqamətlərdə əlaqələrin qurulmasında maraqlı olduqlarını diqqətə çatdırıb. Jofrua Ru de Beziö Fransa şirkətlərinin Azərbaycanda daha da fəal çalışmaları üçün ölkəmizdə bütün şəraitin mövcud olduğunu diqqətə çatdırıb. Ölkələrimiz arasında həm siyasi, həm də iqtisadi sahələrdə nəzərəçarpan yaxınlaşma nəyin əlaməti sayıla bilər?
Hatəm Cabbarlı: “Bununla biz həm də erməni diasporunun Fransadakı təsir imkanlarının neytrallaşdığını sübut etmiş olduq”
Siyasi elmlər doktoru Hatəm Cabbarlı “Bakı-Xəbər”ə bildirdi ki, son zamanlar Azərbaycan-Fransa iqtisadi və siyasi əlaqələrinə diqqət yetirdikdə pozitiv baxımdan ciddi dəyişikliklər nəzərə çarpır: “Fransanın bu sahələrdə Azərbaycanla münasibətləri inkişaf etdirməsinin bir çox səbəbi var. Onlardan ən başlıcası Azərbaycanın regionun digər ölkələri ilə müqayisədə daha inkişaf etməsi, təbii sərvətləri, enerji mənbələri baxımından Avropanın enerji təhlükəsizliyində oynaya biləcəyi rolla bağlıdır. Bütün bu amillər həm Azərbaycan, həm də Fransa üçün xüsusi əhəmiyyət kəsb edir. Azərbaycan-Fransa münasibətlərində yeni bir səhifənin açılmasında Fransanın bəzi şəhərlərinin qondrama qurumla “əməkdaşlıq sazişləri”nin məhkəmələr tərəfindən ləğv edilməsi önəmli rol oynadı. Bu, əlbəttə, Azərbaycanın xarici siyasət kursunun bir uğurudur. Biri var Azərbaycan diplomatiyası həmin “sazişlər”in qarşısını onlar imzalanan vaxt alsın, biri də var ki, onların qanunsuzluğu məhkəmə qərarı ilə təsbitini tapsın. Yəni Fransanın öz məhkəmələri “DQR”lə olan “sazişlər”i qanunsuz adlandırıb, bununla bağlı qərar çıxarıblar. Azərbaycan diplomatiyası bu faktların üzərinə hər zaman gedib. Artıq nəticə var. Bu, Fransanın vasitəçiliyi üçün də önəmlidir. Həmin ölkə Minsk Qrupunun həmsədrlərindən biridir. Arada biz Fransanın Ermənistana meyllənməsini görürdüksə, hazırda bu hal müşahidə olunmur. Artıq biz bu məsələdə bir qırılma nöqtəsinin olduğunu hiss edirik. Düşünürəm ki, Azərbaycan Fransa ilə bağlı siyasətində bundan sonra da məntiqli davranacaq. Fransa, sadəcə, siyasi-iqtisadi sahədə deyil, eyni zamanda, hərbi-təhlükəsizlik sahəsində də Azərbaycanla əməkdaşlıqda maraqlı ola bilər. İstərdik ki, Fransa ilə bağlı əldə etdiyimiz bu müsbət nəticəni biz digər Avropa ölkələri ilə bağlı təkrarlaya bilək. Bu cür nailiyyətlər bizim mövqeyimizi daha da gücləndirir. Göründüyü kimi, böyük biznes dairələrinin də Azərbaycanla maraqlanması təsadüfi deyil. Bu, uzunmüddətli münasibətlərin rəvan olacağına bir işarədir. Bununla biz həm də erməni diasporunun Fransadakı təsir imkanlarının neytrallaşdığını sübut etmiş olduq”.
Məhəmmədəli QƏRİBLİ
