Həbsə düşən bəzi şəxsləri pul və digər maraqlar müqabilində “siyasi məhbus”a çevirmək, adlarını bəzi siyahılara salmaq kimi prosesləri çox görmüşük. İndi də bu istiqamətdə fəaliyyət həbsdə olan Beynəlxalq Bankın İdarə Heyətinin sabiq sədri Cahangir Hacıyevin adı ətrafında aparılır.
Qeyd edək ki, hələ 2016-cı ilin oktyabrında Cahangir Hacıyev və digərlərinin cinayət işi üzrə Bakı Ağır Cinayətlər Məhkəməsində proses keçirilərkən sabiq bankirin “siyasi məhbus” elan oluna biləcəyi haqda xəbərlər dolaşırdı. Onun müdafiəsi ilə bağlı yazılar paylaşılırdı. Nəhayət, 2016-cı il oktyabrın 12-də Cahangir Hacıyevin barəsində 15 il müddətinə azadlıqdan məhrumetmə cəzası verilmişdi. Məhkəmə Cahangir Hacıyevdən 63 milyon 80 min manat tutularaq Beynəlxalq Banka verilməsi, ona məxsus dəyərli qol saatının və sikkə pulların müsadirə olunması barədə hökm çıxardı. C.Hacıyev rəhbərlik etdiyi bankın 400 milyon manatını mənimsəməkdə ittiham edilirdi. Biz praktikada pulu olan, korrupsiya və digər əməllərə görə həbsxanaya düşən adamların necə özlərini “siyasi məhbus”a çevirdiyini görmüşük. Cahangir Hacıyevin həyat yoldaşının Londonda keçirdiyi və bütün dünyanın gözünü qamaşdıran dəbdəbəli yaşam tərzinə baxmaq bəsdir ki, onlar barədə ətraflı təsəvvür yaranmış olsun. Təbii ki, həmin pulların hamısı Cahangir Hacıyev tərəfindən oğurlanaraq Avropaya çıxarılıb. Görəsən belə adamın “siyasi məhbus” elan olunmasında kim və niyə maraqlıdır?
- Rauf Zeyni: “Xalqın büdcəsinə əl uzadanı necə siyasi məhbus saymaq olar?”
Ədliyyə Nazirliyi yanında İctimai Komitənin üzvü, Milli QHT Forumunun prezidenti Rauf Zeyni qəzetimizə açıqlamasında belə halların yolverilməz olduğunu qeyd etdi: “Cinayət törətmiş şəxs ilk növbədə qanun qarşısında cavab verməlidir. Cahangir Hacıyevin cinayət törətməsinə artıq şübhə yoxdur. Ölkənin ən böyük pul kütləsi olan bankını talayıblar. Onun barəsində bu cinayəti törətməklə bağlı məhkəmə qərarı var. Bu kateqoriyadan olan adamlar müəyyən şirnikləşdirici vədlərin müqabilində özlərini siyasi məhbus kimi qələmə vermək istəyirlər. Bu yolla da adlarını beynəlxalq qurumların siyahısına saldırıb, sonra bundan ölkəmizə qarşı təzyiq metodu kimi istifadə edirlər. Xalqın büdcəsinə əl uzadanı necə siyasi məhbus saymaq olar? Buna cəhd edən hüquq müdafiəçiləri də insaflı yanaşma ortaya qoymalıdırlar. Pula görə hər şeyə getmək olmaz. Cahangir Hacıyev nə vaxt siyasi fəaliyyətlə məşğul oldu ki, ona belə ad qoymaq istəyirlər? Azərbaycan dövləti daim humanizmini nümayiş etdirir. Əfv fərmanları və amnistiya aktları verir. Ondan yararlanan çoxlu sayda cinayət törətmiş şəxs var. Cəzaya məhkum edilmiş şəxslər bu humanizmdən yardım gözləməlidirlər. Yoxsa, özlərinin adını siyahıya salıb tez azad olacaqlarına ümid etməsinlər. Bu asan yolları onlara vəd edənlərin maddi marağı olur. Bizim kimi ziyalılar, QHT-lər bu istiqamətdə təbliğat aparıb, bunun yolverilməz olduğunu bildirməlidirlər. Bizim rəsmilər dəfələrlə bəyan ediblər ki, ölkədə heç kimi siyasi əqidəsinə görə həbs etmirlər. “Siyasi məhbus” termini uydurmadır. Cahangir Hacıyev milyonları talasın, indi də əlini-qolunu sallayıb siyasi məhbus kimi azadlığa çıxsın? Bu heç vaxt olan deyil. Belə qaranlıq fəaliyyəti özlərinin qazanc mənbəyinə çevirənlər də yaxşı olar ki, bir qədər düşünsünlər”.
- Novella Cəfəroğlu: “Millətin pullarını talayıb və buna görə həbs olunub”
Hüquq müdafiəçisi Novella Cəfəroğlu da hesab edir ki, Cahangir Hacıyevin siyasi məhbus hesab olunması mümkün deyil: “Avropa Şurasının kriteriyaları var. Cahangir Hacıyev həmin kriteriyalara uyğun gəlmir. Biz məhkəmələrin monitorinqini aparırıq. Məhkəmələr düzgün getməyəndə bu haqda hesabatlarda yazırıq. Amma siyasi məhbus məsələsini ortaya atmırıq. Beynəlxalq Bankın sədri necə siyasi məhbus ola bilər? Cahangir Hacıyev kimə pul verib ki, adını “siyasi məhbus” yazsın?”
Novella Cəfəroğlu deyir ki, Cahangir Hacıyev bank sədri olub: “İllərlə ölkənin ən böyük bankının sədri olub. Başqa məsələdir ki, onun işi üzrə proses düzgün getmir. Siyasi motiv yoxdur axı. Bankı dağıdıb talan edən insanı necə siyasi məhbus elan etmək olar? Onun məhkəməsi düzgün getmirsə, məhkəmənin monitorinqini keçirmək olar, bu haqda yazmaq olar. Amma siyasi məhbus məsələsində Cahangir Hacıyev kriteriyalara uyğun gəlmir. Millətin pullarını talayıb və buna görə həbs olunub. Onu hansı əsasla siyasi məhbus hesab edə bilərlər? Bu adam sırf yeyinti məsələsinə görə həbsdədir. Onu digərləri ilə qarışdırmaq olmaz”.
Məhəmmədəli QƏRİBLİ
