Ermənistanda “Qarabağ klanı” ilə mövcud hakimiyyət arasında çəkişmələrin daha da şiddətlənməsi müşahidə olunur və belə görünür ik, birincilər Nikol Paşinyan iqtidarından revanş almaqda israrlıdır. Paşinyan isə, öz növbəsində, “Qarabağ klanı”nın əsas təmsilçilərini hüquqi müstəvidə sıradan çıxarmaqda davam edir.
Sabiq prezident Robert Köçəryanın həbsindən sonra bu dəfə diqqət “Qarabağ klanı”nın digər əsas təmsilçisi Serj Sarkisyan üzərində cəmləşməkdədir. Ermənistanın “Joxovurd” nəşri yazır ki, Sarkisyan öncə 2016-cı ilin aprelində Dağlıq Qarabağda baş verənlər barədə məlumat verməsi üçün parlamentə dəvət olunacaq. Daha sonra onun günahkar bilinərək məhkəmə istintaqına cəlb edilməsi və bununla da həbsə atılması gözlənir. Keçmiş müdafiə naziri Seyran Ohanyanı da eyni aqibət gözləyir.
Yaranmış vəziyyətdə “Qarabağ klanı” Rusiya və digər ölkələrdən dəstək almaqla Paşinyanın onlara qarşı gedişlərini neytrallaşdırmaq istəyir. Elə bundan irəli gəlir ki, Robert Köçəryanın tərəfdarları Avropa İttifaqı Şurasının rəhbəri Donald Tuskun bu ölkəyə səfər etdiyi gün İrəvanda aksiya keçiriblər. Köçəryanın tərəfdarları Donald Tusk və Nikol Paşinyanın mətbuat konfransı keçirdikləri hökumət binasına yaxınlaşmağa cəhd ediblər. Lakin polis etirazçıların qarşısını alıb. Ermənistanın sabiq prezidentinin vəkili Ayk Alumyan isə bildirib ki, Robert Köçəryanın oğlu Sedrak Köçəryana atası ilə görüşməyə imkan verilmir: "Hazırda Köçəryanın yaxınlarına onunla görüşməyə imkan verilmir. Məsələn, onun oğlu Sedrak Köçəryana atasına baş çəkməyə icazə vermədilər". O əlavə edib ki, bu problemi məhkəmə vasitəsilə həll edəcəklər və lazım olsa, beynəlxalq ictimaiyyətin də diqqətini buna cəlb edəcəklər. Vəkil qeyd edib ki, Köçəryanı ziyarətlə bağlı problemlər hələ ilin əvvəlindən başlayıb. Köçəryanın qohumlarına yeni ilin bayram günlərində onu ziyarət etməyə imkan verilməyib. Onun sözlərinə görə, bütün bunlar ölkədə diktatura idarəçilyinin nəticəsidir. Köçəryan əsas etibarı ilə “1 mart” işinə görə ittiham olunur. Qeyd edək ki, bir neçə gün öncə Köçəryan bəyanatla çıxış edərək, Nikol Paşinyanın 2008-ci ilin martında İrəvanda baş verən kütləvi iğtişaşlara görə birbaşa məsuliyyət daşıdığını bildirmişdi: "Ermənistanın hazırkı baş naziri 2008-ci ilin 1 martındakı kütləvi iğtişaşlara görə birbaşa məsuliyyət daşıyır. Onun təsəvvüründə günahkar mənəm".
Xatırladaq ki, iyunun 25-i Ermənistanın Apelyasiya Məhkəməsi Köçəryanın həbsdən azadlığa buraxılması haqqında qərarı ləğv edərək, onun həbsi barədə qərar çıxarıb. Hazırda Seyran Ohanyan, müdafiə nazirinin keçmiş müavini, Kollektiv Təhlükəsizlik Müqaviləsi Təşkilatının keçmiş katibi general Yuri Xaçaturov və Ermənistanın baş nazirinin keçmiş müavini Armen Gevorkyanın da məhkəməsi gedir. Onların da tezliklə həbsə atılması gözlənir. Həmin şəxslər konstitusiya quruluşunu devirmək və külli miqdarda rüşvət almaq, qanunsuz yolla əldə edilən vəsaitləri leqallaşdırmağa görə ittiham edilirlər. Yuxarıda qeyd olunduğu kimi, onların sırasına Serj Sarksiyanın da qatılması gözlənir.
Erməni politoloq Hayk Martirosyan Ermənistanda bu fonda yaranmış böhranlı vəziyətlə bağlı danışarkən maraqlı məqamlara toxunub. Onun sözlərinə görə, baş verən proseslər onu göstərir ki, yaxınlarda Ermənistanda məhz saray çevrilişi olacaq: “Siyasi səhnədən keçmiş rejimi və onun qalıqlarını uzaqlaşdırmaq üçün kəskin fəaliyyət göstərməklə prosesləri başqa istiqamətdə aparmaqdan ötrü bütün imkanlara malik olan hakimiyyət öz funksiyasını yerinə yetirməyib. Hazırda köhnə rejim yeni simalar, yeni qüvvələr, yeni güc və dəstəklə - o cümlədən, yalnız daxildə deyil - hərtərəfli mübarizəyə qoşulub. Bu da məntiqə uyğundur. Sülh şəraitində keçmiş rejim saray çevrilişi istiqamətində fəaliyyət göstərir. Bu ssenari ətrafında mövcud hakimiyyət daxilindən yalnız daxili deyil, bir sıra xarici güclərlə də həvəslə əməkdaşlıq edəcək insanlar tapılacaq. Belə olan halda Paşinyanı dəstəkləyənlər ordusunun sıfıra düşməsindən parlament çevrilişi istisna olunmur. Məhz “Mənim Addımım” fraksiyasının müxtəlif qolları və parlamentin digər partiyaları tərəfindən saray çevrilişi olacaq”. O qeyd edib ki, Paşinyan xəyanətkar axtararkən güzgüyə baxsın, bəlkə ona daha tez qovuşdu: “Belə olan halda indiki iqtidar hakimiyyətdə çox qala bilməz. Keçmiş siyasi xadimlərin çoxdan siyasi səhnədən uzaqlaşdırmalı və türmələrdə cəzalarını çəkməli olduqları halda artıq siyasi amilə çevrilmələri biabırçılıqdır. Bu, inqilab liderləri tərəfindən xalq inqilabına xəyanət deməkdir. Paşinyan ölkədə itin yiyəsini tanımadığı bir vəziyyət yaradıb”. Martirosyan Paşinyanı heç nəyə yaramayan rəhbər adlandırıb.
Ermənistan daxilində olanlarla yanaşı, “Qarabağ klanı” ilə mövcud hakimiyyət arasında çəkişmələrin Azərbaycanın işğal edilmiş ərazilərində də şiddətlənməsi müşahidə olunur. Ermənistanda nəşr edilən “Past” qəzeti yazır ki, tərəflər əvvəlki qaydada separatçı rejimin rəhbəri vəzifəsinə öz adamlarını gətirməyə çalışır. Qəzet yazır ki, bu durumda Dağlıq Qarabağın keçmiş “müdafiə naziri” general Samvel Babayanın Azərbaycanın işğal altındakı ərazilərində hakimiyyətə gəlmək üçün apardığı fəaliyyət vəziyyəti daha da qarışdıra bilər: “Paşinyan Samvel Babayana qarşıdır və onun Qarabağdakı rejimin rəhbəri olmasını istəmir. Digər tərəfdən, Babayan gələn il keçiriləcək “prezident seçkilərində” namizədliyini irəli sürə bilməz, çünki Qarabağdakı rejimin indiki “konstitusiyası” buna imkan vermir. Babayan “Dağlıq Qarabağ vətəndaşı” deyil.
Lakin o, tərəfdarlarını toplayaraq “konstitusiyanı” dəyişdirməyə çalışır, imza toplayır. Hazırda Babayan 20 minə yaxın imza toplayıb. Dağlıq Qarabağın “təhlükəsizlik xidməti” isə ona eyhamla bu günlərdə belə bir xəbərdarlıqla çıxış edib ki, hakimiyyət “antikonstitusion addımların, qanunsuzluğun, sabitliyi pozmaq cəhdlərinin” qarşısını alacaq. Hakimiyyətə yaxın KİV-də belə məlumatlar dərc olunur ki, Babayan Qarabağda çaxnaşma yaratmağa, destablizasiyaya hazırlaşır. Beləliklə, yaxın vaxtlarda Qarabağda maraqlı hadisələr gözlənilir və bizim məlumatımıza görə, hakimiyyət yolverilməz hərəkətlərin qarşısını almaq üçün bütün səyləri göstərir. Paşinyan belə vəziyyətdən istifadə etməklə Qarabağda öz adamını rəhbər təyin etməyə cəhd edir”.
Belə vəziyyətdə Nikol Paşinyanla Dağlıq Qarabağdakı qondarma rejim arasında münasibətlərin daha da gərginləşəcəyi gözlənir. Çünki, qeyd olunduğu kimi, Paşinyan Qarabağda öz adamını hakimiyyətə gətirməyə çalışır, “Qarabağ klanı“ isə öz adamlarını - general Vitali Balasanyanı “prezident” etmək istəyir. Bu durumda Samvel Babayanın Qarabağda vəziyyəti qarışdırması zəbt edilmiş ərazilərdə xaotik bir vəziyyətin yaranmasına gətirib çıxaracaq. İndi belə vəziyyətdən həm “Qarabağ klanı“, həm də Paşinyan öz məqsədləri üçün istifadə etməyə çalışır.
Nahid SALAYEV
