Azərbaycan və Türkiyəyə qarşı ərazi iddialarının irəli sürülməsində, hər iki ölkədəki terror aktları və soyqırımlarda, tarixi və hüquqi torpaqlarımızın ələ keçirilməsində əsas rol oynamış qatı millətçi, terrorçu “Daşnaksütyun” partiyası işğal altındakı torpaqlarımızda qondarma separatçı rejimin 2020-ci ildə keçirəcəyi “prezident” və “parlament” “seçkiləri”nə qatılmaq haqda qərar verib.
Erməni KİV-i bildirir ki, “Daşnaksütyun” partiyasının rəhbərliyi müzakirələrdən sonra bu ilin payızında qurumun Dağlıq Qarabağda “prezidentliyə namizədinin” adının açıqlanacağını bildirib. Daşnaklar, həmçinin, qondarma rejimin təşkil edəcəyi növbəti “parlament” “seçkiləri”ndə iştirak edəcəklərini bəyan ediblər.
Qeyd edək ki, hazırda Ermənistan rəhbərliyi ilə qondarma “DQR” rəhbərliyi arsındakı münasibətlər gərgindir. Paşinyan, nəyin bahasına olursa-olsun, oradakı hakimiyyəti ələ keçirmək istəyir, ancaq hələ ki, buna müvəffəq ola bilmir. Bir müddət əvvəl erməni KİV-i Paşinyanın oranın rəhbərliyinə gətirəcəyi namizədi də müəyyənləşdirdiyini bildirdi. Bu xüsusda bir generalın adı çəkilir. Belə vəziyyətdə terrorçu ənənələrə sadiq olan “Daşnaksütyun” partiyasının fəallaşmasını necə qiymətləndirmək olar? Onların “DQR”də hakimiyyətə gəlməsi mümkündürmü? Bu baş tutsa, danışıqlar prosesində hansı yeni şəraiti yarada bilər?
Hatəm Cabbarlı: “Daşnakların “DQR”də hakimiyyətə gəlməsi Qarabağla bağlı sülh prosesinə də mənfi təsirini göstərəcək”
Siyasi elmlər doktoru Hatəm Cabbarlı “Bakı-Xəbər”ə bildirdi ki, “Daşnaksütyun” qondarma qurumda keçiriləcək “seçkilərdə” iştirak etmək, hətta qalıb gəlmək niyyətini açıq ortaya qoyur: “Hətta onlar bəyan ediblər ki, qalib gəlmək üçün partiya üzvü olmayan, lakin onlara simpatiya bəsləyən birini də dəstəkləyə bilərlər. Hələlik “seçkilərə” bir il vaxt var. İndidən göstərilən fəallıq onu deməyə əsas verir ki, partiya seçkilərdə qalib gəlməyi hədəfləyib və bu istiqamətdə bütün resurslarından istifadə edəcək. Mənim qənaətimcə, partiya kənar şəxsə dəstək verə biləcəkləri ilə bağlı manevr edir. Böyük ehtimalla “seçkilərə” öz namizədi ilə qatılacaq. Paşinyan hakimiyyətə gələndən sonra Ermənistanla qondarma qurum arasındakı münasibətlər çox gərginləşib. Bu da “DQR”də millətçi kəsimə rəğbəti bir az da artırıb. Belə vəziyyət daşnakların qalib gəlmə ehtimalını yüksək edir. Nikol Paşinyan hadisələrin bu axarla getməsinə razı deyil. Onun 2020 illə bağlı öz planları var. O, özünə daha yaxın olan bir şəxsi orada hakimiyyətə gətirmək istəyir. Artıq həmin “seçkilərdə” ciddi mübarizənin yaşanacağı ortadadır. Çünki iddiaçı tərəflərin bir-birinə münasibəti barışmazdır. Bu da qondarma rejimlə Ermənistan arasında onsuz da gərgin olan münasibətləri bir qədər də gərginləşdirəcək. Daşnakların “DQR”də hakimiyyətə gəlməsi Qarabağla bağlı sülh prosesinə də mənfi təsirini göstərəcək. Ona kimi Paşinyan hakimiyyətdə qalarsa, tərəflər arasında məhz bu məsələyə görə də ciddi problemlərin yaşanacağı təxmin edilir. Çünki hələlik birillik hakimiyyəti dövründə heç bir konstruktiv addım atmayan Paşinyan məhz daşnaklar tərəfindən sərt tənqid edilir. Onlar daha sərt xəttin yürüdülməsini istəyirlər. Bundan sərt xətt nə ola bilər? Bir adı var, danışıqları bloklamaq”.
Məhəmmədəli QƏRİBLİ
