Məlum olduğu kimi, Prezident İlham Əliyevin sədrliyi ilə Nazirlər Kabinetinin 2019-cu ilin birinci rübünün sosial-iqtisadi inkişafının yekunlarına və qarşıda duran vəzifələrə həsr olunan iclası keçirilib. Sözügedən iclas cari ilin birinci rübünün sosial-iqtisadi inkişafı istiqamətində görülən işlərin nəticələrinin qiymətləndirilməsi baxımından ciddi əhəmiyyət kəsb edir.
Sosial-iqtisadi sahədə bir-birinin ardınca atılan addımları, o cümlədən, şəhid ailələrinə birdəfəlik ödəmənin verilməsi, minimum əməkhaqqı, pensiya, təqaüd və sosial müavinətlərin artırılmasını islahatların yeni mərhələsi kimi qiymətləndirən dövlət başçısı qarşıdakı dövrdə həlli vacib məsələlərdən danışıb. Belə ki, 3 mühüm sahə - iqtisadiyyat, kənd təsərrüfatı və səhiyyə üzrə yeni sosial-iqtisadi modelə keçidin anonsunu verib.
Müşavirədə birinci rübdə büdcə daxilolmalarının artdığını, bununla da əlavə maliyyə resursunun formalaşdığını deyən dövlət başçısı ilin əvvəlindən ümumdaxili məhsulun, sənaye istehsalının, qeyri-neft sənayesinin, kənd təsərrüfatının, əhalinin gəlirlərinin artdığını, ölkə iqtisadiyyatına 2,8 milyard dollar sərmayə qoyulduğunu deyib. Qeyd edib ki, Dünya Bankının "Doing Business" hesabatında Azərbaycan 25-ci yerə layiq görülüb və 10 ən islahatçı ölkə arasındadır.
Son 15 ildə ölkədə 2 milyon yeni iş yerinin yaradıldığını, əhalinin sayının 10 milyona çatdığını, bunun da qarşıda yeni vəzifələr qoyduğunu deyən Prezident İlham Əliyev bildirib ki, bu il də sosial infrastruktur layihələrinin icrası diqqət mərkəzində saxlanacaq.
Ermənistan-Azərbaycan Dağlıq Qarabağ münaqişəsindən bəhs edərkən dövlət başçısı bildirib ki, bu məsələ ilə bağlı Azərbaycanın mövqeyində heç bir dəyişiklik yoxdur və münaqişə ölkəmizin ərazi bütövlüyü, suverenliyi çərçivəsində, beynəlxalq hüququn normalarına uyğun həll olunmalıdır.
O baxımdan, müşavirədə Azərbaycanın iqtisadi inkişafı barədə Prezidentin dedikləri Qarabağ problemi ilə bağlı dünyaya hansı mesajları verdi?
Əli Orucov: “Hesab edirəm ki, beynəlxalq birlik bu mesajdan ciddi nəticə çıxarmalıdır”
Məsələyə münasibət bildirən AMİP funksioneri Əli Orucov buna bir neçə rakursdan yanaşdı: “Bunun dünyaya başlıca mesajı ondan ibarətdir ki, Dağlıq Qarabağ münaqişəsinin həll edilməməsi Azərbaycanın iqtisadi inkişafını ləngidə bilməyib. Azərbaycan iqtisadiyyatına həm daxili, həm də xarici mənbələrdən sərmayələr yatırılır. Neftdən əldə edilən böyük vəsaitlər iqtisadiyyata yönəldilir. Müxtəlif istehsal və xidmət sahələri yaradılır. Sosial infrastruktur sahələri inkişaf etdirilir. Azərbaycan iqtisadiyyatında qeyri-neft sektorunun çəkisi aşağı olsa da, hər halda, son illər bu sahənin də inkişafına diqqət artıb. Müxtəlif proqramlar qəbul olunub, layihələr həyata keçirilir. Azərbaycanın iqtisadi göstəricilərində ölkənin tranzit imkanları və bununla əlaqədar reallaşdırılan enerji, nəqliyyat layihələri müsbət perspektivlər vəd edir. Ancaq münaqişənin həll olunmaması səbəbindən Ermənistan bu imkanlardan məhrumdur. Bu ölkəyə sərmayə qoymaqda, transmilli layihələrin həyata keçirilməsində xarici dövlətlər maraqlı deyil. Ermənistanın təcavüzkar siyasət yeritməsi bu ölkənin iqtisadi inkişafını tormozlayır. Ən nəhayət, bu onu özündə ehtiva edir ki, Azərbaycanın iqtisadi inkişafı Dağlıq Qarabağ münaqişəsinin güc yolu ilə həllinə gətirib çıxara bilər. Çünki Azərbaycan sonsuza qədər danışıqlarda Ermənistanın nazı ilə oynamayacaq. Ermənistan məqsədyönlü şəkildə danışıqları uzadır. Hesab edirəm ki, beynəlxalq birlik bu mesajdan ciddi nəticə çıxarmalıdır. Ermənistanın təcavüzkar siyasətinə dur deməlidir. Əvvəl-axır iqtisadi güc öz sözünü deyəcək”.
Vidadi ORDAHALLI
