Türkiyənin Rusiyadan aldığı “S-400” zenit-raket komplekslərinin ilk hissəsi yaxın günlərdə bu ölkəyə çatdırılacaq. Bu barədə Türkiyə mediası məlumat verib. Qeyd edilir ki, tədarük iki nəqliyyat təyyarəsində həyata keçiriləcək. Sistemin quraşdırılmasına cavabdeh olan doqquz rusiyalıdan ibarət qrup iyulun 8-də Türkiyəyə gələcək.
Media Türkiyə Prezidentinin nümayəndəsinə istinadən bildirir ki, Ankara hava hücumundan müdafiə sistemlərini “çox tezliklə, yaxın günlərdə” əldə edəcək. Onun sözlərinə görə, Türkiyə hakimiyyəti hələ də “S-400”ün yerləşdirmə variantlarını öyrənir. Məqsəd bu ZRK-nın alışına görə Türkiyə-ABŞ münasibətlərinin kəskinləşməsindən qaçmaqdır. “Triumf” “S-400” ZRK-nın Azərbaycan və Qətərdə yeləşdirilməsi istisna edilmir.
Xatırladaq ki, Rusiya və Türkiyə 2018-ci ilin sonunda dörd ədəd “S-400” kompleksinin Ankaraya satışı haqqında 2,5 milyard dollar dəyərində saziş imzalayıb. Pentaqon dəfələrlə bəyan edib ki, Türkiyə Rusiya istehsalı olan "S-400" raket komplekslərini alsa, ABŞ istehsalı olan "F-35"ləri ala bilməyəcək.
Türkiyə Prezidenti Rəcəb Tayyib Ərdoğan da Rusiyadan alınan "S-400" zenit raket komplekslərinin bu ölkəyə gətiriləcəyini təsdiqləyir. O, Bosniya və Herseqovina səfəri öncəsi jurnalistlərə açıqlamasında bildirib ki, hazırda komplekslərin yükləmə prosesi gedir: “S-400”lər təyyarə ilə ölkəmizə gətiriləcək. Bizim Rusiya tərəfi ilə razılaşdığımız tarixlər var. Lakin bu tarixləri açıqlamağa məni məcbur etməyin. Bu düzgün deyil. Sistemlərin Türkiyənin hansı bölgəsində yerləşdirilməsi ilə bağlı Türkiyə Müdafiə Nazirliyi və Baş Qərargahı plan hazırlayır. Ölkəmiz, bölgəmiz və dünyamız üçün xeyirli olsun".
Xatırladaq ki, iyunun 28-də Birləşmiş Ştatlar Senatı 5-ci nəsil "F-35" qırıcı təyyarələrinin Türkiyəyə tədarükünün qadağan olunmasına dair qərar qəbul edib. Bu barədə Senatın 2020-ci il üçün təsdiqlədiyi müdafiə büdcə layihəsində qeyd olunur. Məlumatda qeyd edilir ki, büdcə layihəsinin 1236-cı bəndində "F-35"lərin Türkiyəyə tədarükünün məhdudlaşdırılması göstərilir.
Bundan əlavə, qanun layihəsində "F-35" təyyarələrinin texniki xidməti ilə bağlı olan avadanlıqların, intellektual mülkiyyət və texniki məlumatların Türkiyə Respublikası ərazisinə ötürülməsi də qadağan edilir. Eyni zamanda, Rusiyadan "S-400" zenit-raket komplekslərinin Türkiyəyə çatdırılmasının yolverilməz olduğu qeyd olunur.
Xatırladaq ki, iyunun 11-də ABŞ-ın Arizona ştatının "Lyuk" hərbi bazasında "F-35" tipli qırıcı-bombardmançılarında təlim keçən türk pilotlar təlimlərdən uzaqlaşdırılıblar. Bu qərar Türkiyənin Rusiyadan "S-400" zenit-raket kompleksləri almasından sonra Vaşinqtonla aparılan danışıqlar fonunda verilib.
“S-400” raketlərinin alışının dəqiqləşməsi yenidən onların Azərbaycanda yerləşdirilə biləcəyi ilə bağlı mövzunu aktuallaşdırıb. Xüsusilə də erməni KİV-i bu məsələnin üzərində ciddi manipulyasiyalar edir. Həmin raket komplekslərinin Azərbaycanda yerləşdirilməsi mümkündürmü və bunun nə kimi təsirləri ola ilər?
Üzeyir Cəfərov: “Ola bilər ki, növbəti divizionlardan biri və ya ikisi müvəqqəti olaraq Azərbaycanda saxlansın”
Hərbi ekspert Üzeyir Cəfərov qəzetimizə açıqlamasında bildirdi ki, bu məsələni bir qədər çox siyasiləşdirirlər: “Əslinə qalsa, Türkiyə onları müvəqqəti olaraq Azərbaycanda yerləşdirmək barədə düşünür. “S-400” raketləri oktyabr ayında Türkiyə ərazisində tam yerləşdiriləcək. Bununla bağlı Türkiyənin mövqeyi sadə və aydındır. Onlar həmin raketləri heç bir halda Azərbaycanda saxlamaq barədə düşünmürlər. Sadəcə, ABŞ-la olan gərginliyi bir qədər qaydaya salana qədər onları müvəqqəti olaraq ya Azərbaycanda, ya da Qətərdə saxlamaq istəyirlər. Artıq qərar verilib. Bildiyim qədər, həmin raketlər hazır vəziyyətdədir və Ankarada yerləşdirilməsi planlaşdırılır. Bu, birinci diviziondur. Bundan sonra 3 divizion göndəriləcək. Bütövlükdə, Türkiyəyə 4 ədəd “S-400” raketləri veriləcək. Bunun Azərbycana nə istisi, nə də soyuğu yoxdur. Türkiyə tərəfinin əmanət malıdır. Rusiya mütəxəssisləri də artıq Türkiyəyə gəliblər, həmin raketlərin yerləşdirilməsi ilə məşğul olacaqlar. Azərbaycanı qaralamaq istəyən qüvvələr bu mövzudan istifadə edirlər. Bununla bizimlə ABŞ-ın münasibətlərini korlamaq istəyirlər. Onlar öz məqsədlərinə çatmayacaqlar. Bu gün Azərbaycanı düşündürən məsələ Dağlıq Qarabağ problemidir. Mən düşünmürəm ki, biz “S-400”lərdən burada kiməsə qarşı istifadə etmək niyyətini güdək. O vaxt dost ölkə olduğumuz üçün Mövlud Çavuşoğlu belə bir ehtimalı səsləndirdi. Yerləşdirmək hələ o demək deyil ki, tam döyüş vəziyyətinə gətirilsin. Ola bilər ki, növbəti divizionlardan biri və ya ikisi müvəqqəti olaraq Azərbaycanda saxlansın, sonra Türkiyəyə təhvil veriləcək. Oktyabrda onlar Türkiyədə tam döyüş hazırlığı vəziyyətinə gətiriləcək”.
Məhəmmədəli QƏRİBLİ
