17/07/2019 11:22
728 x 90

Lüt-üryan Ermənistanın Cənub-Şərqi Asiyanın “kiçik iqtisadi əjdahalarına” qoşulmaq xülyaları...

“İqtisadi baxımdan zəif Ermənistan heç vaxt Sinqapur və Malaziya kimi nəhənglər üçün cəlbedici ola bilməz”

img

Nikol Paşinyan hökuməti ölkəsinin sosial-iqtisadi çətinliklərindən qurtulmaq üçün, bir növ, çabalayır. Rusiya və Qərbdən gözləntiləri doğrulmadıqda Ermənistanın Baş naziri hamını təəccübləndirəcək bir səfər reallaşdırıb. Söhbət onun Ermənistanla heç bir iqtisadi, siyasi bağlılığı olmayan Vyetnama səfərindən gedir. Belə ki, Paşinyanın rəhbərlik etdiyi nümayəndə heyəti 4-6 iyul tarixlərində Vyetnamda səfərdə olub.

Paşinyanın Vyetnam səfəri erməni mediasının tənqidlərinə tuş gəlib. Məsələn, "Past” qəzeti səfəri tələsik və hazırlıqsız adlandırıb. Bildirib ki, bu il mayın 24-də Ermənistanın Vyetnamdakı səfiri Raisa Vardanyan geri çağırılaraq yerinə Vaqram Kajoyan təyin edilib. Ancaq yeni səfir etimadnaməsini Vyetnam hakimiyyətinə təqdim etmədən Paşinyanın başçılıq etdiyi nümayəndə heyəti bu ölkəyə gedib. Diplomatik qaydalara əsasən, bu anlaşılmazdır.

Vyetnamdan sonra Paşinyan Cənub-Şərqi Asiyanın iqtisadi baxımdan ən inkişaf etmiş ölkəsi Sinqapura səfər edib. Paşinyanın rəhbərlik etdiyi nümayəndə heyəti bu ölkədə rəsmi görüşlərlə yanaşı, biznes dairələri ilə də görüşlər keçirib. Bəzi Sinqapur rəsmiləri onu tərifləyiblər. Görüşlər zamanı Paşinyan guya ölkədə ciddi islahatların aparılması barədə nağıllar uydurub. Bu minvalla, Sinqapurdan olan iş adamlarının diqqətini cəlb etməyə çalışıb.

Nəzərə alsaq ki, Sinqapur başda olmaqla, bir sıra Cənub-Şərqi Asiya ölkələri iqtisadi baxımdan dünyanın “iqtisadi əjdahaları” hesab olunurlar, Ermənistanın bu ölkələrlə yaxınlaşma cəhdləri hansı iqtisadi nəticələr doğura bilər? Ermənistan iqtisadi baxımdan yerində sayan geriqalmış ölkədir, o zaman bunun hansı perspektivindən söhbət gedə bilər?

  • Rəsul Cahangirli: “Paşinyanın sözügedən səfərinin hansısa perspektivindən danışmaq gülüncdür”

Məsələyə münasibət bildirən ekspert Rəsul Cahangirlinin sözlərinə görə, bu, sadəcə, görüntüdür: “Paşinyan ictimaiyyəti aldatmaq istəyir ki, guya nəsə edir. Əslində, Ermənistan Baş nazirinin Cənub-Şərqi Asiya ölkələrinin diqqətini cəlb etmək cəhdi özünü doğrultmayacaq. Ona görə ki, iqtisadi baxımdan zəif Ermənistan heç vaxt Sinqapur və Malaziya kimi nəhənglər üçün cəlbedici ola bilməz. Səfər zamanı rəsmilər səviyyəsində səslənən diplomatik məzmunlu xoş sözlər nəyisə dəyişməyəcək. Ən azından, Ermənistanda böyük alıcılıq bazarı olsaydı, bəlkə də həmin ölkələr hansısa maraq göstərərdilər. O mənada ki, məhsullarını Ermənistanda satardılar. Ancaq Ermənistanın belə bir potensialı praktiki olaraq yoxdur. Başqa bir tərəfdən, Ermənistanın iqtisadi-ticarət nöqteyi-nəzərdən əlverişli mövqeyi olsaydı, o zaman Sinqapur sərmayə qoymaqda maraqlı olardı. Göründüyü kimi, Ermənistan buna da sahib deyil. Belə olan halda, əlbəttə ki, Paşinyanın sözügedən səfərinin hansısa perspektivindən danışmaq gülüncdür”.

Vidadi ORDAHALLI

Son xəbərlər