Tuskun Bakıda ərazi bütövlüyünə dəstək bəyanatı Ermənistanı şoka salıb

Avropa İttifaqı Şurasının Prezidenti Donald Tuskun Azərbaycanda verdiyi bəyanat Ermənistanı bərk narahat etməyə başlayıb. Qeyd edək ki, Tusk birmənalı şəkildə bildirib ki, Avropa İttifaqı Azərbaycanın suverenliyini, müstəqilliyini və ərazi bütövlüyünü dəstəkləyir.

Artıq Ermənistandakı siyasilər həmin bəyanatı şərh etməyə başlayıblar. Hətta qondarma qurumun  bəzi “rəsmiləri” də bu məsələyə reaksiya veriblər. Qondarma qurumun “mətbuat katibi” David Babayan qeyd edib ki, Tuskun Bakıda səsləndirdiyi fikirləri İrəvanda da səsləndirməsi ciddi narahatlıq yaradır. Qondarma “mətbuat katibi” hətta söhbətin hansı ərazi bütövlüyündən getdiyinə də ritorik sualla yanaşıb. Ermənilərin Tuskun məlum bəyanatı ilə bağlı bu şəkildə əndişəyə düşmələrinin səbəbi nədir?

• Nəzakət Məmmədova: “Bu, Ermənistanın işğalçılıq siyasətinə böyük diplomatik zərbədir”

Politoloq Nəzakət Məmmədova “Bakı-Xəbər”ə açıqlamasında bildirdi ki, Avropa Birliyi ilə Azərbaycan arasında Brüsseldə paraflanmış və imzalanması nəzərdə tutulan sazişdə Birliyin Azərbaycanın ərazi bütövlüyünə münasibəti məsələsi ən vacib, ən çox müzakirə olunan müddəadır: “Bu məsələ həm Ermənistan-AB Tərəfdaşlıq sazişinin imzalanması ərəfəsində, həm də müvafiq olaraq Azərbaycan hakimiyyəti ilə AB rəsmləri arasında, eyni zamanda, Azərbaycanın bəzi müxalifət qüvvələri arasında sazişlə bağlı aparılan əsas müzakirə mövzularından biri olub. Lakin bütün bu mübahisə və müzakirələrə İlham Əliyevin və Donald Tuskun bəyanatlarında tam şəffaflıq gətirildi. Prezident Əliyevin səfərlə bağlı dediyi "Ötən il Avropa Komissiyası ilə Azərbaycan arasında Tərəfdaşlıq prioritetləri sənədi qəbul olundu. Bu, çox mühüm sənəddir. Burada Azərbaycanın ərazi bütövlüyü, suverenliyi və sərhədlərinin toxunulmazlığına dəstək ifadə olunur" fikirləri bu inamı artırdı. Donald Tuskun regiona səfəri zamanı bəyan etdiyi ən mühüm fikir Azərbaycanın suverenliyinin, müstəqilliyinin və ərazi bütövlüyünün təmsil etdiyi təşkilat tərəfindən tanınmasını xüsusi vurğulaması oldu. Bu, bütün anti-Azərbaycan qüvvələrin, o cümlədən, erməni lobbisinin Avropa İttifaqı Şurasının Prezidenti Tuskun bölgəyə səfəri ətrafında spekulyasiya manevrlərinin qarşısını almış oldu və AB-nin Azərbaycanın ərazi bütövlüyünü tanımasının növbəti ifadəsi sayıldı”.

Politoloqun sözlərinə görə, artıq tamamilə aydındır ki, AB və Azərbaycan arasında qarşıdakı dövrdə imzalanması gözlənilən Tərəfdaşlıq sazişində ölkəmizin ərazi bütövlüyünə dəstək müddəası mütləq şəkildə ehtiva ediləcək: “AB rəsmisinin regiona səfəri çərçivəsində həm də ATƏT-in Minsk Qrupu həmsədrlərinə münaqişənin həllinin Helsinki Yekun Aktı prinsipləri əsasında sürətləndirilməsi, xalqların sülhə hazırlanmasının təşviq edilməsi AB-nin regionda aparıcı gücə çevrilmək planlarının təzahürüdür. Avropa İttifaqı Şurası Prezidentinin bu bəyanatlarının bir sıra səbəbləri ola bilər. Regionda İran-ABŞ münasibətləri gərginləşib. AB İranın şimal sərhədlərinin təhlükəsizliyini etibarlı şəkildə təmin etmək istəyir. Ermənistan AB üçün artıq etibarlı tərəfdaş deyil, o, ABŞ və Rusiyanın girdabında çabalayan zəif bənddir. Dünya siyasətində bu cür dövlətlər "failed states" adlanır və qonşulara təhdid mənbəyi kimi görülür. Vaşinqton görüşündən sonra AB Qarabağ məsələsində ABŞ-ın təşəbbüsü ələ almaq cəhdlərindən narahat olaraq daha da fəallaşıb. Lakin aydındır ki, əvvəlki yanaşma, ikili standartlarla münaqişəni həll etmək olmaz. Konkret, ədalətli mövqe ortaya qoyulmalıdır. Lakin bu, təbii ki, münaqişənin həllində deyil, uzanmasında maraqlı olan Ermənistanı narahat edir.

Təbii ki, Çinlə meqalayihələr həyata keçirən Avropa “Şərq-Qərb”, “Şimal-Cənub” layihələrinin qovuşduğu tək ölkə olan Azərbaycanla münasibətə xüsusi önəm verir və Qarabağ məsələsinin Azərbaycanın ərazi bütövlüyü prinsipi əsasında həlli regionda sülhə zəmin yaradardı. AB-nin bu bəyanatı regionumuzda gərgin proseslər fonunda mühüm sülhməramlı əhəmiyyət daşıyır və Ermənistanın işğalçılıq siyasətinə böyük diplomatik zərbədir. Ermənistanın narahatlığı bu məqamlarla bağlıdır”.

Məhəmmədəli QƏRİBLİ