Avroittifaqın illik hesabatında Azərbaycanla bağlı şişirdilmiş tənqidlərə etirazlar var...

Məlum olduğu kimi, Avropa İttifaqı "Dünyada insan hüquqları və demokratiya ilə bağlı vəziyyətə dair" illik hesabat yayıb.

Hesabatın Azərbaycana aid hissəsində bildirilir ki, guya Azərbaycanda insan hüquqları ilə bağlı vəziyyət hələ də narahatlıq doğurur. İddia edilir ki, guya fundamental sərbəst toplaşmaq, söz və birləşmək azadlığı və hakimiyyət orqanları tərəfindən opponent və ya opponent hesab edilənlərin təqibi davam edir. Vətəndaş cəmiyyəti üçün kiçildilmiş fəaliyyət dairəsi məhdudlaşdırıcı qanunvericiliklə, o cümlədən, xaricdən maliyyələşdirmə üzrə müddəalarla daha da sıxılıb.

Sənəddə, həmçinin, arbitraj həbslərə diqqət yetirilir. Bunu onunla əsaslandırmağa çalışırlar ki, guya məhkəmə qərarı olmadan tanınmış media internet səhifələri bağlanıb, inzibati göstərişə görə müxbirlərin tutulması və ya saxlanması halları baş verib. Vəkillər Assosiasiyasının üzvü olmayan vəkillərin məhkəməyə çıxmasını qadağan edən yeni qaydalar ədalət mühakiməsinə əlçatanlığa ciddi şəkildə mane olur. Vəkillər Assosiasiyası insan hüquqları (İH) müdafiəçilərinin məhkəmə işlərində fəal olan bəzi vəkillərin lisenziyasını əlindən alıb.

Hesabatda o da qeyd edilir ki, Azərbaycan beynəlxalq öhdəliklərinə uyğun olaraq, Avropa İnsan Hüquqları Məhkəməsinin qaydalarına uyğunluğu artırmalıdır.

Hesabatın məzmunundan açıq-aydın hiss olunur ki, Azərbaycanla bağlı tənqidlər şişirdilib. Ən inkişaf etmiş ölkələrdə belə, hansısa problemlər olur. Azərbaycana gəldikdə isə son illər insan hüquqları və demokratiya sahəsində bir sıra işlər görülüb. Təəssüflər olsun ki, hesabat hazırlanarkən bunlar nəzərə alınmayıb və nəticədə qərəzli yanaşma ortaya qoyulub.

O baxımdan sözügedən hesabatda Azərbaycanla bağlı səslənən tənqidləri ekspertlər necə dəyərləndirirlər?

• Elçin Mirzəbəyli: “Səslənən tənqidlərin ciddi hüquqi əsası yoxdur”

Məsələyə münasibət bildirən BAXCP-nin sədr müavini Elçin Mirzəbəylinin sözlərinə görə, hesabatda yer alan məqamlar ənənəvi qərəzli yanaşmadan irəli gəlir: “Ona görə də bu ənənəvi qərəzli yanaşma tərzidir. Bu qurumun Azərbaycana olan münasibəti Avropa İttifaqı Şurası Prezidenti Donald Tuskun Azərbaycanda sərgilədiyi mövqedə və verdiyi açıqlamalarda özünü büruzə verdi. Ancaq təəssüflər olsun ki, hələ də müəyyən qurumlar məsələni başqa tərəfə yönəltmək istəyirlər. Onlar ölkəmizə qarşı qərəzli münasibətlərini davam etdirirlər. Hesab edirəm ki, bu, məqsədyönlü tənqidi yanaşmadır. Çünki Azərbaycanda insan hüquqları və demokratiya ilə bağlı çoxsaylı iş görülüb. Ona görə də Azərbaycanla bağlı səslənən tənqidlərin ciddi hüquqi əsası yoxdur. Burada müəyyən qədər də korporativ maraqlar var. Digər tərəfdən, bunda Azərbaycana qarşı ənənəvi olaraq qərəzli münasibət sərgiləyən və erməni lobbisi ilə yaxından əlaqəsi olan insanların da rolu var. Nəticə etibarilə Azərbaycanda insan haqlarının vəziyyəti ilə bağlı mənzərə də göz qabağındadır. Ölkəmizdə ciddi hüquqi islahatlar aparılır. Cəzalar yüngülləşdirilir, əfv sərəncamları imzalanır və s. Bütün bunlar Azərbaycanda insan hüquq və azadlıqlarına göstərilən münasibətin mahiyyətini tam çılpaqlığı ilə ortaya qoyur. Bütün bunları müəyyən dairələr görmək istəmirlərsə, bu onların öz problemidir”.

Vidadi ORDAHALLI